(30 އޯގަސްޓް 2020 ގައި ޝާއިއުކުރި ބަޔާ ގުޅޭ)
"ކުރިއަކުން އެއްވެސް އަންހެންކުއްޖަކު ނާދޭ- އެކަމަކު ވަރަށް ފަހުން ކޮންމެވެސް އަންހެންކުއްޖަކު އޭނާއާ އެކީ އުޅޭ ތަން އަޅުގަނޑަށް ފެނޭ-"
"އެ ކުއްޖެއްގެ ނަން އެނގިވަޑައިގަނޭތޯ-؟"
"އާދެ- އެ ކުއްޖާގެ ނަމަކީ އެލެޓް ޕީޓަރސް-"
ބްރެނަންގެ މޫނުމަތިން ޙައިރާންކަމުގެ އަސަރު ފެނުނެވެ. "އެލެޓް ޕީޓަރސް އޭތޯ-؟ އެއީ ހަމަ ރަނގަޅު ނަންކަން ކަށަވަރުތޯ-؟"
"އާދެ- އަޅުގަނޑު ގާތު އެ މީހުން ބުނި ނަމަކީ އެއީކަން ހަމަކަށަވަރު-"
"މި ކޯޓުން މިހާރު އެ އަންހެންކުއްޖާ އެބަ ފެނިވަޑައިގަނޭތޯ-؟"
"އާދެ-" އޭނާ އޭޝްލީއާ ދިމާއަށް އިނގިލިން އިޝާރާތްކޮށްލިއެވެ. "އެހެރަ ގޮނޑީގައި އެ އިނީ އޭނާ-"
ބްރެނަން ބުނެލިއެވެ. "އެއީ އެލެޓް ޕީޓަރސްއެއް ނޫން- އެއީ އޭޝްލީ ޕެޓަރސަން-"
ޑޭވިޑް ތެދުވެއްޖެއެވެ. "ޢިއްޒަތްތެރި ފަނޑިޔާރު- އެލެޓް ޕީޓަރސްއަކީ އޭޝްލީ ޕެޓަރސަންގެ ހަށިގަނޑުގައި އުޅޭ އެހެން ޝަޚްސިއްޔަތެކޭ އަޅުގަނޑު ކުރިން ވެސް ދެންނެވިން- އެއީ..."
"މިސްޓަރ ސިންގަރ- މިހާރު ތިޔަ ވަޑައިގެންނެވެނީ ހުދޫދުން ބޭރަށް- މިސްޓަރ ބްރެނަން- ކުރިއަށް ގެންދަވާ-"
"މިސްޓަރ ހިލް- ތިޔަ ވިދާޅުވަނީ ރިޗަރޑް މެލްޓަންއަށް އެލެޓް ޕީޓަރސްގެ ގޮތުގައި ފެނި، ރައްޓެހިވީ ކުއްޖަކީ މި ތާނގައި އޭޝްލީ ޕެޓަރސަންގެ ނަމުގައި ތަޢާރަފްކުރެވުނު ކުއްޖާއޭތޯ-؟"
"އާދެ-"
"އެ ދެ ނަމުގައި މި އުޅެނީ ހަމަ އެއްކުއްޖެއްކަމާ މެދަކު ޝައްކެއް ނެތްތޯ-؟"
ބްރަޔަން ހިލް ހިސާބަކަށް ޖެހިލުންވިއެވެ. "އާދެ... އެއީ... ދެ ނަމެއް- އަޅުގަނޑަށް ފެނުނީ އެކަކުކަން ޔަގީން-"
"ރިޗަރޑް މެލްޓަން މަރައިލި ދުވަހު އޭނާއާ އެކީ އެ އަންހެންކުއްޖާ އުޅެނިކޮށް ދެކެވަޑައިގަތިންތޯ-؟"
"އާދެ-"
"ޝުކުރިއްޔާ-" ބްރެނަން ޑޭވިޑާ ދިމާއަށް ބަލައިލިއެވެ. "އަޅުގަނޑުގެ އިތުރު ސުވާލެއް ނެތް-"
ޑޭވިޑް ތެދުވެގެން މަޑުމަޑުން ހިނގައިފައި ގޮސް ހެކިންގެ ކޮށިގަނޑުގެ ކައިރިއަށް ހުއްޓިއްޖެއެވެ. "މިސްޓަރ ހިލް- އެތައް މިލިއަން ޑޮލަރެއްގެ އަގު ހުރި ތަކެތި ބަހައްޓައިފައި ހުންނަ ތަނެއްގެ ފާރަވެރިއަކަށް ހުންނެވުމަކީ ވަރަށް ބޮޑު ޒިންމާއަކަށް ވާނޭ ކަމަށް އަޅުގަނޑަށް ގަބޫލުކުރެވޭ-"
"އާދެ- އެއީ ވަރަށް ބޮޑު ޒިންމާއެއް-"
"ރަނގަޅު ފާރަވެރިއަކަށް ވެވޭނީ ފާރައަށް ހުންނަ ހުރިހާ ވަގުތަކު ފިސާރި ރަނގަޅަށް ލޯހުޅުވައިގެން ސަމާލުވެ ހުރެގެން- އެހެންނޫންތޯ-؟"
