ފާއިތުވި 4 އަހަރު ތ. އަތޮޅަށް، ސަރުކާރުން އެއްވެސް އަޅާލުމެއް ނުދޭ ކަމަށް އެމްއެންޕީގެ ޕީޖީ ލީޑަރ ޢަބްދުﷲ ރިޔާޒް ފާހަގަކުރައްވައިފި އެވެ.
ރިޔާޒު މިހެން ވިދާޅުވީ 2023 ވަނަ އަހަރަށް ލަފާކުރާ ދައުލަތުގެ ބަޖެޓު ދިރާސާކޮށް ނިންމިގޮތުގެ ރިޕޯޓުގެ ބަހުސްގައި މަޖިލީހުގައި ވާހަކަ ދައްކަވަމުން ނެވެ.
ރިޔާޒު ވިދާޅުވީ މިއީ މަޖިލީހުގައި ހޭދަކުރައްވާ ދެވަނަ ދައުރު ކަމަށާއި މިހާތަނަށް އައިއިރު މުޅިން ވެސް ހުށަހަޅަނީ ސިޔާސީ ބަޖެޓުތަކެއް ކަމަށެވެ. އަދި އަންނަ އަހަރުގެ ބަޖެޓު ފެނިގެން ދަނީ އިންތިޚާބަށް ތައްޔާތުކޮށްފައިވާ ބަޖެޓެއްގެ ގޮތުގައި ކަމަށެވެ.
އިޤްތިޞާދީ ގޮތުން ހަމަހަމަ 4 އަހަރުގެ ދެންނެވެން ނެތް ކަމަށާއި މި 4 އަހަރުތެރޭގައި ތ. އަތޮޅުވަނީ އިހުމާލުކޮށްފައި ކަމަށް ވެސް އޭނާ ވިދާޅުވި އެވެ.
އެގޮތުން ރިސޯޓެއްގެ ގޮތުގައި ތަރައްޤީކުރުމަށް އެންމެ ރަށެއް ދޫކޮށްފައި ނެތް ކަމަށާއި ދަނޑުވެރިކަމުގެ މަސައްކަތަށް ވެސް އެއްވެސް ރަށެއް ދެވިފައި ނެތް ކަމަށް ވިދާޅުވި އެވެ. އަދި ތ. އަތޮޅަކީ މަސްވެރިން ގިނަ އަތޮޅެއް ކަމަށާއި މަސްވެރިކަމުގެ މަސައްކަތަށް ދޫކޮށްފައިވާ ތ. ފުނައްޑޫ ގައި މަސްގަތުމުގެ މަސައްކަތެއް ވެސް ނުހިންގާ ކަމަށެވެ.
މީގެ އިތުރުން އެ އަތޮޅުގައި އޮންނަ ހަމައެކަނި އެއަރޕޯޓް ކަމުގައިވާ ތިމަރަފުށީ އެއަރޕޯޓަށް ޖައްސަނީ ހަފްތާއަކު އެންމެ ދެ ފްލައިޓް ކަމަށާއި، މިއީ ރައީސް ޔާމީންގެ ސަރުކާރުގެ ދުވަސްވަރު ވެސް މިކަން އޮތް ގޮތް ކަމަށް ރިޔާޒު ވިދާޅުވި އެވެ.
" 2019 ވަނަ އަހަރުގެ ބަޖެޓުގައި ހޮސްޕިޓަލަކާއި ޖޫނިއަރ ކޮލެޖެއްގެ ވާހަކަ އޮތް. މިދެންނެވުނު ހޮސްޕިޓަލް އެޅުމަށް ބަޔަކާ ހަވާލުކުރުމުގެ ރަސްމިއްޔާތަށް ހުދު އަޅުގަނޑުވެސް ގެންދިޔަ. މިވާހަކަ ނޫސްތަކުގައި ވެސް އޮތް. ނަމަވެސް އޭގެ ފަހުން އެޕްރޮޖެކްޓްތަކަށް ވީގޮތްވެސް ނޭނގޭ." ރިޔާޒު ވިދާޅުވި އެވެ.
މިހޮސްޕިޓަލާއި ޖޫނިއަރ ކޮލެޖާ ބެހޭ ގޮތުން ތިމަރަފުށީ ރައްޔިތުން ސަރުކާރާ ސުވާލުކުރާ ކަމަށާއި މިޕްރޮޖްޓްތަކުގެ މަސައްކަތް އެއްވެސް ވަރަކަށް ކުރެވިފައި ނުވާ ކަމަށް އޭނާ ވިދާޅުވި އެވެ. އަދި ރައީސުލްޖުމްހޫރިއްޔާގެ ވަޢުދެއް ކަމަށްވާ ކިނބިދޫ-ވޭމަންޑޫ ކޯޒްވޭގެ ވަޢުދު ފުއްދުމަށް ކޮންމެ އަހަރެއްގެ ބަޖެޓުގައި މަދު ލާރިކޮޅެއް ހިމަނާލުން ނޫން އެއްވެސް ކަމެއް ކުރެވިފައި ނުވާ ކަމަށް ވެސް ވިދާޅުވި އެވެ. ބަޖެޓު ދިރާސާކޮށް ނިންމިގޮތުގެ ރިޕޯޓުގެ ބަހުސްގައި ޕީޖީ ލީޑަރ އިތުރަށް ފާހަގަކުރެއްވި ކަންކަމުގެ ތެރޭގައި ތ. އަތޮޅުގެ ހުރިހާ ރައްޔިތުން ބޭސްފަރުވާއަށްދާ ވޭމަންޑޫ ހޮސްޕިޓަލްގެ އިމާރާތް ހުރީ ބާވެފައި ކަމަށާއި އެތަނުގެ އާބާތުރަ ފިލުވުމުގެ މަސައްކަތެއް ކުރެވިފައި ނެތްކަން ފާހަގަ ކުރެއްވި އެވެ. އަދި އެތަން ތަރައްޤީކުރުމަށް އެއްވެސް މަސައްކަތެއް ކުރެވިފައި ނުވާ ކަމަށް ވިދާޅުވި އެވެ.
