ސާޅީހަށް ވުރެ ގިނަ ކަންނެލި އޮޑިން 200 ޓަނަށް ވުރެ ގިނަ ކަންކެނެލި ނުކިރި ބަނދަރު ތަކުގައި ތިބެންޖެހިފައިވާ ކަމަށް ބޮޑު ކަންނެލި މަސްވެރިންގެ ޔޫނިއަން އިން ބުނެފިއެވެ. މިކަން ހާމަކޮށް ފައި ވަނީ އެ ޔޫނިއަން އިން އިއްޔެ ނެރުނު ނޫސްބަޔާނެއްގައެވެ.
ނޫސް ބަޔާނުގައި ބުނެފައިވަނީ ކަންނެލި އޮޑިފަހަރު މަސް ނުކިރި ބަނދަރުތަކުގައި ތިބެން ޖެހިފައިވަނީ މިދުވަސްވަރު ކަންނެލި މަސް ގަންނަ ފަރާތްތަކުން ކަންނެލިގަތުން ދަށް ކޮށްފައި ވާތީކަމަށެވެ. ކަންނެލި މަސްގަތުން ދަށް ކޮށްފައިވަނީ ކޯވިޑް- 19 އާގުޅިގެން ދުނިޔޭގެ ބާޒާރުގައި ކަންނެލިމަހުގެ ޑިމާންޑް ދަށްވަމުން ދާތީއާއި މަސްބޭރުކުރުމަށް ހުރަސްތައް ކުރިމަތިވަމުން ދާތީ ކަމަށް މަސްވެރިންގެ ޔޫނީއަން އިން ވަނީ ފާހަގަ ކޮށްފައެވެ. މިކަމުގެ ސަބަބުން އެތައް ސަތޭކަ މަސްވެރި އާއިލާތަކެއްގެ އާމްދަނީ ވަނީ ހުއްޓުމަކަށް އައިސްފައިކަމަށް ނޫސް ބަޔާނުގައި ވަނީ ފާހަގަކޮށްފައެވެ.
ކޮންމެ އަހަރެއްގެ ވެސް މިދުވަސް ވަރަކީ ބޮޑުކަންނެލީގެ މަސްވެރިކަން ރަނގަޅުވެ، އެކަށޭނަ ނަފާއެއް ހޯދުމަށް ޚާއްޞަކޮށް މަސައްކަތްކުރެވޭ ދުވަސްވަރެއްކަން ވަނީ ފާހަގަ ކޮށްފައެވެ. ނަމަވެސް މުޅިދުނިޔެއަށް ފެތުރެމުންދާ ކޮރޯނާ ވައިރަހުގެ ސަބަބުން ދިވެހިރާއްޖޭގެ އިޤްތިޞާދަށް ލޮޅުން އަރަމުން ދާ މިދަނޑިވަޅުގައި ބޮޑުކަންނެލި މަސްވެރިންނަށް ނުހަނު ބޮޑެތި ގެއްލުންތަކާއި ކުރިމަތިލާން ޖެހިފައިވާ ކަމަށް ބޮޑު ކަންނެލި މަސްވެރިންގެ ޔޫނިއަން ވަނީ ފާހަގަ ކޮށްފައެވެ.
"މިވަގުތުވެސް 40 ހަށްވުރެ ގިނަ ކަންނެލި އޮޑި، 200 ޓަނަށްވުރެ ގިނަ ކަންނެލި ނުކިރި ބަނދަރުތަކުގައި ތިބިކަމީ މި ޖަމިއްޔާއިން ނުހަނު ކަންބޮޑުވާ ކަމެކެވެ. ބޮޑު ކަންނެލި މަސްވެރިކަމުން ނަފާލިބި ދިވެހިރާއްޖޭގައި ދިރިއުޅޭ 30 ހާހެއްހާ ރައްޔިތުންގެ ދިރިއުޅުމުގެ ޒަރޫރަތްތައް ފުއްދައިގެން ތިބެވޭނެ މަގަކަށް ކަންކަން ގެންދިއުމަށް ސަރުކާރަށާއި މަސްގަންނަ ފަރާތްތަކަށް ގޮވާލަމެވެ." ނޫސްބަޔާނުގައި ވެއެވެ.
މަސްވެރީންނަށް އެމީހުންގެ އާއިލާތަކުގެ ޒަރޫރީ ބޭނުންތައް ފުއްދައިގެން އުޅެވޭ ވަރުގެ ފައިސާގެ ތަނަވަސްކަން ފޯރުކޮށްދެވޭނެ ވަރުގެ ގޮތްތަކެއް ހަމަޖައްސައި ސަރުކާރުން އަވަސް ފިޔަވަޅުތަކެއް އަޅައި މަސްވެރިކަމުގެ ސިނާޢަތު ސަލާމަތް ކޮށްދިނުމަށް ދިމާވެފައިވާއ މައްސަލަތަކަށް އަވަސް ޙައްލެއް ހޯއްދަވައި ދެއްވުމަށް ސަރުކާރަށާއި މަސްގަންނަ ފަރާތްތަކަށް ނޫސްބަޔާނޫގައި ވަނީ ގޮވާލައިފައެވެ.
ދުނިޔޭގެ އިގުތިސާދު ރަނގަޅު، މަހުގެ ޑިމާންޑް ރަނގަޅު ވަގުތުތަކުގައިވެސް ބޮޑުކަންނެލި މަސްވެރީންނަށް ރަނގަޅު އަގެއްގައި މަސްކޮޅު ވިއްކައި ނުލެވޭ ކަން ވަނީ ފާހަގަ ކޮށްފައެވެ. އަދި 2008 ކުން ފެށިގެން ކުރިމަތިވެފައިވާ އިޤްތިޞާދީ ހީނަރުކަމުގެ ސަބަބުން ފައިދާވެފައި ވަނީ، މުއްސަނދި، މަދު ވިޔަފާރިވެރިންނަށް އެކަނި ކަމަށް ވެސް ނޫސް ބަޔާނުގައި ވަނީ ފާހަގަ ކޮށްފައެވެ.