"އާދެ-"
"އެ ތާނގައި ހިނގާ ހުރިހައި ކަމެއް ފާރަވެރިޔާއަށް ފެންނަންވާނެ- އެނގެންވާނެ- އެހެންނޫންތޯ-؟"
"އާދެ-"
"އެ ވަޒީފާ އަދާކުރައްވަން ފެށްޓެވީ ކަންތައްތައް ރަނގަޅަށް ބެލެހެއްޓުމުގެ ނުވަތަ ފެންނަ ކަމެއް ރަނގަޅަށް ވިސްނައިގަތުމުގެ ތަމްރީނު ހޯއްދަވައިގެންތޯ-؟"
"އާދެ- އަޅުގަނޑުގެ ހުޝިޔާރުކަން ވަކި އެހެން މީހަކަށް ވުރެ ކުޑައެއް ނުވާނެ-"
"އަޅުގަނޑު މި ސުވާލު މި ދެންނެވީ ސަބަބެއް އޮވެގެން- ދާދި ދެންމެއަކު ދައުލަތުގެ ޢިއްޒަތްތެރި ވަކީލު ކުރެއްވި ސުވާލަކާ ގުޅިގެން- ރިޗަރޑް މެލްޓަންއާ އެކީ މިއުޒިއަމަށް ދާ އަންހެންކުއްޖަކީ އޭޝްލީ ޕެޓަރސަންތޯ ދެންމެ މިސްޓަރ ބްރެނަން ސުވާލުކުރެއްވި- އެ ސުވާލަށް ޖަވާބުދެއްވި އިރު ހިސާބަކަށް ޖެހިލުންވެވަޑައިގަތް ކަމަށް އަޅުގަނޑަށް ފާހަގަކުރެވުނު- އެއީ ކަށަވަރުވެވަޑައި ނުގަންނަވާތީތޯ-؟"
ހިލް އިރުކޮޅަކު ހިމޭނުން ހުރެފައި ބުނެލިއެވެ. "އެ އަންހެންކުއްޖާޔާ އޭޝްލީ ޕެޓަރސަންއާ ވަރަށް ވައްތަރު- އެކަމަކު ބައެއް ކަންކަމުގައި ތަފާތު ވެސް އެބަހުރި-"
"އެއީ ކޮން ކަންކަމެއްތޯ-؟"
"އެލެޓް ޕީޓަރސް ވައްތަރީ އިޓަލީ ކުއްޖަކާ- ވާހަކަދައްކަނީ ވެސް އިޓަލީ ރާގުގައި- އަދި އޭޝްލީއަށް ވުރެ މާ ޅަ ހެންވެސް ހީވޭ-"
"ތިޔަ ވިދާޅުވީ ރަނގަޅަށް- ސެން ފްރެންސިސްކޯއިން ފެނިވަޑައިގަތް އަންހެންކުއްޖަކީ އޭޝްލީ ޕެޓަރސަންގެ ހަށިގަނޑުގައި އުޅޭ އެހެން ކުއްޖެއް- އެ ކުއްޖާ ވިހެއީ ރޯމަށް- އެއީ އޭޝްލީއަށް ވުރެ އަށް އަހަރު ހަގު ކުއްޖެއް..."
ބްރެނަން ތެދުވެއްޖެއެވެ. އޭނާ ހުރީ ރުޅިއައިސް ރަތްވެފައެވެ. "އަޅުގަނޑު ދެކޮޅުހަދަން-"
ޑޭވިޑް ފަނޑިޔާރު ވިލިއަމްސްއާ ދިމާއަށް ބަލައިލިއެވެ. "ޢިއްޒަތްތެރި ފަނޑިޔާރު- އަޅުގަނޑު..."
"ތިޔަ ދެ ބޭފުޅުން މި ތަނަށް، އަޅުގަނޑުގެ މޭޒުކައިރިއަށް ވަޑައިގަންނަވާ-"
ޑޭވިޑާއި، ބްރެނަންއާ ދެ މީހުން ކައިރިއަށް ދިޔައީމާ ފަނޑިޔާރު ވިލިއަމްސް ބުނެލިއެވެ. "މިސްޓަރ ސިންގަރ- އަޅުގަނޑު ދެން މި ވާހަކަ ތަކުރާރެއް ނުކުރާނަން- މައްސަލައާ ބެހޭ ގޮތުން ވަކި ގޮތެއް ނިންމައި އެ ވާހަކަދެއްކުމަކީ ފަހުގެ ކަމެއް- ދަޢުވާކުރާ ފަރާތުން ދަޢުވާ ފުރިހަމައަށް ހުށަނާޅަނީސް ދެންމެ ތިޔަ ދެއްކެވި ކަހަލަ އެއްވެސް ވާހަކައެއް ދައްކަވައިގެން ނުވާނެ-"
ހެކިންގެ ކޮށިގަނޑުގައި މިހާރު ހުރީ ބާރނިސް ޖެންކިންސްއެވެ.