މީގެ އިތުރުން ސަރުކާރަށް ތާއީދުކުރައްވާ މެންބަރުން އެންމެ ގަދައަށް ފާހަގަކުރަމުންދާ އާރްޓީއެލް ފެރީގެ ޚިދުމަތް ވެސް އެންމެ ފަހުން ލިބޭނެ އަތޮޅެއްގެ ގޮތުގައި އޮތީ ތ. އަތޮޅު ކަމަށް ވިދާޅުވި އެވެ.
ރިޔާޒު ވިދާޅުވީ ތިމަރަފުށީގައި 100 ހައުސިންގ ޔުނިޓްގެ މަސައްކަތް ވެސް ފެއްޓި ކަމަށާއި އެއްވެސް ރައްޔިތަކަށް އަދި ހިޔާވަހިކަމެއް ލިބިފައި ނެތް ކަމަށާއި، ތިމަރަފުށީގެ މަގުހެދުމުގެ ޕްރޮޖެކްޓްވެސް ފެއްޓި ކަމަށާއި، އަދި މިއަދާ ހަމައަށްވެސް އެންމެ ތާރުކޮޅެއް ވެސް އެޅިފައި ނެތް ކަމަށެވެ. އަދި މީގެ އެއްވެސް ޕްރޮޖްކްޓެއް ކުރިއަށް އޮތް 5 އަހަރުތެރޭގައި ވެސް ނިމޭނެ ކަމުގެ ޔަޤީންކަމެއް ނެތް ކަމަށް ވިދާޅުވި އެވެ.
2019 އަހަރުން ފެށިގެން ކޮންމެ އަހަރެއްގެ ބަޖެޓުގައި ވެސް ތިމަރަފުށީގެ ގިރާ ސަރަހައްދު ހިމާޔަތްކުރުމުގެ މަސައްކަތް ހިމަނާ ކަމަށާއި، ބަޖެޓުގައި ހިމެނުމަކުން އަދި މިއީ ކަންވުމެއް ނޫންކަން ފާހަގަ ކުރައްވާ ރިޔާޒު ވިދާޅުވީ މިސަރުކާރު އައި އިރުވެސް ވޭމަންޑޫގެ ނަރުދަމާގެ މަސައްކަތް އޮތީ ހަވާލުކޮށްފައި ކަމަށެވެ. އެކަމަކު ވެސް އެމަސައްކަތް ކުރިޔަށް ނުދާ ކަމަށާއި ނަމަވެސް ބަޔަކާ މަސައްކަތެއް ހަވާލުކުރުމުން އެއީ ޕްރޮޖެކްޓް ހާސިލްކުރެވުން ކަމަށް ދެކޭ ނަމަ އެއޮތީ އެކަން ކުރެވިފައި ކަމުގައި ރިޔާޒު ވިދާޅުވި އެވެ.
އަންނަ އަހަރުގެ ދައުލަތުގެ ބަޖެޓު ދިރާސާކުރުމުގެ މަރުހަލާގައި ދެ ހުށަހެޅުމެއް ހުށަހެޅުއްވި ކަމަށާއި އެގޮތުން، މަސްވެރިންނަށް ދެވޭ ސަބްސިޑީގެ ގޮތުގައި މިފްކޯއަށް ދިނުމަށް ބަޖެޓުގައި ކަނޑައަޅާފައިވާ 250 މިލިއަން ރުފިޔާ މިފްކޯއަށް ދިނުމުގެ ބަދަލުގައި ސީދާ މަސްވެރިންނަށް ދެވޭ އެއްޗެއްގެ ގޮތުގައި ކަނޑައެޅުމަށް ހުށަހެޅުއްވި ކަމަށް ވިދާޅުވި އެވެ.
މީގެ އިތުރުން ފުނައްޑޫ މަސް ފެކްޓްރީ އޮޕަރޭޝަނަށް ގެންނަން ކުރަންޖެހޭ މަސައްކަތްތައް ކުރުމަށް 70 މިލިއަން ރުފިޔާ ކޮންޓިންޖެންސީ ބަޖެޓުގައި ހިމެނުމަށް ހުށަހެޅި ކަމަށާއި ނަމަވެސް މިވާހަކަ އަޑުއަހަން ވެސް ބަޖެޓު ކޮމިޓީން ބޭނުންނުވި ތާނގާ ތާއީދެއް ވެސް ނުލިބުނު ކަމަށް ވިދާޅުވި އެވެ.
