ޒަކާތު ނަފާ ޕްރޮގްރާމް ހިންގާނެ އުސޫލު އާންމުކޮށްފި އެވެ.
އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ބުނީ މިއީ އެ މިނިސްޓްރީ އާއި އިކޮނޮމިކް މިނިސްޓްރީ ގުޅިގެން މިދިޔަ ފެބްރުއަރީ 28 ގައި، ފަގީރުންނާއި މިސްކީނުންގެ ދަފްތަރުގައިވާ ފަރާތްތަކަށް މާލީ އެހީތެރިކަން ދިނުމަށް ފެށި ޕްރޮގްރާމެއް ކަމަށެވެ.
އެ ޕްރޮގްރާމް ހިންގަނީ ކަނޑައެޅޭ ވަކި މިންގަޑުތަކަކާއި އުސޫލުތަކުގެ ދަށުން ވަކި އަދަދެއްގެ ބަޔަކަށް ފުދުންތެރިކަން އިތުރުކޮށް، ބޭނުންވާ ތަކެތި ހޯދައިދީ، ތަމްރީނު ޕްރޮގްރާމްތައް ހިންގުމަށް ކަމަށް ވެސް އެ މިނިސްޓްރީން ބުނެއެވެ.
މިއަދު އާންމުކުރި އުސޫލުގައި ޒަކާތު ނަފާ ޕްރޮގްރާމް ހިންގުމަށް ސްޓިއަރިން ކޮމިޓީ އެއް އެކުލަވާލަން ޖެހެ އެވެ. ނުވަ މެންބަރުންގެ މައްޗަށް އެކުލެވޭ މި ކޮމެޓީގައި ހިމެނެނީ އިސްލާމިކް މިނިސްޓްރީގެ ފަރާތުން ތިން މެންބަރުންނާއި އިކޮނޮމިކް މިނިސްޓްރީގެ ފަރާތުން ތިން މެންބަރުން ނެވެ. އަދި ފަންޑު މެނޭޖްމަންޓް ކޯޕަރޭޝަންގެ ފަރާތުން މެންބަރަކާއި ބީސީސީގެ ފަރާތުން މެންބަރަކާއި އެސްޑީއެފްސީގެ ފަރާތުން މެންބަރަކާއި އެގްރޯ ކުންފުނީގެ ފަރާތުން މެންބަރެކެވެ.
މިއަދު އާންމުކުރި އެ އުސޫލުގައި ބުނެފައިވާ ގޮތުން، ޒަކާތު ނަފާ ޕްރޮގްރާމްގެ ތެރެއިން ޒަކާތު ފަންޑުން ޚަރަދުކުރެވޭނީ އާއިލާއަކަށް ގިނަވެގެން 150،000ރ އެވެ. އަދި އޭގެ އިތުރުން އެސްއެމްއީ ފަންޑު މެދުވެރިކޮށް އަނބުރާ ދައްކާ ގޮތަށް، އިންޓްރަސްޓް ނުހިމެނޭ ލޯނެއްގެ ގޮތުގައި ވަކި މިންވަރެއް އެހީގެ ގޮތުގައި ހަމަޖެއްސިދާނެ ކަމަށް އުސޫލުގައި ވެއެވެ.
ޒަކާތު ނަފާ ޕްރޮގްރާމް ޓްރައި ޕާޓީ ފަހުމުނަމާގައި ސޮއިކުރެއްވުމާއި މި ޕްރޮގްރާމާ ގުޅޭ މައުލޫމާތު ނޫސްވެރިންނަށް ދެއްވުން pic.twitter.com/MVpcENloro
— Ministry of Islamic Affairs (@MVIaffairs) November 6, 2022
އެ ޕްރޮގްރާމްގެ ދަށުން އެހީދިނުމަށް ނިންމާފައިވަނީ ގެދޮރުގެ ނަފާ، ޕޯލްޓްރީ ފާމިންގ، ހައިޑްރޯފޯނިކް ދަނޑުވެރިކަން އަދި ފަރުމަސްވެރިކަމާއި ފެހުމާއި އެޕްރެންޓިސްޝިޕް ޕްރޮގްރާމްތަކެވެ.
