ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރގެ މަގާމަށް އަހުމަދު އާތިފް މިއަދު ހަމަޖައްސައިފިއެވެ.
އެ ކުންފުނީގެ ޑެޕިއުޓީ އެމްޑީގެ މަގާމުގައި ހުންނެވި އާތިފް އެ މަގާމަށް ހަމަޖެއްސީ، އެޗްޑީސީގެ ގަވާއިދުގައިވާ ގޮތުގެ މަތިން އުމުރުން 55 އަހަރު ވުމުން އެޗްޑީސީގެ އެމްޑީގެ މަގާމުގައި ހުންނެވި ސުހައިލް އަހްމަދު ރިޓަޔަރ ކުރެއްވުމުންނެވެ.
އެޗްޑީސީން ބުނީ އެ ކުންފުނީގެ އާތިފްގެ ލީޑަރޝިޕްގެ ދަށުން އެކުންފުނީގެ މަސައްކަތްތައް ކުރިއަށްވުރެ ހަރުދަނާވެ އިތުރު ހަރުފަތަކަށް ގެންދެވޭނެ ކަމަށް ގަބޫލު ކުރެވޭ ކަމަށެވެ.
2019 ވަނަ އަހަރުގެ މާރޗު 6 ވަނަ ދުވަހު އެޗްޑީސީގެ ޑިޕިއުޓީ އެމްޑީގެ މަގާމަށް ހަމަޖައްސާފައިވާ އާތިފަކީ މެލޭޝިއާގެ ހާޓްފޯޑްޝަޔަރ ޔުނިވަރސިޓީން އެކައުންޓިންގ ގެ ދާއިރާއިން ބެޗުލަރސް ޑިގްރީ ހާސިލްކުރައްވައިފައިވާ ބޭފުޅެކެވެ.
އެކައުންޓިންގ ގެ ދާއިރާގައި 10 އަހަރަށް ވުރެ ގިނަ ދުވަހު އާތިފު ވަނީ މަސައްކަތް ކުރައްވާފައިވާއިރު، ބޭންކް އޮފް މޯލްޑިވްސް އާއި މޯލްޑިވްސް މަނިޓަރީ އޮތޯރިޓީ ހިމެނޭ ގޮތަށް ޕަބްލިކް ސެކްޓަރ އަދި ޕްރައިވެޓް ސެކްޓަރގައި ވެސް އާތިފް ވަނީ މަސައްކަތް ކުރައްވާފައެވެ.
