އައްޑޫސީޓީ މީދޫގެ އަމިއްލަ ޖަމިއްޔާއެއް ކަމަށްވާ ނަލަފެހި މީދޫއާއި، ސ. އަތޮޅު މަދަރުސާ ގުޅިގެން މީދޫ ގޮނޑުދޮށުން ބައެއް ސާފުކޮށް އަށްޑިހަ ގަސް އިންދައިފިއެވެ.
އެޖަމިއްޔާގެ މަސްއޫލުވެރިއެއް ކަމަށްވާ މުޙައްމަދު ކާމިލް ވިދާޅުވީ ތިމާވެއްޓާ ގުޅޭ އެ ޙަރަކާތަކީ މާދަރީބަހުގެ ދުވަހާ ގުޅިގެން އެ ސްކޫލާއި އެޖަމިއްޔާ ގުޅިގެން ހިންގި ޙަރަކާތެއް ކަމަށެވެ.
މާދަރީ ބަހުގެ ދުވަހާ ގުޅިގެން އެފަދަ ހަރަކާތެއް ބޭއްވީ ގަސްގަހާގެއްސަށް ކިޔާ ނަންތައް ބަހުގެތެރޭގައި ހިފެހެއްޓުމުގެ މަގުސަދުގައި ކަމަށް އޭނާ ވިދާޅުވިއެވެ. "ނަމެއް ކިޔޭނީ އެއްޗެއް ފެނިގެން، ހުރެގެން. އެއެއްޗެއް ނެތި ދިޔައިމާ އޭގެ ނަން ވެސް ހަނދާންނެތި ނަން އުވިގެން ހިނދައިދާނެ. ގަސްގަހާގެހީގެ ތެރޭގައި ހިމެނޭ އެކި ބާވަތްތައް ނެތިގެން ގޮސްފި ކަމަށްވާނަމަ އޭގެ ނަންތައް ވެސް އެއާއެކު ނެތިގެންދާނެ ކަމަށް މިބަލަނީ. އެހެންވެ ގަސްތައް މިއިންދީ،" ކާމިލް ވިދާޅުވިއެވެ.
އެ ޙަރަކާތުގެ ދަށުން އިންދާފައިވަނީ ކިނބި ގަހެއެވެ. މި ޙަރަކާތް ކުރިއަށް ގެންގޮސްފައިވަނީ މީދޫ ޢީދިގަމޫލެ ސަރަހައްދުގައެވެ. އެ ސަރަޙައްދުގެ ގޮނޑު ދޮށުން ވަނީ ޕްލާސްޓިކް ކުނި ނަގައި ސާފުކޮށްފައެވެ. މި ޙަރަކާތުގައި އެ ސްކޫލުގެ 90 ދަރިވަރުން ބައިވެރިވިއެވެ.
ނަލަފެހި މީދޫ ޖަމިއްޔާއަކީ ތިމާވެށީގެ ކަންކަމުގައި ހަރަކާތްތެރިވކާ ޖަމިއްޔާއެކެވެ.
