ގަތަރުގައި މިހާރު ކުޅެވެމުންދާ ވޯލްޑް ކަޕް 2022 ގެ ގްރޫޕް އެޗްގައި މިރޭ އުރުގުއޭ އާއި ސައުތު ކޮރެއާ ބައްދަލުކުރި މެޗު އެއްވަރުވެގެން ނިމިއްޖެއެވެ.
އެޑިއުކޭޝަން ސިޓީ ސްޓޭޑިއަމުގައި ކުޅުނު މި މެޗު އެއްވަރުވީ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 އިންނެވެ.
ފޯރިގަދަ ކުޅުމެއް ފެނިގެން ދިޔަ މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ފެނިގެން ދިޔައީ ދާދި ހަމަހަމަ ކުޅުމެކެވެ. މި ހާފުގައި ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތުތަކެއް ވެސް ލިބުނެވެ. ނަމަވެސް އެއްވެސް ޓީމަކަށް މާ އޯޕަން ފުރުސަތެއް ނުލިބެއެވެ. މި ހާފުގައި ކޮރެއާގެ އެންމެ ނުރައްކާތެރި ހަމަލާއަކަށް ވީ މެޗުގެ 33 ވަނަ މިނެޓުގައި އުފެއްދި ހަމަލާއެވެ. ޕެނެލްޓީ އޭރިއާގެ ވާތް ފަރާތު އަރިމަތިން ކިމް މުން ހުވަން ނަގައިދިން ހުރަހަކުން ހުވަން އުއި ޖޯ ފޮނުވާލި ބޯޅަ ގޮސްފައިވަނީ ގޯލުގެ ދަނޑި މަތިން ބޭރަށެވެ.
އޭގެ ފަހުން އުރުގުއޭގެ ހަމަލާއެއް ފެނުނެވެ. މެޗުގެ 42 ވަނަ މިނެޓުގައި އުރުގުއާއީން ނެގި ކޯނަރަކުން ގޯޑިން ބޮލުން ފޮނުވާލި ހަމަލާ އަމާޒުވެފައިވަނީ ގޯލުގެ އަރިމަތީ ދަނޑީގެ ތިރީ ކަނަށެވެ.
ދެ ވަނަ ހާފުގައި ވެސް ދެ ޓީމުގެ ފަރާތުން ފެނުނީ ދާދި ހަމަހަމަ ކުޅުމެކެވެ. ދެ ޓީމުން ވެސް ގޯލެއް ޖެހުމަށް އެޓޭކްތައް އުފައްދަމުން ދިޔައެވެ. މިގޮތުން މެޗުގެ ފަހުކޮޅު އުރުގުއޭގެ ވަލްވާޑޭ އޭރިޔާގެ ބޭރުން ފޮނުވާލި ބާރު ހަމަލާއެއް ދަނޑިއަށް އަމާޒުވިއިރު، ކޮރެއާގެ ސޮން ދުރުން ފޮނުވާލި ހަމަލާ ދިޔައީ ބޭރަށެވެ.
މުޅި މެޗަށް ބަލާއިރު، އުރުގުއާއީން ވަނީ ދެކުނު ކޮރެއާގެ ގޯލަށް ޖުމުލަ އަށް ހަމަލާއެއް ފޮނުވާލާފައެވެ. އޭގެ ތެރެއިން ގޯލާއި އަމާޒުވީ 2 ހަމަލާއެވެ. އަދި ދެކުނު ކޮރެއާއިން ފަސް ހަމަލާ ފޮނުވާލފައިވާއިރު ގޯލާއި އަމާޒުވީ 1 ހަމަލާއެވެ.