"މިސް ޖެންކިންސް- ކުރައްވަނީ ކޮން މަސައްކަތެއްތޯ-؟"
"ވެއިޓަރުކަން-"
"ކޮން ތަނެއްގައިތޯ-؟"
"ޑީ ޔަންގް މިއުޒިއަމްގެ ކެފޭގައި-"
"ރިޗަރޑް މެލްޓަންއާ އެއްވެސް ކަހަލަ ގުޅުމެއް އޮވޭތޯ-؟"
"އާދެ- އެއީ އަޅުގަނޑުގެ ރައްޓެއްސެއް-"
"ތަންކޮޅެއް ތަފްސީލުކޮށް ވިދާޅުވެދެއްވަފާނަންތޯ-؟"
"އެއް ދުވަސްވަރެއްގައި އަޅުގަނޑުމެން ދެ މީހުންގެ ދެމެދުގައި ލޯބީގެ ގުޅުމެއް ވެސް އޮތް- އެކަމަކު ދުވަސްކޮޅަކުން އެ ގުޅުން ބަދަލުވެގެން ހިނގައްޖެ- އެއީ އެ ކަހަލަ ކަންތައްތައް ހިނގާ ގޮތެއް ނޫންތޯ-؟"
"އާދެ... އާދެ... ދެން ވީ ކިހިނެއްތޯ-؟"
"ދެން އަޅުގަނޑުމެން ދެ މީހުން އެއްބަނޑު އެއްބަފާ ބައެއްގެ ގޮތުގައި އުޅެން ފެށީ... މި ދެންނެވީ އަޅުގަނޑުމެން ދެ މީހުން ޒާތީ ސިއްރުވެރިންނަށް ވީއޭ- އެކަކު އަނެކެއްގެ ވާހަކަދައްކައި މަޝްވަރާކޮށް ހަދަން ފެށީއޭ- ފަހުން އޮތް ގުޅުމަކީ އެއީ-"
"މި ތާނގައި މުލްޒިމެއްގެ ގޮތުގައި އެހެރަ އަންހެންކުއްޖާގެ ވާހަކަ ދުވަހަކުވެސް ދެކެވުނުތޯ-؟"
"އާދެ- އެކަމަކު އޭނާ އެ ކުއްޖާއަށް ކިޔަނީ އެހެން ނަމެއް-"
"އެއީ ކޮން ނަމެއްތޯ-؟"
"އެލެޓް ޕީޓަރސް-"
"އެކަމަކު އެ ކުއްޖާގެ ނަމަކީ އޭޝްލީ ޕެޓަރސަންކަން ރިޗަރޑް މެލްޓަންއަށް އެނގޭތޯ-؟"
"ނޫން- ނޭނގޭ- އޭނާ ހީކުރަނީ އެ ކުއްޖާއަށް ކިޔާ ނަމަކީ އެލެޓް ޕީޓަރސް ކަމަށް-"
"ތިޔަ ވިދާޅުވަނީ އޭޝްލީ އޭނާއަށް ދޮގުހެދީއޭތޯ-؟"
ޑޭވިޑް ފުންމައިގެން ތެދުވެއްޖެއެވެ. "އަޅުގަނޑު ދެކޮޅުހަދަން-"
"މިސްޓަރ ބްރެނަން- މައްސަލައާ ބެހޭ ގޮތުން ގޮތެއް ނިންމެވުން ފަހަށް ބާއްވަވާށޭ އަޅުގަނޑު ކުރިންވެސް ދަންނަވައިފިން-"
"މަޢާފްކުރައްވާ- ޢިއްޒަތްތެރި ފަނޑިޔާރު-" ބްރެނަން ބުނެލިއެވެ. "އޭނާ އެލެޓް ޕީޓަރސްގެ ވާހަކަދެއްކި ކަމަށް ދެންމެ ވިދާޅުވެއްޖައީމު- އެ ދެ މީހުން އެކީގައި އުޅެނިކޮށް ދެކެވަޑައިގަތިންތޯ-؟"
"އާދެ- އެއްދުވަހަކު އޭނާ ގޮވައިގެން އަޅުގަނޑު މަސައްކަތްކުރާ ކެފޭއަށް އައިސް އަޅުގަނޑަށް ތަޢާރަފްކޮށްދިން-"
"ތިޔަ ވިދާޅުވަނީ އޭޝްލީ ޕެޓަރސަންގެ ވާހަކަތޯ-؟"
"އާދެ- އެކަމަކު އެ ދުވަހު އޭނާ ނަމަކަށް ބުނީ އެލެޓް ޕީޓަރސްއޭ-"
މިހާރު ހެކިންގެ ކޮށިގަނޑުގައި އެހެރީ ގެރީ ކިންގްއެވެ.
