ރާއްޖެ ޓްރާންސްޕޯޓް ލިންކް (އާރުޓީއެލް) ފެރީގެ ޚިދުމަތް ޅ. އަތޮޅުގައި މިއަދު ފަށާނެ ކަމަށް ޕްލޭނިންގ މިނިސްޓްރީން ހާމަކޮށްފި އެވެ.
އެ މިނިސްޓްރީން ބުނީ މިއަދު ފަށަނީ އެ ފެރީތަކަށް އަހުލުވެރިކުރުމުގެ ދަތުރުތައް ކަމަށެވެ. އަދި މި ދަތުރުތަކަށް އެއްވެސް އަގެއް ނުނަގާނެ ކަމަށް ވެސް އެ މިނިސްޓްރީން ބުނެއެވެ.
ޕްލޭނިންގ މިނިސްޓްރީން ބުނީ އެ އަތޮޅުގައި ތިން ރޫޓަކުން ދަތުރުތައް ކުރުމަށް ނިންމާފައިވާ ކަމަށާއި ހަފުތާގެ ހުރިހާ ދުވަސްތަކެއްގައި އާރުޓީއެލްގެ ދަތުރުތައް އޮންނާނެ ކަމަށެވެ.
ފުރަތަމަ ރޫޓް ގައި ހިމެނެނީ ހިންނަވަރު، ނައިފަރު، ފެލިވަރު އަދި މަޑިވަރެވެ. ދެވަނަ ރޫޓް ގައި ނައިފަރާއި މަޑިވަރު ހިމެނޭއިރު، ތިންވަނަ ރޫޓްގައި ހިމެނެނީ އޮޅުވެލިފުށި، ކުރެންދޫ އަދި ނައިފަރެވެ.
އާރްޓީއެލް ގެ ޚިދުމަތަކީ މުޅި ރާއްޖެ ދަތުރުފަތުރުން ގުޅާލުމަށް ސަރުކާރުން ހިންގާ މަޝްރޫއެކެވެ. މި މަޝްރޫއު ފުރަތަމަ ފެށީ ހދ. އަތޮޅުގަ އެވެ. އެ އަތޮޅުގައި މި ޚިދުމަތް ރަސްމީކޮށް ފެށީ މިއަހަރުގެ ޖޫން މަހުގެ 11 ގަ އެވެ.
އެއަށްފަހު ހއ. އަތޮޅުގައި ޖުލައި 3 ވަނަ ދުވަހު ރަސްމީކޮށް ފެށިއިރު، ށ. އަތޮޅުގައި މި ޚިދުމަތް ފެށީ މި ހިނގާ ސެޕްޓެމްބަރުމަހުގެ 6 ވަނަ ދުވަހު އެވެ.
