އަޟްޙާ ޢީދު ދުވަހާއި ވަޅުޢީދު ދުވަހު ހަވީރު ދެ ގަޑިއިރަށް މާލޭގައި ފައިމަގުގައި އުޅޭގޮތަށް މާލޭ ސިޓީ ކައުންސިލުން ނިންމައިފިއެވެ.
އެގޮތުން އެ ކައުންސިލުން ނިންމާފައިވަނީ ޢީދު ދުވަހާއި ވަޅުޢީދު ދުވަހު ހަވީރު 4:00 އިން ފެށިގެން އިރުއޮއްސި 6:00 އާއި ހަމައަށް މާލޭގައި ދުއްވާއެއްޗެހި ނުދުއްވޭނެ ކަމަށެވެ.
މިގޮތަށް ނިންމާފައިވީނަމަވެސް ޚާއްސަ ހުއްދައިގެ ދަށުން މާލޭގައި އުޅަނދުފަހަރު ދުއްވޭނެ ކަމަށް ވަނީ ނިންމާފައެވެ.
އެ ކައުންސިލުން މިގޮތަށް ނިންމީ އެ ކައުންސިލްގެ 4 ވަނަ ދައުރުގެ 59 ވަނަ ރަސްމީ އާއްމު ޖަލްސާގައެވެ. ގަލޮޅު މެދު ދާއިރާގެ މެންބަރު ރީހާން ނާޒިމް މިގޮތަށް ހުށަހެޅުއްވުމުން އެކަން ފާސްވީ ޖައްސާގައި ބައިވެރިވި ހުރިހާ ކައުންސިލަރުންގެ އިއްތިފާޤުންނެވެ.
މީގެ ކުރިން ވެސް މިފަދަ ދުވަސްތަކުގައި ފައިމަގުގައި އުޅޭ ވަގުތުތައް ވަނީ ކަނޑައަޅާފައެވެ. އެގޮތުން މިދިޔަ ފިޠުރު ޢީދުގައި ވެސް މާލެ ސިޓީ ކައުންސިލުންވަނީ ދުއްވާއެއްޗެހި ނުދުއްވާ ވަގުތު ކަނޑައަޅާފައެވެ.