ބްރެނަން އަހައިލިއެވެ. "ތިޔައީ ރިޗަރޑް މެލްޓަންއާ އެއް ކޮޓަރިއެއްގައި އުޅުއްވާ ބޭފުޅެއް- އެހެންނޫންތޯ-؟"
"އާދެ-"
"އޭނާއަކީ ރައްޓެއްސެއްތޯ-؟ އެއްވެސް ތަނަކަށް އޭނާއާ އެކީ ބޭރަށް ވަޑައިގަންނަވަންތޯ-؟"
"އާދެ- އަޅުގަނޑުމެން ދެ މީހުން އެއް ކުއްޖެއްގެ ގާތަށް ވެސް ދަން- ދެ މީހުން ދެ ފަހަރު-"
"މިސްޓަރ މެލްޓަން ވަކިކުއްޖަކާ އެކު ޚާއްޞަ ގުޅުމެއް ބޭއްވިކަން އެނގިވަޑައިގެންފައި އެބަ އޮތްތޯ-؟"
"އާދެ-"
"އެ ކުއްޖެއްގެ ނަން އެނގިވަޑައިގަނޭތޯ-؟"
"އެ ކުއްޖަކު ބުނާ ގޮތުން ވިއްޔާ ނަމަކީ އެލެޓް ޕީޓަރސް-"
"މި ކޯޓުން އެ ކުއްޖާ އެބަ ފެނިވަޑައިގަނޭތޯ-؟"
"އާދެ- އެހެރަ ގޮނޑީގައި އިށީނދެގެން އެ އިނީ އެ ކުއްޖާ-"
"ތިޔަ އިޝާރާތްކުރައްވަނީ އޭޝްލީ ޕެޓަރސަންއަށްތޯ-؟"
"އާދެ-"
"ރިޗަރޑް މެލްޓަން މަރައިލި ރޭ ގެއަށް ވަޑައިގެންނެވި އިރު އޭނާ އޮތީ މަރައިލައިފައި- އެހެންނޫންތޯ-؟"
"އާދެ- އަޅުގަނޑަށް އާދެވުނީ އޭނާ މަރައިލި ފަހުން-"
"އޭނާ އޮތީ ކޮންކަހަލަ ޙާލަތެއްގައިތޯ-؟"
"ލެއިން ތަތްތެޅިފައި-"
"ޖިންސީ ގުނަވަން އޮތީ ބުރިކޮށްލައިފައިތޯ-؟"
"އާދެ- އެއީ ވަރަށް ރަހުމްކުޑަ ޢަމަލެއް-"
ބްރެނަން ޖޫރީއާ ދިމާއަށް ބަލައިލިއެވެ. އޭނާ ބޭނުންވާ ކަހަލަ އަސަރެއް އެ މީހުންނަށް ކުރޭތޯ ބަލައިލަން ވެގެންނެވެ. އޭނާއަށް ފެނުނު މަންޒަރަކީ ހިތްހަމަޖެހޭ ކަހަލަ މަންޒަރަކަށް ވިއެވެ.
"ޝުކުރިއްޔާ-" ބްރެނަން ޑޭވިޑާ ދިމާއަށް ބަލައިލިއެވެ. "އަޅުގަނޑުގެ އިތުރު ސުވާލެއް ނެތް-"
ޑޭވިޑް ތެދުވެގެން ހެކިންގެ ކޮށިގަނޑުގެ ކައިރިއަށް ހިނގައްޖެއެވެ.
"ރިޗަރޑް މެލްޓަންއަކީ ކޮންކަހަލަ މީހެއްތޯ-؟"
"އެއީ ވަރަށް ރަނގަޅު މީހެއް-"
"އޭނާއަކީ އަނގަގަދަ، ޒުވާބުކުރާ މީހެއްތޯ-؟ އަރައިރުންވާ ހިތްވާ މީހެއްތޯ-؟"
"ނޫން... ނޫން... އޭނާއަކީ ތިޔަ ވިދާޅުވާ ކަހަލަ މީހެއް ނޫން- ތިޔާ ދިމާ އިދިކޮޅު މީހެއް-"
"އެކަމަކު އޭނާ ރައްޓެހިވާ ހިތްވަނީ ހަރުކަށި، ނުލަފާ އަންހެނުންނާ- އެހެންނޫންތޯ-؟"
ގެރީ ޙައިރާންވެފައި ޑޭވިޑާ ދިމާއަށް ބަލައިލިއެވެ. "ނޫން... ނޫން... އޭނާއަށް ރަނގަޅީ މަޑުމައިތިރި، ރަނގަޅު އަންހެނުން-"
"އެލެޓާ އޭނާއާ ދެ މީހުން ވަރަށް ގިނައިން އަރައިރުންވޭތޯ-؟ އެލެޓް އޭނާއާ ދިމާއަށް އެއްޗެތިގޮވާތޯ-؟"
ގެރީގެ މޫނުމަތިން އަދިވެސް ފެންނަނީ ޙައިރާންކަމުގެ އަސަރެވެ. "ލިބިވަޑައިގެން ތިޔަ އުޅުއްވާ މަޢުލޫމާތު އެއްގޮތަކަށް ވެސް ރަނގަޅެއް ނޫން- އެ މީހުން ދުވަހަކުވެސް ޒުވާބެއް ނުކުރޭ- އެކަކު އަނެކަކާ ދިމާއަކަށް ހަޅޭކެއްނުލަވާ- އެ ދެ މީހުންގެ ދޭތެރެއަކު އެއްވެސް މައްސަލައެއް ނެތް-"
"އެލެޓް ޕީޓަރސް އޭނާއަށް ގެއްލުމެއް ދީފާނޭހެން ހީފުޅުވާ ކަހަލަ އެއްވެސް ކަމެއް..."
"އަޅުގަނޑު ދެކޮޅުހަދަން- ވަކީލު އެ މަސައްކަތްކުރައްވަނީ ހެކިބަސްދޭ މީހާ ވަކި ދިމާއަކަށް އަނބުރުވަން..."
"އެ ކަހަލަ ސުވާލެއް ނުކުރައްވާތި-"
"އަޅުގަނޑުގެ އިތުރު ސުވާލެއް ނެތް-" ޑޭވިޑް ބުނެލިއެވެ.
