އެޗުޕީއޭއިން ވިދާޅުވީ އޭނާއަކީ އިނގިރޭސިވިލާތުން ރާއްޖެއައުމުން ކަރަންޓީން ކޮފައިވާ މީހެއްކަމަށެވެ. އޭނާ ކަރަންޓީން ކޮށްފައިހުރީ ރޯޔަލް އައިލެންޑް ރިސޯޓުގައި ކަމަށް ވެސް އެތަނުން ވިދާޅުވިއެވެ.
"ކަރަންޓީނު ކޮށްފައިވާ ދިވެއްސެއްގެ ފަރާތުން ކޮވިޑް-19 ގެ އަލާމާތްތައް ފެނި، ސާމްޕަލް ނަގައި ހެދި ޓެސްޓުގެ ނަތީޖާ ޕޮޒިޓިވް ވެއްޖެ. އެއީ، އިނގިރޭސި ވިލާތުން އެނބުރި އައި މީހެއް،" އެޗުޕީއޭއިން ވިދާޅުވިއެވެ. މިއީ ކޮވިޑް-19 އަށް ޕޮޒިޓިވްވި ދިވެހި ދެވަނަ މީހާއެވެ. މީގެ ކުރިންވެސް ޕޮޒިޓިވް ވެފައިވަނީ އިނގިރޭސިވިލާތުން އައި 38 އަހަރުގެ މީހެކެވެ. އޭނާގެ ހާލު ރަނގަޅު ކަމަށް ޑޮކްޓަރުން ވަނީ ވިދާޅުވެފައެވެ.
އަލަށް ފެނުނުމީހާއާ ދިމާވެފައިވާ މީހުން ހޯދައި އެމީހުން ވަކިކުރުމުގެ މަސައްކަތް ވެސް އެޗުޕީއޭއިން ދަނީ ކުރަމުންނެވެ. މިމިހާ ޕޮޒިޓިވް ވުމުން ރާއްޖޭގައި ޕޮޒިޓިވްވި މީހުންގެ އަދަދު 17 އަށްއެރީއެވެ. އޭގެ ތެރޭގައި ހިމެނެނީ 2 ދިވެހީންނާއި 15 ބިދޭސީންނެވެ. އޭގެ ތެރޭގައި ރާއްޖެއިން ފުރައިގެންދިޔަ އިޓަލީގެ ދެ މީހުންވެސް ހިމެނެއެވެ. ޕޮޒިޓިވްވި މީހުންގެ ތެރެއިން މިހާރު ފަރުވާ ދެމުން ގެންދަނީ 4 މީހަކަށެވެ.
