ފީފާ ވޯލްޑް ކަޕް ގްރޫޕް ޖީ ގައި ހިމެނޭ ކެމަރޫން އަދި ސްވިޒަލެންޑު ބައްދަލުކުރި މެޗު 1-0 ގެ ނަތީޖާއިން ސްވިޒަލެންޑް ކާމިޔާބު ކޮށްފިއެވެ.
މެޗު ފެށިގެން ރަނގަޅަށް ކުޅެމުން ދިޔަ ސްވިޒަލެންޑުން ކެމަރޫންގެ ހާފުތެރޭގައި ގިނަ ވަގުތު ބޯޅަ ހިފަހައްޓައިގެން ކުޅުނު މަވެސް މެޗުގެ ފުރަތަމަ ހާފުގައި މާ ރަނގަޅު ހަމަލާއެއް އުފެއްދިފައެއް ނުވެއެވެ. ނަމަވެސް ކެމަރޫނުން ވަނީ ކައުންޓަރ އެތޭކުގައި ހަމަލާތަކެއް އުފައްދާފައެވެ. އެގޮތުން އެ ޓީމުން އެންމެ ރަނގަޅު ފުރުސަތެއް ލިބުނީ އެމްބިއުމޯ އަށެވެ. އޭނާ ފޮނުވާލި ހަމަލާ ސްވިޒަލެންޑްގެ ގޯލްކީޕަރ ސޮމާ ދިފާއުކުރިއިރު، ހާފު ނިމެނިކޮށް ހިންގްލާ ގޯލަށް އަމާޒުކޮށް ފޮނުވާލި ނުރައްކާތެރި ހަމަލާ ވެސް ކީޕަރު ވަނީ މަތަކޮށްފައެވެ.
ދެ ވަނަ ހާފު ފެށިގެން އެންމެ ފަސް މިނެޓުގެ ތެރޭގައި ސްވިޒަލެންޑުން ވަނީ ލަނޑު ޖަހާ ލީޑު ނަގާފައެވެ. ޝަގީރީ ދިން ބޯޅައަކުން މި ލަނޑު އެޓީމަށް ކާމިޔާބު ކޮށްދިނީ ބްރީލް އެމްބޯލޯއެވެ. މި ލަނޑަށް ފަހުވެސް ސްވިޒަލެންޑުން ރަނގަޅަށް ކުޅެމުން ދިޔައިރު، ގިނަ ހަމަލާތަކެއް ވެސް ވަނީ އުފައްދާފައެވެ. ނަމަވެސް މި ހަމަލާތަކުގެ ހުރަހަކަށް ވީ ކެރޫންގެ ގޯލް ކީޕަރު އެންޑްރޫ އޮނާނާއެވެ.
ސްވިޒަލެންޑް އަދި ކެމަރޫން ބައްދަލުކުރި މި މެޗަކީ ގުރޫޕު ޖީގެ ފުރަތަމަ މެޗެވެ. މި ގުރޫޕުގެ ދެވަނަ މެޗުގައި މިރޭ ބްރެޒިލް އާއި ސާބިއާ ބައްދަލުކުރާނެއެވެ. އެ މެޗު ކުޅޭނީ މިރޭ ރާއްޖެ ގަޑިން ދަންވަރު 12:00 ގައެވެ.
