ނިއުޒީލޭންޑުގެ އާ ކެބިނެޓުގައި ތަފާތު ނަސްލުތަކުގެ ބޭފުޅުން

ނިއުޒީލޭންޑްގެ ބޮޑުވަޒީރު ޖަސިންޑާ އާޑާން އާ ދައުރަކަށް ހޮވިވަޑައިގެން އެކުލަވާލެއްވި ކެބިނެޓުގައި އެގައުމުގެ ތަފާތު ނަސްލުތަކަށް ނިސްބަތްވެވަޑައިގަންނަވާ ގިނަ ބޭފުޅުންތަކެއް ހިމަނުއްވައިފިއެވެ.

ބޮޑުވަޒީރުގެ ނާއިބަކަށް އެކަމަނާގެ އަރިސް ބޭފުޅެއް ކަމުގައިވާ ގްރާންޓް ރޮބަޓްސް އައްޔަންކުރެއްވިއިރު، އޭނާއާ ވަނީ ފިނޭންސް މިނިސްޓްރީވެސް ހަވާލުކުރައްވާފައެވެ.  

މިފަހަރު ފޮރިން މިނިސްޓަރުކަން ދެއްވާފައި ވަނީ މާއޯރީ ނަސްލުގެ ބޭފުޅެއް ކަމުގައިވާ ނަނާއިޔާ މަހުޓާއަށެވެ. އޭނާއަކީ ނިއުޒީލޭންޑުގެ ފުރަތަމަ އަންހެން ޚާރިޖީ ވަޒީރެވެ. އޭނާއަކީ މައޯރީ ޓޭޓޫ 'މޯކޯ' ޖައްސަވައިގެން ނިއުޒީލޭންޑުގެ ގާނޫނުހަދާ މަޖިލީހަށް ވެންނެވި ފުރަތަމަ މެންބަރެވެ. މިފަހަރު އިންޓާނަލް އެފެއާޒް މިނިސްޓަރުކަންވެސް ދެއްވާފައި ވަނީ އަންހެން ބޭފުޅަކަށެވެ. އެއީ 2017 އިން ފެށިގެން ގާނޫނުހަދާ މަޖިލީހުގައި ޓައުރަންގާ ތަމްސީލުކުރައްވާ ލޭބާ ޕާޓީގެ މެންބަރެއްގެ ގޮތުގައި ހުންނެވި ޖޭން ޓިނެޓީއެވެ.

އާ ކެބިނެޓުގައި ދިވެހި އާއިލާއަކަށް ނިސްބަތްވެވަޑައިގަންނަވާ އާއިޝާ ވެރާލްވެސް ހިމެނިވަޑައިގަންނަވައެވެ. އޭނާއަކީ މިނިސްޓަރ ފޯ ފުޑް ސޭފްޓީއެވެ. އޭނާއަކީ ދިވެހި މަންމައަކާ ނިއުޒީލޭންޑު ބައްޕައަށް ނިއުޒީލޭންޑުގައި އުފަންވެވަޑައިގަތް ބޭފުޅެކެވެ. ފުޑް ސޭފްޓީ މިނިސްޓަރުގެ އިތުރަށް އޭނާއަކީ މިނިސްޓަރ ފޯރ ސީނިއާސް އަދި އެސޯސިއޭޓް މިނިސްޓަރ އޮފް ހެލްތު އަދި އެސޯސިއޭޓް މިނިސްޓަރ އޮފް ރިސާޗް، ސައިންސް އެންޑް އިމޮވޭޝަންސްވެސް މެއެވެ.

އާ ޑިފެންސް މިނިސްޓަރަކީ ވެސް މާއޯރީ ނަސްލުގެ ބޭފުޅެކެވެ. އެއީ ޕީނީ ހެނާރޭއެވެ.

އިންޑިޔާގެ ކެރެލާއަށް ނިސްބަތްވެވަޑައިގަންނަވާ އަންހެން ބޭފުޅަކަވެސް މިނިސްޓަރުކަން ދެއްވާފައި ވެއެވެ. ޗެންނާއީއަށް އުފަން ޕްރިޔަންކާ ރާދަކްރިޝްނަންއަށް ދެއްވާފައި ވަނީ މިނިސްޓަރ ފޯ ދަ ކޮމިއުނިޓީ އެންޑް ވޮލަންޓަރީ ސެކްޓަރގެ މަގާމެވެ.

