ދުނިޔޭގެ އެންމެ މަޤުބޫލު 100 ހޮޓެލްގެ ތެރޭގައި ރާއްޖޭގެ އިތާފުށި އަދި ރީތިރަށް ހިމެނިއްޖެއެވެ.
ފަތުރުވެރިކަމާއި ގުޅުންހުރި މައުލޫމާތު ފޯރުކޮށްދޭ ބައިނަލްއަޤްވާމީ ޕްލެޓްފޯމް، ޓްރެވެލް ލެޝަރއިން އާންމުކޮށްފައިވާ ލިސްޓަކީ ދުނިޔޭގެ އެކި ތަންތަނަށް ދަތުރުކުރާ މީހުންގެ ޚިޔާލަށް ބަލައިގެން ތައްޔާރުކުރާ ލިސްޓެކެވެ.
ހޮޓެލްތައް ހޮވުމުގައި އެންމެ ބޮޑަށް ބަލާފައިވާނީ އެތަންތަނުން ފަތުރުވެރިންނަށް ލިބޭ ޚިދުމަތާއި ތަޖުތިބާތަކުގެ މައްޗައްކަމަށް ޓްރެވަލް ލެޝަރ އިން ބުނެއެވެ.
އެ ލިސްޓުގެ ތިން ވަނަ ލިބިފައިވަނީ ރާއްޖޭގެ ވޯލްޑޯފް އެސްޓޯރިއާ މޯލްޑިވްސް އިތާފުށި ރިސޯޓެވެ. މާލެ އަތޮޅުގައި ތަރައްޤީކޮށް 2019 ވަނަ އަހަރު ހުޅުވާފައިވާ މި ރިސޯޓަކީ މަޝްހޫރު ހިލްޓަން ބްރޭންޑުގެ ދަށުން ހިންގާ ލަގްޒަރީ ރިސޯޓް ބްރޭންޑެކެވެ.
ފަޅު ހިއްކައިގެން ތިން ރަށް ގުޅުވާލައިގެން ތަރައްޤީކޮށްފައިވާ މިރިސޯޓުގައި 122 ކޮޓަރި ހުރެއެވެ.
މި ލިސްޓުގެ ފަސް ވަނައިގައި އޮތީ ވަން އެންޑް އޮންލީ ރީތިރަށް ރިސޯޓެވެ. މިއީ ވެސް މާލެ އަތޮޅުގައި ތަރައްޤީކޮށްފައިވާ ރިސޯޓެކެވެ.
މި ރިސޯޓުގައި ވެސް ހަތަރު ވައްތަރެއްގެ ކޮޓަރިތައް ހުރެއެވެ. އެއީ ބީޗް ވިލާއާއި ވޯޓަރ ވިލާއާއި، ގްރޭންޑް ރެސިޑެންސްގެ އަދި ގްރޭންޑް ސަންސެޓް ރެސިޑެންސްއެވެ.
