އަޙްމަދަކީ ކޮންމެވެސް ވަރަކަށް ވަޑާންކޮށްއުޅޭ މީހެކެވެ. އޭރު އަޙްމަދު އޮފީހުން އައިސް ކުރާ މަސައްކަތަކީ ، އޭނާ ހަދަމުންގެންދާ 8 ބުރީގެ ގެ އެކި ގްރޫޕްތައް ގެނެސް ނިންމުމުގެ މަސައްކަތެވެ. ކޮންމެ ދުވަހަކުވެސް ، އޮފީސް ނިންމާފަ އައިސް ސޯޓުބުރިލައިގެން ، ކުރަންވެފައި އޮތް ، ގޭގެ ކޮންމެވެސް ކަމެއް ކޮށްލައެވެ.
ކޮންމެ ދުވަހެއްގެވެސް އާދައިގެ މަތިން ، އަޙްމަދު އޮފީހުން އައިސް ، އަވަސްވެގަތީ ކުރީދުވަހު ސީލިންކުރަންފަށައި ނުނިމިހުރި ބައި ނިންމައި ލުމުގެ މަސައްކަތަށެވެ. ހަރުގަނޑެއް ހިފައިގެން އައިސް ، އެއަށް އަރައި ސީލިންގ ތޮރުފާލަން އުޅުނެވެ. ބުރުމާގެ ކަށި އެހައި ތޫނެއްނޫނެވެ. އެހެންނަމަވެސް ، އެވަގުތު އެހެން ކައްޓެއް ހޯދަން ބޭރަށް ނުކުމެގެން ދާކަށް އަޙްމަދު ބޭނުމެއް ނުވިއެވެ.
ކަށި ކޮށިކަމުން އަތަށް ލެވުނުބާރެއްލާފައި ބުރުމާ ހިންގާލިތަނުން ބިންދައިގެން އެދިޔައީ ކަށްޓެވެ. ހަމައެކަނި ކަށި ބިންދައިގެން ދިޔައީކީ ނޫނެވެ. އަޙްމަދުވެސް ، އަރާހުރި ހަރުގަނޑުން ސީޓުމައްޗަށް ވެއްޓުނެވެ. ހަރުގަނޑުން ވެއްޓުނު ގޮތުން ސީޓުގައި ވިދުނީ އޭނާގެ ކަނާތު ފަޔެވެ. އެފަޔަކީ ، ކުޑައިރު ބޯޅޅަކުޅެން އުޅެނިކޮށްވެސް އަނިޔާ ލިބިފައި އޮތް ފަޔެކެވެ. ކަކުހުޅަށް ދޭތެރެ ދޭތެރެއިން ތަދުވާތީ އުޅެއެވެ. އެހެންކަމުން ، އެކަކުލަށް އެވީތަދަކުން އަޙްމަދުގެ ހޭނުނެތުނީ ކިރިޔާއެވެ. ވީތަދުބޮޑުކަމުން އަޙްމަދަށް ތެދުވެވޭގޮތެއްވެސް ނުވިއެވެ. ބާރަކަށް ރޮޔެއްވެސް ނުގަނެވުނެވެ. ކުކުރާލަ ކުކުރާލަ އޮތީއެވެ. އެއީ އެގޭގެ 6 ވަނަ ފްލޯރ އެވެ.
އަޙްމަދު އެހެން އޮއްވައި ، މައްޗަށް ދިޔަ ކުއްޖަކަށް މީހަކު ކުކުރާ އަޑުކަހަލަ އަޑެއް އިވިގެން 6 ވަނަ ފްލޯރ ގެ އެތެރެޔަށް ބޯދިއްކޮށްލިއެވެ. ރާނާފައި ހުއްޓަސް އަދި ހުރީ ދޮރު ހަރުނުކޮށެވެ. އެހެންކަމުން ، ކުކުރާލަ ކުކުރާލަ އޮތް އަޙްމަދު ، ދާދި ފަސޭހައިން އެކުއްޖާއަށް ފެނުނެވެ. އަޙްމަދު ދިރިއުޅެނީ އެގޭގެ 7 ވަނަ ފްލޯ ހަދައިގެން އެބައިގައެވެ. އެއީ ޓެރަސް ފްލޯރވެސް މެއެވެ.
މައްޗަށްދާން އެރި ކުއްޖާއަށް އަޙްމަދު ވެއްޓިފައޮތްތަން ފެނިފައި ، އެހެން ކުއްޖަކަށް ފޯނުކޮށްގެން ގެނެސް ، 6 ވަނަ ފްލޯރއަށް އަޙްމަދު ގެންދިއުމުގެ މަސައްކަތް ފެށިއެވެ. އަތުލަފިކޮށްގެން ، ނަގައިގަނެގެން ގެންގޮސް 6 ވަނަ ފްލޯރއާ ހިސާބަށް އެރުނުއިރު ، އަޙްމަދުގެ އަންހެނުންނަށްވެސް މިޚަބަރު އޮތީ ލިބިފައެވެ. އެހެންނަމަވެސް ކޮޓަރިތެރޭ ކަމެއްކުރަން އުޅޭތީ ، އަޙްމަދު ގެނައި އިރު ނުކުމެވޭ ގޮތެއް ނުވިއެވެ.
6 ވަނަ ފްލޯރ އަށް އަޙްމަދު ގެނައިތަނުން އެންމެ ފުރަތަމަ ދިމާވީ އޭނާގެ ފިރިހެން ދަރިފުޅާއެވެ. ބައްޕަ ރޯން އޮތްތަން ބަލައިލާފަ ، ދުވެފަގޮސް ، މަންމަގާތު އޭނާ ބުންޏެވެ.
" ނަޞީބަކުން ، ބައްޕަ އަދި މަރެއް ނުވެއެވެ. "