އާ ކެބިނެޓުގައި ޖަސްޓިސް މިނިސްޓަރުކަން ދެއްވާފައި ވަނީ ޕޮލިނޭޝިޔަން ދަރިކޮޅަށް ނިސްބަތްވެވަޑައިގަންނަވާ ކްރިސް ފާފޮއިއަށެވެ. އާ ޑިފެންސް މިނިސްޓަރަކީ މާއޯރީ ބޭފުޅެއް ކަމުގައިވާ ޕީނީ ހެނާރޭ އެވެ.

ބޮޑުވަޒީރު ޖަސިންޑާ އާޑާންއާ ބޮޑުވަޒީރުގެ ނާއިބު ގްރާންޓް ރޮބަޓްސްއާއެކު ޖުމްލަ 20 ބޭފުޅުން ހިމެނިވަޑަގަންނަވާ ކެބިނެޓުގައި، މިނިސްޓަރ ފޯ ކޮންޒަވޭޝަންގެ މަގާމު ދެއްވާފައި ވަނީ މާއޯރި ދަރިކޮޅެއް ބޭކަނބަލެއް ކަމުގައިވާ ކިރީ އެލަންއަށެވެ.

ކޮވިޑް- 19 އާ ދެކޮޅަށް ހަނގުރާމަކުރުމުގައި އެންމެ ކާމިޔާބު އެއް ގައުމުކަމަށް ނިއުޒީލޭންޑު ފާހަގަކުރެވޭއިރު، ބޮޑުވަޒީރު އާޑާން އަލަށް އެކުލަވާލެއްވި ސަރުކާރުގައި ކޮވިޑް- 19 އަށް ޚާއްސަ މިނިސްޓްރީއެއް އުފައްދަވައި، މިނިސްޓަރ ފޯ ކޮވިޑް-19 ރެސްޕޮންސްގެ މަގާމަށް އައްޔަން ކުރައްވާފައި ވަނީ ކްރިސް ހިޕްކިންސްއެވެ. ކުރީގެ ކެބިނެޓްގައި އޭނާ ހުންނެވީ މިނިސްޓަރ އޮފް ހެލްތުގެ މަގާމުގައެވެ. މިފަހަރު ހެލްތު މިނިސްޓަރުކަން ދެއްވާފައި ވަނީ ކުރިން ޖަސްޓިސް މިނިސްޓަރު ކަމުގައި ހުންނެވި ކްރިސް ލިޓްލްއަށެވެ.

ބޮޑުވަޒީރު އާޑާން ވަނީ ނިއުޒީލޭންޑުގައި ފާއިތުވި އޮކްޓޯބަރު މަހުގައި ނިއުޒީލޭންޑުގައި ބޭއްވި އާއްމު އިންތިޚާބު ބޮޑު ތަފާތަކުން ކާމިޔާބުކުރައްވާފައެވެ. ކޮވިޑް- 19 ކޮންޓުރޯލުކުރެއްވަށް ގެންގުޅުއްވި ސިޔާސަތާއި، ކްރައިސްޓްޗާޗުގެ މިސްކިތްތަކަށް ދިން ޓެރަރިސްޓް ހަމަލާއަށް ފަހު މުސްލިމުންނާ މެދު ގެންގުޅުއްވި ސިޔާސަތުގެ ސަބަބުން އޭނާގެ މަގުބޫލުކަން ވަނީ އިތުރުވެފައެވެ. އެހެންނަމަވެސް، މިފަހަރުގެ ކެބިނެޓްގައި މުސްލިމަކު ހިމަނުއްވާފައި ނުވާކަން ފާހަގަކުރެވެއެވެ.

ނިއުޒީލޭންޑްގެ އާ ކެބިނެޓް ހުވައިކުރުން އޮންނާނީ އަންނަ ހުކުރު ދުވަހުއެވެ.