ޑޭވިޑް އައިސް ގޮނޑީގައި އިށީނދެފައި އޭޝްލީއާ ދިމާއަށް ބުނެލިއެވެ. "ހާސްނުވޭ- އެ މީހުން ކުރާ ސުވާލުތަކުން ފައިދާކުރާނީ އަހަރެމެންނަށް-"
އޭނާގެ އަޑުގައި ހުރި ޔަގީންކަމެއް ހިތަކު ނެތެވެ.
ޑޭވިޑާއި، ސަންޑްރާއާ ދެ މީހުން ތިބީ ވިންޑްހޭމް ހޮޓަލުގެ ރެސްޓޯރަންޓް، ސެން ފްރެސްކޯގައި ކާށެވެ. ވެއިޓަރަކު އައިސް ވަރަށް އަދަބުވެރިކަމާއެކު ބުނެލިއެވެ. "މިސްޓަރ ސިންގަރ- ވަރަށް މުހިންމު ފޯނުކޯލެއް އެބައޮތް-"
"ޝުކުރިއްޔާ-" ޑޭވިޑް ސަންޑްރާއާ ދިމާއަށް ބަލައިލިއެވެ. "އަހަރެން އެބައަންނަން-"
ޑޭވިޑް ވެއިޓަރާ އެކީ ފޯނު ހުރި ތަނަށް ހިނގައްޖެއެވެ. "ހަލޯ- މިއީ ޑޭވިޑް ސިންގަރ-"
"ޑޭވިޑް- ވާހަކަދައްކަނީ ޖެސީ- ކޮޓަރިއަށް ގޮސް އަހަންނާ ގުޅައިލާ- ބޮލަށް އުޑު ވެއްޓެން ގާތްވެއްޖެ-"
ސަތާރަވަނަ ބާބު
"ޖެސީ...؟"
"ޑޭވިޑް- ތިޔަ ހިންގާ މައްސަލައިގެ ތެރެއަށް ވަނުމަކީ އަހަރެން ކުރަންޖެހޭ ކަމެއް ނޫންކަން އަހަންނަށް އެނގޭ- އެކަމަކު އަހަންނަށް ހީވަނީ މިހާރު އެންމެ ރަނގަޅުވާނީ މައްސަލަ އަނބުރާ ނެގިއްޔާހެން-"
"ކިހިނެއްވީ-؟"
"މިއިން ދުވަހަކު އިންޓަރނެޓަށް ވަނިންތަ-؟"
"ނުވަންނަން- މި ދުވަސްކޮޅު މި އުޅެވެނީ މާ ބުރަކޮށް-"
"މުޅި އިންޓަރނެޓްގައި އޮތީ ތިޔަ ހިންގާ މައްސަލައިގެ ވާހަކަ- ހުރިހާ ޗެޓް ރޫމެއްގައި ވެސް ދެކެވެނީ ހަމަ ތިޔަ ވާހަކަ-"
"ތިޔަހެން ވާނެކަން އެނގޭ- ޑޭވިޑް ބުންޏެވެ. އެކަމަކު..."
"ހުރިހާ އެންމެންގެ ވާހަކަ ވެސް ހުރީ އޭޝްލީއާ ދެކޮޅަށް- އެ މީހުން ދެކޭ ގޮތުގައި އޭޝްލީ ކުށްވެރިވޭ- އޭނާއަށް ދޭން ޖެހޭނީ މަރުގެ އަދަބު- އެ މީހުން އެހެން ބުނަނީ ވަރަށް އާދަޔާ ޚިލާފު ގޮތްގޮތަށް- މި ކިޔާ އެއްޗެއް ޑޭވިޑަށް ވިސްނޭނެ-"
ޑޭވިޑަށް ވިސްނުނީ ކުއްލިއަކަށެވެ. "ޔާ ރައްބީ-! އެއްވެސް ޖޫރަރއަކު އިންޓަރނެޓަށް ވަދެއްޖެއްޔާ..."
"އޭގެ ތެރެއިން ބައެއް މީހުން ވަންނާނެ- އޭގެ ސަބަބުން އެ މީހުންގެ ވިސްނުމަށް ބަދަލު އަންނާނެ- އެއީ ވަރުގަދަ ނުފޫޒަކަށް ވާނެ- އަހަންނަށް ފެންނަނީ މައްސަލަ އަނބުރާ ނަގަން- އެހެން ނޫނީ ޖޫރީ ބަދަލުކުރެވޭތޯ ބަލައި-"
"ޝުކުރިއްޔާ ޖެސީ- އަހަރެން ތިޔަ ކަމާ އުޅޭނަން-" ޑޭވިޑް ފޯނު ބާއްވައިފައި އެނބުރި ސަންޑްރާ އިން މޭޒުދޮށަށް އަތުވެއްޖެއެވެ.
"ދެރަ ޚަބަރެއްތަ-؟" ސަންޑްރާ އަހައިލިއެވެ.
"ވަރަށް ދެރަ-"
އަނެއް ދުވަހު ހެނދުނު ރަސްމީކޮށް ކޯޓުގެ ޝަރީޢަތް ފެށުމުގެ ކުރިން ޑޭވިޑް ފަނޑިޔާރު ވިލިއަމްސްއާ ބައްދަލުކުރަން އެދިއްޖެއެވެ. ވިލިއަމްސް އޭނާއާ ބައްދަލުކުރީ މިކީ ބްރެނަންގެ ޙާޒިރުގައެވެ.
