ފީފާ ވޯލްޑް ކަޕް 2022 ގެ ގުރޫޕް އެފްގެ ދެވަނަ މެޗުގައި ކެނެޑާއާއި ދެކޮޅަށް ކުޅުނު މެޗު ބެލްޖިއަމް އިން ކާމިޔާބު ކޮށްފިއެވެ.
ގަތަރުގެ އަހްމަދް ބިން އަލީ ސްޓޭޑިއަމްގައި ކެނަޑާ އާއި ދެކޮޅަށް ކުޅުނު މި މެޗު ބެލްޖިއަމް ކާމިޔާބުކުރީ 1-0 ގެ ނަތީޖާއިންނެވެ.
މި ދެޓީމު ރޭގެ މެޗަށް ނިކުތްއިރު، ގިނަ ބަޔަކަށް ހީވެފައި އޮތީ ތަރިންތަކަކާއި އެކު ނުކުތް ބެލްޖިއަމުން ކެނެޑާ ކޮޅަށް ގިނަ ލަނޑުތަކެއް ޖަހާ ބަލިކުރާނެ ކަމަށެވެ. ނަމަވެސް ހީކުރި ގޮތާއި ޚިލާފަށް މުޅި މެޗުގައި ވެސް މޮޅަށް ކުޅެ ގިނަ ހަމަލާތައް އުފައްދާފައި ވަނީ ކެނެޑާއިންނެވެ. ކެނަޑާއިން މެޗު ފެށީވެސް ބެލްޖިއަމަށް ޕްރެޝަރު ދީގެންނެވެ. އެގޮތުން ވަރަށް ބޮޑަށް ކުރިއަށް ޖެހި ބެލްޖިއަމްގެ ޑިފެންސް ލައިނަށް ބާރުބޮޑު ކުރަމުން ގެންދިޔައެވެ. ގިނަ ހަމަލާތަކެއް އުފެއްދިވެސް މެއެވެ. ނަމަވެސް ފުރުސަތުގެ ބޭނުންހިފާ ނަތީޖާ ނެރެވޭ ގޮތެއް ނުވިއެވެ.
މި މެޗުގެ އެންމެ ރަނގަޅު ފުރުސަތެއް ލިބުނީ ކެނަޑާގެ އަލްފަންސޯ ޑޭވިސްއަށެވެ. ބެލްޖިއަމްގެ އޭރިއާ ތެރެއިން ޔަނިކް ކްރަކާއޯ އަތުގައި ބޯޅަ ޖެހުމުން ލިބުނު ޕެނަލްޓީ ޖެހީ ޑޭވިސްއެވެ. ނަމަވެސް ޑޭވިސް ފޮނުވާލި ޕެނަލްޓީ, ބެލްޖިއަމްގެ ކީޕަރު ތިބައޫ ކޯޓުއާ ވަނީ މަތަކޮށްފައެވެ. ނާކާމިޔާބުވި ޕެނަލްޓީއަށް ފަހުވެސް ކެނެޑާއިން ރަނގަޅަށް ކުޅުނެވެ. ނަމަވެސް ލަނޑު ޖަހަން މުޅި ޓީމު ކުރިޔަށް އަރައި އޮތް ދަނޑިވަޅެއްގައި ބެލްޖިއަމުން އުފެއްދި ކައުންޓަ އެޓޭކެއްގައި އެޓީމުން މެޗުގެ ލީޑު ނެގިއެވެ. ބެލްޖިއަމްއިން މެޗުގައި ލީޑު ނެގީ ފުރަތަމަ ހާފު ނިމެނިކޮށް ހާފުގެ 44 ވަނަ މިނެޓުގައި މިޗީ ބަޓްޝުއާއީ ކާމިޔާބު ކޮށްދިން ލަނޑުންނެވެ.
ދެވަނަ ހާފުގައިވެސް މޮޅަށް ކުޅެ ބެލްޖިއަމްގެ ފަހަތަށް ޕްރެޝަރުކޮށް ހަމަލާތައް އުފެއްދުމަށް މަސައްކަތް ކުރީ ކެނެޑާއިންނެވެ. ނަމަވެސް ލިބުނު ކައުންޓަރ އެޓޭކުތަކުގައި ބެލްޖިއަމުން ދިޔައީ ނުރައްކާ ކުރަމުންނެވެ. އެގޮތުން މި ހާފުގައި ލަނޑު ޖަހަން އެންމެ ރަނގަޅު ފުރުސަތުތަކެއް ލިބުނީ ބެލްޖިއަމަށެވެ. ނަމަވެސް ބަޓްޝުއާއީ އަށް ލިބުނު މި ފުރުސަތުގެ ބޭނުން ނުހިފުނެވެ. ބަޓްޝޫއާއާއިގެ މި ފުރުސަތު ބޭކާރު ކޮށްލީ ކެނެޑާގެ ޑިފެންޑަރުންނެވެ.
ނަތީޖާ ހަމަހަމަ ކުރުމަށް ދެ ޓީމަށް ވެސް ފަހު ހާފުގައި ފުރުސަތުތައް ލިބުނެވެ. ނަމަވެސް ފުރުސަތުތަކުގެ ބޭނުމެއް ނުހިފުނެވެ.
ރޭގެ މި ނަތީޖާއާއި އެކު ބެލްޖިއަމަށް ވަނީ ގުރޫޕް އެފްގެ އެއްވަނަ ލިބިފައެވެ. ތިންޕޮއިންޓާއި އެކު ބެލްޖިއަމް ގުރޫޕުގެ އެއްވަނަ ހޯދިއިރު، ދެވަނާގައި އެއް ޕޮއިންޓު ހޯދައިގެން އޮތީ ކްރޮއެޝިއާއެވެ. ތިން ވަނާގައި އޮތީ އެއް ޕޮއިންޓާއި އެކު އޮތް މޮރޮކޯއެވެ. ޕޮއިންޓެއް ނުލިބި އެންމެ ފުލުގައި އޮތި ކެނެޑާއެވެ.
