ދިވެހި ރުފިޔާގެ ރަސްމީ ނިޝާން ތަޢާރަފްކޮށްފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ މިއަދު ތަޢާރަފްކުރި ނިޝާނަކީ 70 އަށްވުރެ ގިނަ ނިޝާންގެ ތެރެއިން ހޮވުނު ނިޝާނެއް ކަމަށެވެ. އަދި މި ނިޝާން ފާސްކުރީ އެމްއެމްއޭ އާއި ދިވެހި ބަހުގެ އެކަޑަމީގެ އޮފިޝަލުންނާއި މިފަދަ މަސައްކަތް ކުރާ އަމިއްލަ ބައެއް ފަރާތްތައް ހިމެނޭ ކޮމިޓީއަކުން ކަމަށް ވެސް ބުންޏެވެ.
ދިވެހި އަކުރުގައި ހިމެނޭ ‘ރ’ ގެ މެދުގައި އިތުރު އެއް ރޮނގުބުރި ދަމާފައިވާ ތަން ދައްކުވައިދޭ އިރު، މި ނިޝާން ފަރުމާކޮށްފައިވަނީ މ. ސްޕޮޓްލައިޓް، ހަސަން ޝުޖާއުއެވެ.
މިއީ ރާއްޖޭގައި ދިވެހި ރުފިޔާގެ ނިޝާނެއް ތަޢާރަފްކުރި ފުރަތަމަ ފަހަރެވެ.