"އަޅުގަނޑާ ބައްދަލުކުރައްވަން އެދިވަޑައިގަތިންތޯ-؟"
"އާދެ- ޢިއްޒަތްތެރި ފަނޑިޔާރު- އަޅުގަނޑަށް ރޭ އެނގުނު ގޮތުގައި މުޅި އިންޓަރނެޓްގައި މިހާރު އެންމެ ހޫނު ވާހަކައަކަށް އޮތީ މި ޝަރީޢަތުގެ ވާހަކަ- ގިނަ މީހުން މިހާރު ތިބީ އޭޝްލީ ކުށްވެރިވާ ކަމަށް ނިންމައިގެން- އެއީ މައްސަލަ ވަކި އަތަކަށް ބުރަވެގެން ހިނގައިދާނޭ ކަމެއް- ބައެއް ޖޫރަރއިން އިންޓަރނެޓަށް ވަންނާނެ- އެހެން ނޫނީ އިންޓަރނެޓަށް ވަންނަ މީހުންނާ ވާހަކަދައްކާނެ- އޭގެ ސަބަބުން އަޅުގަނޑުގެ ކޮޅަށް ގެއްލުންވާނެ- އެހެންވީމާ އަޅުގަނޑު ބޭނުންވަނީ މި ވަގުތަށް މައްސަލަ އަނބުރާ ނަގަން-"
ވިލިއަމްސް އިރުކޮޅަކު އަނގައިން ނުބުނެ އިނދެފައި ބުނެލިއެވެ. "ތިޔަ ކަމެއް ނުވާނެ-"
ޑޭވިޑް އަމިއްލަ ނަފްސުގެ މައްޗަށް ބާރު ހިންގޭތޯ މަސައްކަތް ކުރިއެވެ. "އެހެން ވެއްޖެއްޔާ އަޅުގަނޑު ބޭނުންވަނީ ޖޫރީ ބަދަލުކުރަން..."
"މިސްޓަރ ސިންގަރ- ޝަރީޢަތް ހިނގާ ކޮންމެ ދުވަހަކު ކޯޓު އޮންނަނީ ނޫސްވެރިން ވަދެ ފުރިފައި- ދުނިޔޭގެ ރޭޑިއޯއާއި، ޓީވީގެ އެންމެ ހޫނު ވާހަކައަކީ މިއީ- ނޫސްތަކުގެ އެންމެ ފަލަސުރުޚީއަކީ މިއީ- މި ޝަރީޢަތް ބޮޑު ޗަރުކޭހަކަށް ވެގެން ދާނެއޭ އަޅުގަނޑު ކުރިންވެސް ދެންނެވިން- އެކަމަކު އެ ދުވަހަކު އަޑެއް ނޭއްސެވީމު-" އޭނާ ކުރިއަށް ގުދުވެލިއެވެ. "މިއީ ޑޭވިޑް ފެށްޓެވި ޗަރުކޭހެއް- ކުރިއަށް ގެންދަވާ- ޖޫރީ ބަދަލުކުރައްވަން ބޭނުންފުޅު ނަމަ ޝަރީޢަތް ފެށުމުގެ ކުރިން އެކަން ކުރައްވަން ޖެހޭނެ- ކުރިން އެދިވަޑައިގެންނެވި ނަމަވެސް އަޅުގަނޑު ހުއްދަ ނުދިނުމަކީ އެކަށީގެންވާ ކަމެއް- އެހެން ކަމެއް އެބަ އޮތްތޯ-؟"
ޑޭވިޑް އިރުކޮޅަކު އަނގައިން ނުބުނެވިފައި އިނެވެ. އޭނާގެ ބަނޑުކެކެނީއެވެ. "ނޫން އެހެން ކަމެއް ނެތް-"
"އެހެން ވެއްޖެއްޔާ އަވަހަށް ޝަރީޢަތުގެ މަޖިލީހަށް ދަމާ ބަހީ-"
މިކީ ބްރެނަން މިހާރު ސުވާލުކުރަމުން ދަނީ ޝެރިފް ޑޮވްލިންގ އާއެވެ.
