ޓެކްސީ ޑްރައިވަރު ޤާސިމް ޙަސަން މަރާލި ކަމަށް ޝަރީޢަތުގެ މަޖިލީހުގައި އަދުހަމް މުޙައްމަދު މިހާރު އިންކާރު ކުރިޔަސް އޭނާގެ މައްޗަށް ކުށްސާބިތު ކުރެވޭ ވަރަށް ހެއްކާއި ޤަރީނާ ހުންނާނެ ކަމަށް ފުލުހުން ވިދާޅުވެއްޖެއެވެ.
ފުލުހުން މިހެންވިދާޅުވީ ޤާސިމް މަރާލި ކަމަށް ކުރިން އެއްބަސްވީ މަސްތުގެ ޙާލުގައި ހުރެގެން ކަމަށް ޝަރީޢަތުގެ މަޖިލީހުގައި އަދުހަމު ބުނުމުންނެވެ. އޭނާ ބުނީ ފުލުހުންވަނީ އޭނާއަށް މަސްތުވާތަކެތި ގަނެދީފައި ކަމަށެވެ. އެހެންނަމަވެސް ފުލުހުން ވިދާޅުވީ އަދުހަމުގެ އެބުނުމަކީ އެއްވެސް އަސްލެއްނެތް ޙަޤީޤަތާ ޚިލާފު ވާހަކައެއް ކަމަށެވެ.
"ފުލުހުން އަދުހަމަށް މަސްތުވާތަކެތި ގަނެފައިދިން ކަމަށް ބުނެ އަދުހަމް ޝަރީޢަތުގައި ދައްކާފައިވާ ވާހަކަތަކަކީ އެއްވެސް އަސްލެއްނެތް ޙަޤީޤަތާ ޚިލާފު ވާހަކަތަކެއް،" ފުލުން ވިދާޅުވިއެވެ.
މި މައްސަލާގައި ދައުލަތުގެ ޕްރޮސެކިޔުޓަރ ޖެނެރަލް ޙުސައިން ޝަމީމް ވެސް ވިދާޅުވެފައިވަނީ އަދުހަމް، ޤާސިމް މެރިކަން ހެއްކާއި ޤަރީނާގެ މައްޗަށް ބިނާކޮށް ޝަރީޢަތަށް ސާބިތު ކޮށްދެއްވާނެ ކަމަށެވެ. އަދުހަމަވަނީ އޭނާގެ މައްޗަށް އުފުލާފައިވާ މީހަކުމެރުމުގެ މުޅި ދަޢުވާއަށް ވެސް އިންކާރުކޮށްފައެވެ.
