މިފަހަރުގެ އެންމެ ތަފާތު ބޮޑު ނަތީޖާއާއެކު ސްޕެއިންއަށް ހިތްހަމަޖެހުމެއް
ފީފާ ވޯލްޑް ކަޕް 2022 ގެ ގުރޫޕް އީގައި މިރޭ ކޮސްޓަރީކާއާއި ދެކޮޅަށް ކުޅުނު މެޗު ތަފާތު ބޮޑު ނަތީޖާއަކުން ސްޕެއިނުން ކާމިޔާބު ކޮށްފިއެވެ.
ކޮސްޓަރީކާ އާއި ދެކޮޅަށް ކުޅުނު މި މެޗު ސްޕެއިނުން ކާމިޔާބު ކުރީ 0-7 ގެ ނަތީޖާއިންނެވެ.
އަލް ތުމާމާ ސްޓޭޑިއަމްގައި ކުޅުނު މި މެޗުގައި ގިނަ ވަގުތު ބޯޅަ ހިފަހައްޓައިގެން ރަނގަޅަށް ކުޅުނި ސްޕެއިނުންނެވެ. އެގޮތުން މި މެޗުގައި ސްޕޭނުން ލީޑު ނެގީ ފުރަތަމަ ހާފުގެ 11 ވަނަ މިނެޓުގައެވެ. މިއީ ގަވީގެ އެހީތެރިކަމާއި އެކު ޑެނީ އޮލްމޯ ކާމިޔާބުކުރި ލަނޑެކެވެ. އޭގެ 10 މިނެޓު ފަހުން ޖޯޑީ އަލްބާ ނަގައިދިން ހުރަހެއް ގޯލަށް ފޮނުވާލައިގެން ސްޕެއިންގެ ލީޑު ފުޅާކޮށްދިނީ މާކޯ އަސެންސިއޯއެވެ. މި ހާފުގައި ސްޕެއިނުން ޖެހި ތިން ވަނަ ލަނޑަކީ ޕެނަލްޓީއަކުން ފެރަން ޓޮރޭސް ޖަހައިދިން ލަނޑެކެވެ.
ދެވަނަ ހާފުވެސް މޮޅު ކުޅުމަކާއި އެކު ސްޕެއިނުން ފެށިއިރު، އެޓީމުގެ ހަތަރުވަނަ ލަނޑު މެޗުގެ 54 ވަނަ މިނެޓުގައި ކާމިޔާބު ކޮށްދިނީ ފެރާން ޓޯރޭސްއެވެ. ސްޕެއިންގެ ފަސްވަނަ ލަނޑަކީ އަލްވާރޯ މޮރާޓާގެ އެހީތެރިކަމާއި އެކު ގަވީ ކާމިޔާބުކުރި ލަނޑެކެވެ. ސްޕެއިންގެ ހަވަނަ ލަނޑު މެޗުގެ 90 ވަނޖަ މިނެޓުގައި ޖަހައިދިނީ ކާލޯސް ސޮލާއެވެ. އެޓީމުގެ ފަހު ލަނޑަކީ ބަދަލު ކުޅުންތެރިއެއްގެ ގޮތުގައި ކުޅެން އެރި އަލްވާރޯ މޮރާޓާ ކާމިޔާބުކޮށްދިން ލަނޑެކެވެ. މި މެޗަކީ މިފަހަރުގެ މުބާރާތުގައި އެންމެ ތަފާތު ބޮޑު ނަތީޖާއެއް ފެނިގެން ދިޔަ މެޗުކަން ފާހަގަކޮށްލެވެއެވެ.
މި ނަތީޖާއާއެކު ގްރޫޕް އީގައި ހިމެނޭ ޖަޕާން އަދި ސްޕެއިނަށް ވެސް ތިން ޕޮއިންޓު ލިބިފައިވާއިރު، ގުރޫޕުގެ އެއްވަނަ ލިބެނީ ފައިދާ ގޯލުން ސްޕެއިންނަށެވެ..