"ޑެޕިއުޓީ ސޭމް ބްލޭކް ގުޅައިފައި އެ ރޭ އޭޝްލީގެ ގޭގައި އޭނާއަށް ހިމާޔަތް ދޭން މަޑުކުރާ ވަހަކަ ނަންގަތްތޯ-؟ އަދި ކޮންމެވެސް މީހަކު އޭޝްލީއަށް ބިރުދައްކާ ވަހަކަ ވެސް ނަންގަތްތޯ-؟"
"އާދެ- އޭނާ ބުނި-"
"އޭގެ ފަހުން ބްލޭކް ގުޅީ ކޮން އިރަކުތޯ-؟"
"އޭގެ... އޭގެ ފަހަކުންނެއް ނުގުޅާ- އޭގެ އަނެއް ދުވަހު މީހަކު ގުޅައިފައި ބްލޭކްގެ މުޅަމަސްގަނޑު އޭޝްލީގެ ގޭގެ ފުރަގަހުގައި އެބައޮތޭ ބުނި-"
"ހަމަ އެ ވަގުތު އެ ތަނަށް ވަޑައިގަތިންތޯ-؟"
"އާދެ-"
އެ ތަނުން ފެނިވަޑައިގަތީ ކޮން އެއްޗެއްތޯ-؟"
އޭނާ ހިންދިރުވައިލިއެވެ. "އަޅުގަނޑަށް ފެނުނީ ބްލޭކްގެ މުޅަމަސްގަނޑު- އޮތީ ގައިމަތީގައި ފޮތިގަނޑެއް އަޅައިފައި- މަރައިލައިފައި އޮތީ ތޫނުއެއްޗަކުން ތެޅިތެޅީނުން- މަރައިލި އަނެއް ދެ މީހުންހެން އޭނާގެ ވެސް ޖިންސީ ގުނަވަނެއް ނެތް-"
"އަނެއް ދެ މީހުންނޭތޯ-؟ ތިޔަ ވިދާޅުވަނީ ތިން މީހުން ވެސް މަރައިލައިފައި ވަނީ މުޅިން އެއް ގޮތަކަށޭތޯ-؟"
"އާދެ-"
"ހީވަނީ ތިން މީހުންވެސް މަރައިލީ އެކަކުހެން އެހެންނޫންތޯ-؟"
ޑޭވިޑް ފުންމައިގެން ތެދުވެއްޖެއެވެ. "އަޅުގަނޑު ދެކޮޅުހަދަން-"
"އެ ވާހަކަ ހުއްޓަވައިލައްވާ-"
"އެންމެ ރަނގަޅު- އަޅުގަނޑު އެ ވާހަކަ އަނބުރާ ގެނެސްފިން- ދެން ހެއްދެވީ ކިހިނެއްތޯ-؟"
"އެ ހިސާބަށް އައި އިރަކު އަޅުގަނޑުމެންނަކަށް އޭޝްލީގެ މައްޗަކަށް ޝައްކެއް ނުކުރެވޭ- އަޅުގަނޑުމެން ހެދި ގޮތަކީ އޭޝްލީ ގެނެސްގެން އޭނާގެ އިނގިލީގެ ނިޝާން ނެގީ-"
"ދެނޯ-؟"
"ދެން އިނގިލީގެ ނިޝާން އެފްބީއައިއަށް ފޮނުވީ- އެ ތަނުން ބުނީ އިނގިލީގެ ނިޝާން ދިމާވެއޭ-"
"ތިޔަ ވިދާޅުވާ ދިމާވުމަކީ ކޮބައިކަން ޖޫރީއަށް ވިދާޅުވެދެއްވަފާނަންތޯ-؟"
ޝެރިފް ޑޮވްލިންގ ޖޫރީއާ ދިމާއަށް އެނބުރިއްޖެއެވެ. "އޭޝްލީގެ އިނގިލީގެ ނިޝާނާ، މަރުގެ ހާދިސާތައް ހިނގި ތަންތަނުން ނެގި އިނގިލީގެ ނިޝާނާ މުޅިން ދިމާވޭ- އެއީ މި ދަންނަވާ ދިމާވުމަކީ-"
"ޝުކުރިއްޔާ ޝެރިފް-" ބްރެނަން ޑޭވިޑާ ދިމާއަށް ބަލައިލިއެވެ. "އަޅުގަނޑުގެ ސުވާލު ނިމުނީ-"
ޑޭވިޑް ތެދުވެގެން ގޮސް ހެކިންގެ ކޮށިގަނޑުގެ ކައިރިއަށް ހުއްޓިއްޖެއެވެ. "ޝެރިފް- މި ކޯޓުގައި ދެކެވުނު ވާހަކައިގެ ތެރޭގައި އޭޝްލީގެ ގޭގެ ބަދިގެއިން ލެއިން ތަތްތެޅިފައި އޮތް ވަޅިއެއް ފެނުނު ވާހަކަ ވެސް ދެކެވިގެން ހިނގައްޖެ-"
"އާދެ- އެއީ ތެދެއް-"
"އެ ވަޅި ފޮރުވައިފައި އޮތީ ކޮންތާނކުތޯ-؟ އޮތީ ފޮތިގަނޑެއް ކަހަލަ އެއްޗެއްގައި އޮޅައިފައިތޯ-؟ ނުފެންނަ ކަހަލަ ދަތިތަނަކަށް ލާފައިތޯ-؟"
"ނޫން- އެ ވަޅި އޮތީ ހަމަ ދިމާއަށް ފެންނަން-"
"ދިމާއަށް ފެންނާށޭތޯ-؟ މާނައަކީ އެ ވަޅި އެ އޮތް ތަނެއްގައި ބޭއްވީ އެއްޗެއް ފޮރުވަން ބޭނުން މީހެއް ނޫނޭ- އެއީ އެއްވެސް ކުށެއް ނެތް..."
"އަޅުގަނޑު ދެކޮޅުހަދަން-"
"ތިޔަ ވާހަކަ ހުއްޓަވައިލައްވާ-"
"އަޅުގަނޑުގެ އިތުރު ސުވާލެއް ނެތް-"
"ޝެރިފް އެނބުރި ވަޑައިގަތަސް އެންމެ ރަނގަޅު-"
ބްރެނަން ބުނެލިއެވެ. "ޢިއްޒަތްތެރި ފަނޑިޔާރުގެ އިޒުނަފުޅާއެކު އަޅުގަނޑު އެއްޗެއް ހުށަހަޅައިލާނަން-" އޭނާ ކޯޓުގެ ފަހަތުބަރީގައި ތިބި ބަޔަކަށް އަތުން އިޝާރާތްކޮށްލިއެވެ. އެ ތާނގައި ހުރި މީހަކު އައީ އޭޝްލީގެ ގޭގައި ހުރި މޫނުބަލާލޯގަނޑެއް ހިފައިގެންނެވެ. އެ ލޯގަނޑުގައި ތުންފަތުގައި އުނގުޅާ ރަތްކުލައިން ލިޔެފައި އޮތެވެ. "ކަލޭ މަރުވާނެ!"
