ރާނީ އެލިޒަބަތު ރާއްޖެއަށް ކުރެއްވި ޒިޔާރަތް އަދިވެސް ދިވެހިން ހަނދާން ކުރަނީ ހިތުގެ ލޯތްބާއި އިޙްތިރާމާއެކުގައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ވިދާޅުވެއްޖެއެވެ.
އެ ދެ ކަނބަލުން މިހެން ވިދާޅުވީ އިނގިރޭސި ވިލާތުގެ ރާނީ އެލިޒަބެތް 2 އަވަހާރަވުމާއި ގުޅިގެން ހުޅުވާފައިވާ ތައުޒިޔާގެ ދަފްތަރުގައި ލިޔުއްވި ބަޔާނުގައެވެ.
އެ ބަޔާނުގައި ވަނީ މީގެ 50 އަހަރު ކުރިން ރާނީ އެލިޒަބަތު ރާއްޖެއަށް ކުރެއްވި ޒިޔާރަތް އަދިވެސް ދިވެހިން ހަނދާން ކުރަނީ ހިތުގެ ލޯތްބާއި އިޙްތިރާމާއެކު ކަމަށެވެ. އަދި ރާއްޖޭގެ ރައްޔިތުން ރާނީ އެލިޒަބަތު 2 ވަނައާ މުޚާތަބްކޮށް "ރާނީ" އެކަނި ކިޔަނީ އެކަމަނާއަށް ދީފައިވާ މަތިވެރި ޤަދަރަކުން ކަމަށެވެ.
އެކަމަނާއަކީ ކޮމަންވެލްތް މެދުވެރިކޮށް ރާއްޖެ ފަދަ ކުދި ޤައުމުތައް ބޭރު ދުނިޔޭގައި ހަމަހަމަކަމާއެކީ ބަސްބުނެ ފައިތިލަ ސާބިތުކުރުމަށް ފުރުޞަތު ދެއްވި ބޭކަނބަލެއްކަން ވެސް އެ ބަޔާނުގައި ރައީސުލްޖުމްހޫރިއްޔާގެ ދެކަނބަލުން ވަނީ ފާހަގަކުރައްވާފައެވެ.
ރާއްޖޭގައި ހުންނަ ބްރިޓިޝް ހައިކޮމިޝަންގައި ހުޅުވާފައިވާ ތަޢުޒިޔާގެ ދަފްތަރުގައި ރައީސުލްޖުމްހޫރިއްޔާގެ ދެކަނބަލުން ލިޔުއްވި ބަޔާނުގައި ރާނީ އެލިޒަބަތު 2 ވަނައިގެ ރަނިކަން ސިފަކުރައްވާފައިވަނީ ވާޖިބު އަދާކުރެއްވުމަށް ތެދުވެރި، ރައްޔިތުންނަށް ޚިދުމަތްކުރުމުގައި ލާމަސީލު މިސާލެއްގެ ގޮތުގައެވެ.
މީގެ އިތުރުން އިނގިރޭސި ވިލާތާއި ކޮމަންވެލްތުގެ މެމްބަރު ޤައުމުތަކާއި ބައިނަލްއަޤްވާމީ މައިދާނުގައި އެކަމަނާ ކުރެއްވި ޚިދުމަތްތައް ކުރައްވާފައިވަނީ ނުހަނު ސާބިތުކަމާއެކު ކަމުގައި ވެސް މި ބަޔާނުގައި ވެއެވެ.
ރާނީ އެލިޒަބަތް 2 އަވަހާރަވެފައިވަނީ ސެޕްޓެންބަރު މަހުގެ 8 ވީ ބުރާސްފަތި ދުވަހުއެވެ.
އިނގިރޭސި ވިލާތުގެ ރަނިކަމުގެ ތަޚުތުގައި 70 އަހަރަށްވުރެ ގިނަދުވަހު އިންނެވި، ރާނީ އެލިޒަބަތު 2 ވަނަ އަވަހާރަވީ ޢުމުރުފުޅުން 96 އަހަރުފުޅުގައެވެ.
