ކޯވިޑް-19 ރާއްޖެއަށް އަތުވެދާނެ ކަމުގެ ބިރު އޮތުމުން މިއަދުން ފެށިގެން މޭ މަހުގެ ވިހިވަނަ ދުވަހާ ހަމައަށް ސްކޫލްތަކުގައި ހިންގާ އިތުރު ހަރަކާތްތައް ވަގުތީ ގޮތުން މަޑުޖައްސައިލުމަށް މިނިސްޓްރީ އޮފް އެޑިއުކޭޝަނުން ނިންމަވައިފިއެވެ.
ހަރަކާތްތައް މެދުކަނޑާލުމަށް ހަމަޖެއްސެވިކަން އަންގަވައި މިނިސްޓްރީއިން ސްކޫލްތަކަށް ފޮނުއްވި ސާކިއުލާގައި ވިދާޅުވިގޮތުގައި އެ ނިންމެވުމަކީ ހެލްތު ޕްރޮޓެކްޝަން އޭޖެންސީގެ ކޯވިޑް-19ގެ ޓެކްނިކަލް ޓީމާއި މީޒްލްސް ޓެކްނިކަލް ޓީމުގެ މަޝްވަރާއާއެކު ނިންމެވި ނިންމެވުމެއް ކަމަށެވެ.
މި ނިންމެވުމާއެކު ސްކޫލްތަކުން ރާވައި ހިންގާ އަމަލީ ދަތުރުތަކައި، ކުޅިވަރު މުބާރާތްތަކާއި ފަރިތަކުރުންތަކާއި، ގިނަ ދަރިވަރުން ބޭނުންކޮށްގެން ހިންގާ އިޖްތިމާއީ ހަރަކާތްތަކާއި، ހިލޭ ސާބަހަށް މަސައްކަތް ކޮށްދިނުމަށް ރާވާފައިވާ ހަރަކާތްތަކާއި، މާރިޗު މަހުން ފެށީގެން މޭ މަހާއި ހަމައަށް ހިންގުމަށް ކަލަންޑަރުކުރެވިފައިވާ ހަރަކާތްތައް ވެސް މަޑުޖައްސާލުމަށް ސްކޫލްތަކަށް ވަނީ އަންގަވާފައެވެ.
މިނިސްޓްރީއިން ވިދާޅުވީ ކޯވިޑް-19 ފެތުރެމުންދާ ގޮތާއި، ހާލަތަށް ބަލައި މަތިން ސްކޫލްތައް ބަންދުކުރަން ޖެހޭފަދަ ހާލަތެއް މެދުވެރިވެއްޖެނަމަ އެޗްޕީއޭގެ ލަފާގެ މަތިން ސްކޫލްތަކަށް އަންގަވާނެކަމަށެވެ.