ޑޭވިޑް ތެދުވެއްޖެއެވެ. "މިއީ ކޯޗެއްތޯ-؟"
ފަނޑިޔާރު ވިލިއަމްސް ބްރެނަންއާ ދިމާއަށް ބަލައިލިއެވެ. "މިސްޓަރ ބްރެނަން...؟"
"މިއީ ޑެޕިއުޓީ ބްލޭކް ޖައްސަން އޭޝްލީ ޖެހި މަޅިގަނޑު- އޭނާ މަރައިލަން ރޭވިރޭވުމުގެ މައިގަނޑު- މި ލޯގަނޑު ޤަރީނާ 4 ގެ ގޮތުގައި ނޯޓުކުރެއްވުން އެދެން- މިއީ އޭޝްލީ ބޭސްއަޅައިފައި ހުންނަ އަލަމާރީގެ ލޯގަނޑު-"
"އަޅުގަނޑު ދެކޮޅުހަދަން- މި ލޯގަނޑަކާ މައްސަލައަކާ އެއްވެސް ގުޅުމެއް ނެތް-"
"ގުޅުން ހުރިކަމަށް އަޅުގަނޑު ސާބިތުކޮށްދޭނަން-"
"އެންމެ ރަނގަޅު- ކުރިއަށް ގެންދަވާ-"
ބްރެނަން ލޯގަނޑު ގެންގޮސް ޖޫރީއަށް ފެންނަ ގޮތަށް ބަހައްޓައިފިއެވެ. "މި ލޯގަނޑު ނަގައިފައި މި ވަނީ އޭޝްލީގެ ފާޚާނާއިން-" އޭނާ ޖޫރީއާ ދިމާއަށް ބަލައިލިއެވެ. "ރަނގަޅަށް ބައްލަވައިލައްވާ- މީގައި ލިޔެފައި އޮތް އެއްޗަކަށް ސަމާލުކަންދެއްވާ- ކަލޭ މަރުވާނެ- އޭނާގެ މަޅީގައި ބްލޭކް ޖައްސަންވެގެން އޭޝްލީ ހެދި އުކުޅަކީ މިއީ- ބްލޭކް އެ ރޭ އެ ގޭގައި މަޑު ކުރީ މި ލިޔުންކޮޅު ފެނިގެން-" ބްރެނަން ދެން އެނބުރިލީ ފަނޑިޔާރު ވިލިއަމްސްއާ ދިމާއަށެވެ. "ދެން އަޅުގަނޑު ގެންނަން ބޭނުންވާ ހެއްކަކީ މިސް ލައުރާ ނިވެން-"
އަސައެއްގެ އެހީގައި ހިނގައިފައި އައި މެދުއުމުރުގެ އަންހެނަކު ހެކިންގެ ކޮށިގަނޑަށް ވަދެއްޖެއެވެ.
"މިސް ނިވެން- މަސައްކަތްކުރައްވަނީ ކޮންތާނކުތޯ-؟"
"އަޅުގަނޑަކީ ކައުންޓީ އޮފް ސެން ހޯސްގެ ކޮންސަލްޓަންޓަކީން-"
"އެ ތާނގައި ކުރައްވާ މަސައްކަތަކީ ކޮބައިތޯ-؟"
"އަޅުގަނޑަކީ އަތުލިޔުމުގެ މާހިރަކީން-"
"އެ ތާނގައި މަސައްކަތްކުރައްވާތާ ކިހައި ދުވަހެއް ވެދާނެތޯ-؟"
"ބާވީސް އަހަރު-"
ބްރެނަން އެއްކަލަ ލޯގަނޑަށް އިޝާރާތްކޮށްލިއެވެ. "އެހެރަ ލޯގަނޑު މީގެ ކުރިން ދެކެވަޑައިގަތިންތޯ-؟"
"އާދެ-"
"އޭގައި ހުރި ލިޔުން ރަނގަޅަށް ބެއްލެވިންތޯ-؟"
"އާދެ- ބެލިން-"
"އޭޝްލީގެ އަތުލިޔުން ބެއްލެވިންތޯ-؟"
"އާދެ-"
"އެ ލިޔުންވެސް ރަނގަޅަށް ބެއްލެވިންތޯ-؟"
"އާދެ-"
"އެ ދެ ލިޔުން އެއްގޮތްތޯ ބެއްލެވިންތޯ-؟"
"އާދެ-"
"ނުކުތް ނަތީޖާއަކީ ކޮބައިކަން ވިދާޅުވެދެއްވަފާނަންތޯ-؟"
"އެ ދެ ލިޔުން ލިޔެފައިވަނީ އެކަކު-"
(ނުނިމޭ)
vv. reethi avahah upveethee shukuriyya