ސީރިޔާ (ސޫރިޔާ) ގެ ހަސަކާގައި ހުންނަ އިސްލާމިކް ސްޓޭޓް (އައިސިސް) ގެ އެންމެ ގިނަ ހަނގުރާމަވެރިން ބަންދުކޮށްފައިވާ ޣުވައިރާން ޖަލަށް އެޖަމާއަތުން ދިން ހަމަލާއަށްފަހު އެ ޖަމާއަތާ ސިރީޔާގައި އެމެރިކާގެ ތާއީދު ލިބިގެން ހަނގުރާމަކުރާ ސީރިޔަން ޑިމޮކްރެޓިން ފޯސަސް (އެސްޑީއެފް) އާ ދެމެދު ފެށުނު ހަނގުރާމަ އަދިވެސް ނުހުއްޓެއެވެ.
އައިސިސްގެ 3500 އެއްހާ ހަނގުރާމަވެރިން ބަންދުކޮށްފައިވާ ޖަލަށް ދެ ކާރު ބޮން ބޭނުންކޮށްގެން ބުރާސްފަތި ދުވަހުގެރޭ ދިން ހަމަލާއަށް ފަހު އެ ޖަމާއަތުން ވަނީ ގައިދީންގެ ގިނަ ބަޔަކު މިނިވަންކޮށް ޖަލުގައި ރައްކާކޮށްފައި ހުރި ގިނަ އަދަދެއްގެ ހަތިޔާރުވެސް ނަގާފައެވެ. މިއީ، ސީރިޔާގައި އައިސިސް ބަލިކުރެވިފައިވާކަން މީގެ 3 އަހަރުކުރިން އިއުލާންކުރުމަށްފަހު އެޖަމާއަތުން ސީރިޔާގައި ދިން އެންމެ ވަރުގަދަ ހަމަލާއެވެ.
ކުރުދީ ހަނގުރާމެރިން އިސްކޮށް ހަރަކާތްތެރިވާ އެސްޑީއެފުން ޖަލުން ފިލި ގިނަ ގައިދީންތަކެއް އަތުލި ނަމަވެސް، އަދިވެސް ގިނަ އަދަދެއްގެ ގައިދީން ވަނީ ނުފެނިއެވެ.
ޖަލުގެ ކޮންޓުރޯލު އަތުލުމަށް އައިސިސްއާއި އެސްޑީއެފް ހަނގުރާމަކުރާތާ ތިން ދުވަސް ވެފައިވާއިރު، އެސްޑީއެފުން ބުނި ގޮތުގައި މި ހަނގުރާމައިގައި ދެ ފަރާތުގެ ގިނަ އަދަދެއްގެ ބަޔަކު ވަނީ މަރުވެފައެވެ. އެސްޑީއެފުން މައުލޫމާތު ދޭގޮތުގައި މަރުވި މީހުންގެ ތެރޭގައި ހިމެނެނީ އައިސިސްގެ 160 މީހުންނާއި، އެސްޑީއެފްގެ 27 މީހުންނެވެ.
މީގެ އިތުރަށް އެސްޑީއެފުން ބުނި ގޮތުގައި ޖަލުގެ ކޮންޓުރޯލް އަތުލަން އެޖަމާއަތުން ކުރާ ހަނގުރާމައިގައި އެންމެ ބޮޑު ހުރަކަށް ވެފައި ވަނީ އައިސިސްގެ ހަނގުރާމަވެރިން އިންސާނީ އައްޑަނައިގެ ގޮތުގައި 600 އެއްހާ ކުޑަކުދިން ބޭނުންކުރުމެވެ.
މި ކުޑަކުދިންނަކީ ޖަލުގެ ވަކި ބައެއްގައި ހުރި ރިހެބިލިޓޭޝަން ސެންޓަރެއްގައި ތިބި ކުދިންނެވެ. އައިސިސްގެ ހަނގުރާމަވެރިން މިހާރު ވަނީ މި ކުދިން ކުރީ ސަފަށް ނެރެ އައްޑަނައިގެ ގޮތުގައި ބައިތިއްބާފައެވެ.
"ސީރިޔަން ޑިމޮކްރެޓިކް ފޯސަސްއިން ދެކޭ ގޮތުގައި ޖަލުގައި ތިބި ކުޑަކުދިންނަށް ވާ ކޮންމެ ގެއްލުމެއްގެ ޒިންމާ އުފުލަން ޖެހޭނީ އައިސިސްގެ ޓެރަރިސްޓުން." އެސްޑީއެފުން ނެރުނު ބަޔާނެއްގައި ވެއެވެ.
އެމެރިކާއިން ވަނީ އެސްޑީއެފަށް އެހީވުމުގެ ގޮތުން ހަސަކާއަށް ހަނގުރާމަމަތީ ހެލިކޮޕްޓަރު ފޮނުވައިގެން ޖަލުގައި ތިބި އައިސިސްގެ ހަނގުރާމަވެރިންނަށް ވައިގެ ހަމަލާދީފައެވެ.
"ކޯލިޝަނުން ވަނީ ޖަލުގައި ތިބި ގައިދީންނާ އިންސާނިއްޔަތުކަމާއެކު މުއާމަލާތްކުރުމަށް ވީވަރަކުން މަސައްކަތްކޮށްފައި. އެހެންނަމަވެސް، އެމީހުން ހަތިޔާރު އެފުލި ހިސާބުން އެމީހުން ވަނީ އަމަލީ ނުރައްކަލަކަށް ވެފައި. އެހެންކަމުން، އެމީހުންނަށް ހަމަލާދީ، ކޯލިޝަނާއި އެސްޑީއެފްގެ ވައިގެ ހަމަލާތަކުން އެމީހުން މަރާލެވޭނެ." އިރާގާއި ސީރިޔާގައި ހަރަކާތްތެރިވާ އައިސިސްއާ ދެކޮޅު ކޯލިޝަންގެ ކޮމާންޑަރު މޭޖާ ޖެނެރަލް ޖޯން ބްރެނަން ވިދާޅުވިއެވެ.
ދިހަ އަހަރަށްވުރެ ދިގު މުއްދަތަކަށް ދެމިގެން ގޮސްފައިވާ ސީރިޔާގެ ދާޚިލީ ހަނގުރާމައިގައި ސީރިޔާގެ އިރުއުތުރު ސަރަހައްދު ކޮންޓުރޯލު ކުރަމުން އައިސްފައި ވަނީ ކުރުދީ ހަނގުރާމަވެރިން އިސްވެ ހަރަކާތްތެރިވާ އެސްޑީއެފުންނެވެ. އެ ސަރަހައްދުގެ އެކި ޖަލުތަކުގައި 10 ހާހަށްވުރެ ގިނަ އައިސިސް ހަނގުރާމަވެރިން ބަންދުކޮށްފައި އެބަތިއްބެވެ. މި ޖަލުތައް ތޮއްޖެހިފައިވާއިރު، ރައްކާތެރިކަމުގެ ގޮތުން ވަރުގަދަ ފިޔަވަޅުތަކެއް ވެސް އެޅިފައި ނުވެއެވެ.
