މިއަހަރުގެ އަޟްހާ ޢީދު ފާހަގަކުރުމުގެ ގޮތުން އައްޑު އަތޮޅު މީދޫގައި ބޭއްވުމަށް ހަމަޖެހިފައިވާ "އައްޑޫ ޢީދު ފެސްޓިވަލް" ގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފިއެވެ.
ތިން ދުވަހުގެ މުއްދަތަށް ކުރިއަށް ގެންދާ މި ޢީދު ފެސްޓިވަލްގައި ކުލަ މަޖާ، ފެން ކުޅި، ކުޑަކުދިންގެ ހަވީރު އަދި އީދު ޝޯވ ފަދަ ތަފާތު ހަރަކާތްތައް ހިމެނޭނެއެވެ. މީގެ އިތުރުން ޢީދު ދުވަސް ފާހަގަކުރުމުގެ ގޮތުން ޢީދު ހަދިޔާ އާއި އެކި އިނާމުތައް ދިނުމާއި ޢީދު ސައިވެސް އޮންނާނެއެވެ. "އައްޑޫ ޢީދު ފެސްޓިވަލް" އަކީ އައްޑު އަތޮޅު މީދޫ ޒުވާނުން އިސްނަގައިގެން އިންތިޒާމް ކުރާ ހަރަކާތެކެވެ.
"ޒުވާނުން އިސްނަގައިގެން ބާއްވާ މިފަދަ އިވެންޓްތަކަށް ދިރާގުން އަބަދުވެސް ދެއްވާ އެއްބާރުލުމަށް ޝުކުރު އަދާކުރަން. އަޟްޙާ ޢީދުގެ އުފާފާޅުކުރުންތަކަކީ އަޅުގަނޑުމެންގެ ސަގާފަތުގެ ވަރަށް މުހިންމު ބައެއް. "އައްޑޫ ޢީދު ފެސްޓިވަލް" ފަދަ ކުލަ ގަދަ ޙަފްލާއެއް އާންމުންނާއި ހަމައަށް ގެނެސްދިނުމަށް ދިރާގުން ވެދެއްވާ އެހީތެރިކަމަށްޓަކައި ވަރަށް ބޮޑަށް ޝުކުރިއްޔާ،" ފެސްޓިވަލް އިންތިޒާމް ކުރައްވާ ފަރާތެއްކަމުގައިވާ މީދޫ ޑައިނެމިކް ކޮމިއުނިޓީގެ ޑިރެކްޓަރ އޮފް މީޑިއާ އެންޑް ކޮމިއުނިކޭޝަންސް، ޙައްވާ މުޙައްމަދު ވިދާޅުވިއެވެ.
"އައްޑޫ ޢީދު ފެސްޓިވަލްގެ ޑިޖިޓަލް ޕާޓްނަރަކަށް ވުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. މުޖުތަމަޢުގެ ތެރޭގައި އޮންނަ އެއްބައިވަންތަކަން ދައްކުވައިދޭފަދަ ޒުވާނުންގެ ހަރަކާތްތަކަށް އެއްބާރުލުން ދިނުމަކީ ދިރާގަށް އަބަދުވެސް ވަރަށް މުހިންމު ކަމެއް،" ދިރާގުގެ އެސިސްޓެންޓް މެނޭޖަރ ޕަބްލިކް ރިލޭޝަންސް، ޖައިޝަން ހަމީދް ވިދާޅުވިއެވެ.
ޒުވާނުންނާއި މުޖުތަމަޢު ބާރުވެރިކުރުމަކީ ދިރާގުން ޙާއްސަ އިސްކަމެއްދޭ މައިގަނޑު އެއް ދާއިރާއެވެ. މިގޮތުން އެ ކުންފުނިން އަންނަނީ ޒުވާނުންނަށް މުޖުތަމަޢު ކުރިއެރުވުމަށް މަސައްކަތް ކުރުމުގެ ފުރުޞަތު ޒުވާނުންނަށް ހުޅުވިގެންދާނެ ތަފާތު މަޝްރޫއުތަކަށް އެހީތެރިކަން ފޯރުކޮށްދެމުންނެވެ.
ދިރާގުން ދަނީ ރާއްޖޭގެ ޒުވާނުންނާއި މުޖުތަމަޢު ކުރިއެރުވުމަށް ހިންގާ ޕްރޮޖެކްޓްތަކަށް ކެނޑިނޭޅި އެއްބާރުލުން ދެމުންނެވެ.
