އައްޑޫ ފޭދޫ / ސޮލިޑް، މުހައްމަދު ޒަޔާން މޫސާ މަރުވި މައްސަލައިގައި ފުލުހުންގެ ތަހްގީގަށް ހުރަސް އެޅި ކަމުގެ ތުހުމަތުގެ މީހަކު ހައްޔަރުކޮށްފިއެވެ.
ފުލުހުން ނެރުނު ނޫސްބަޔާނެއްގައި ބުނީ ޒަޔާންގެ މަރުގެ މައްސަލައިގެ ތަހްގީގަށް ހުރަސް އަޅައި، ނުފޫޒު ފޯރުވަން އުޅުނު ކަމުގެ ތުހުމަތުގައި ކޯޓު އަމުރެއްގެ ދަށުން ހައްޔަރުކޮށްފައިވަނީ އުމުރުން 37 އަހަރުގެ ދިވެހި ފިރިހެނެކެވެ.
އެ މީހާގެ މައްޗަށް ފުލުހުން ތުހުމަތު ކުރަނީ ޒަޔާންގެ މަރުގެ މައްސަލައިގައި ހައްޔަރުކުރި ކުޑަކުއްޖަކަށް ނުރަނގަޅު ނުފޫޒު ފޯރުވުމާއި ފުލުހުންގެ ތަހްގީގަށް ހުރަސް އެޅުމާއި ފުލުހުންގެ ދައުރު އަދާ ކުރުމަށް ހުރަސްއެޅި ކަމުގެ ތުހުމަތެވެ.
އެހެނިހެން ބައެއް ފަރާތްތަކުން ވެސް ފުލުހުންގެ ތަހްގީގަށް ނުފޫޒު ފޯރުވަމުންދާކަން ފާހަގަކޮށް އެކަން ބަލައި ފިޔަވަޅު އެޅުމުގެ މަސައްކަތް ކުރަމުންދާ ކަމަށް ވެސް ފުލުހުން ބުނެއެވެ.
ޒަޔާންގެ މަރުގެ މައްސަލާގައި 18 އަހަރުން ދަށުގެ ދެ ކުއްޖަކާއެކު މިހައިތަނަށް ވަނީ ހަތް މީހަކު ހައްޔަރުކޮށްފައެވެ.
އޭގެ ތެރޭގައި ހިމެނެނީ 18 އަހަރުގެ ދަށުގެ ދެ ކުދިންނާއި 18 އަހަރާއި 28 އަހަރާ ދެމެދުގެ ފިރިހެނުން ހިމެނެއެވެ.
މީގެ ތެރެއިން ބައެއް މީހުން ޝަރީއަތް ނިމެންދެން ބަންދުކޮށްފައިވާއިރު އަނެއް ބައި މީހުންގެ ބަންދުގެ މުއްދަތު ތިން ވަނަ ފަހަރަށް ވަނީ އިތުރުކޮށްފައެވެ.
އެ މައްސަލައިގެ ތަހުގީގަށް މިހައިތަނަށް ހޯދިފައިވާ ހެއްކާ ބެހޭ ގޮތުން ޕްރޮސިކިއުޓަރ ޖެނެރަލް އޮފީހާ، ފުލުހުން މަޝްވަރާކޮށްފައިވާއިރު، ފުލުހުން ބުނެފައިވަނީ އައްޑޫ ސިޓީގައި 12 ގޭންގެއް ހަރަކާތްތެރިވަމުން އަންނަ ކަމަށެވެ.
ޕޮލިސް ކޮމިޝަނަރު މުޙައްމަދު ހަމީދު ވިދާޅުވެފައިވަނީ ކުށްތަކަށް އަރައިގަންނަ ގުރޫޕުތަކުގެ އިތުރުން އައްޑޫގައި މަސްތުވާތަކެތީގެ މައްސަލައާއި ކުދި ކުށްތައް ކުރާ މީހުންގެ މައްސަލަ ވެސް ބޮޑުވެފައިވާ ކަމަށެވެ.
