ހިފެހެއްޓުމެއް ނެތި ދުނިިޔޭގައި ފެތުރެމުންދާ ކޮވިޑް- 19 ގެ ސަބަބުން އިއްޔެ ވެފައި ގިނަ އިސްލާމީ ގައުމުތަކަކަށް ހިތާމަވެރި ހުކުރު ދުވަހަަކަށެވެ. އެންމެ އިރަށް އޮތް އިސްލާމީ ގައުމު އިންޑޮނޭޝިޔާއިން ފެށިގެން އެންމެ ހުޅަނގަށް އޮތް އިސްލާމީ ގައުމު މޮރޮކޯ (މަޣްރިބު) އާއި ހަމައަށް ގިނަ އިސްލާމީ ގައުމުތަކެއްގައި ހުކުރު ނަމާދު ކުރާ މިސްކިތްތައް އިއްޔެ ހުރީ ފަޅަށެވެ.
ގިނަ އިސްލާމީ ގައުމުތަކެއްގެ ކަމާބެހޭ އިދާރާތަކުން ޖަމާއަތުގައި ނަމާދުކުރުމާއި ހުކުރު ނަމާދުކުރުން މަނާކޮށްފައި ވީނަމަވެސް، ބައެއް މީހުން އެންގުންތަކާއި ޚިލާފަށް ހުކުރު ނަމާދު ކޮށްފައި ވެއެވެ.
މުސްލިމުންގެ ޤިބުލަ ކަމުގައިވާ ގެފުޅުގެ ވަށައިގެން ހުރި އަލްމަސްޖުލް ޙަރާމުގައި ހުކުރު ނަމާދު ކުރިނަމަވެސް، ތަން އޮތީ ފަޅަށެވެ. ހުކުރު ނަމާދުގައި ބައިވެރިވުމުގެ ފުރުސަތު ލިބުނީ މަދު ބަޔަކަށެވެ. މަދީނާގެ އަލްމަސްޖިދުއް ނަބަވީގައ ިވެސް ކަން ހިނގާފައި ވަނީ މި ބީދައިންނެެވެ.
ޤުދްސުގައި ހުންނަ މުސްލިމުންގެ ތިންވަނަ ޙަރަމް އަލްމަސްޖިދުލް އަޤްޞާގައި ހުކުރު ނަމާދުކޮށްފައި ނުވާއިރު، އިސްތަންބޫލުގައި ހުންނަ ތުރުކީގެ އެންމެ ބޮޑު އަދި ތާރީޚީ މިސްކިތް ކަމުގައިވާ ބްލޫ މޮސްކް ވެސް ހުރީ ހުހަށެވެ. އިސްލާމީ ދުނިޔޭގެ އެންމެ ބޮޑު އެއް މިސްކިތް، ކަސަބްލަންކާ (އައްދާރުލްބައިޟާ) ގެ ޙަސަން ދެވަނަ މިސްކިތުގައި ވެސް ހުކުރު ނަމާދުކޮށްފައި ނުވެއެވެ.
ދެކުނު އިިރުމަތީ އޭޝިޔާގެ އެންމެ ބޮޑު މިސްކިތް، އިންޑޮނޭޝިޔާގެ ވެރިރަށް ޖަކާޓާގައި ހުންނަ އިސްތިޤްލާލު މިސްކިތުގައި އިއްޔެ ހުކުރު ނަމާދު ކޮށްފައި ނުވާއިރު، މެލޭޝިޔާގެ މިސްކިތްތަކުގައި ވެސް ހުކުރު ނަމާދު ކޮށްފައި ނުވެއެވެ.
ކޮވިޑް- 19 ގެ ސަބަަބު އިސްލާމީ ގިނަ ގައުމުތަކެއްގައި ހުކުރު ނަމާދު ނުކުރި ނަމަވެސް ބައެއް ގައުމުތަކުގެ މިސްކިތްތަކުގައި ހުުކުރު ނަމާދު ކޮށްފައި ވާކަން ވެސް ފާހަގަކޮށްލެވެއެވެ.
ޕާކިސްތާނުގައި ހުންނަ އެންމެ ބޮޑު މިސްކިތް ފައިސަލް މިސްކިތުގައި ހުކުރު ނަމާދުކުރި އިރު، ކަރާޗީގެ އެންމެ ބޮޑު މިސްކިތުގައިވެސް ހުކުރު ނަމާދު ކޮށްފައި ވެއެވެ. "މި ވައިރަސް އައިސް އަހަރުމެންގެ މިސްކިތްތައް ފަޅުކޮށްލާ ވަރަށް އަހަރުމެން ބަލިކަށްޓެއް ނޫން." ކަރާޗީ މިސްކިތުގެ އިމާމު ވިދާޅުވިއެވެ.
މީގެ އިތުރަށް، ނައިޖީރިޔާއާއި، މިސްރުގެ ބައެއް މިސްކިތްތަކުގައިިވެސް ހުކުރު ނަމާދު ކޮށްފައި ވެއެވެ.
މިހާތަނަށް ދުނިޔޭގެ 172 ގައުމެެއްގެ 2 ލައްކަ 76 ހާސް މީހުންނަށް ކޮވިޑް- 19 ޖެހިފައި ވާއިރު، މި ބަލީގައި 11 ހާހަށްވުރެ ގިނަ މީހުން ވަނީ ދުނިޔެ ދޫކޮށްފައެވެ.
