މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓުގައި ތަރައްގީ ކުރަމުން އަންނަ އައު ސީޕްލޭން ޓާމިނަލް ޓްރާންސް މޯލްޑިވިއަން އެއާވޭސް (ޓީއެމްއޭ) އަށް ދިނުމުގައި މައްސަލަތައް ދިމާވެ އެންމެ ފަހުން ޖިނާއީ ތަހުގީގެއް ފަށައިފިއެވެ.
މައްސަލައަކީ އެ ކުންފުންޏަށް އެތަން ދޭންއުޅޭ ގޮތެވެ. މިހާރު އޮތްގޮތަށް ދީފިކަމަށްވާނަމަ ސަރުކާރަށް ބޮޑު ގެއްލުމެއްވާނެ ކަމަށް އެންޓިކޮރަޕްޝަން ކޮމިޝަން (އޭސީސީ) އިން ވަނީ ވިދާޅުވެފައެވެ. އެންމެ ބޮޑަށް އެކަމާ އަޑު އުފުލަނީ ރައްޔިތުންގެ މަޖިލީހުގެ މާލިއްޔަތު ކޮމިޓީއެވެ. އެކޮމިޓީގެ މުގައްރިރެވެ. ދައުލަތަށް ބޮޑު ގެއްލުމެއް ލިބޭ ގޮތަށް އެތަން އެއްވެސް ފަރާތަށް ދިނުމަކީ ބޮޑު ގޯހެއް ކަމަށް އޭނާ ވިދާޅުވިއެވެ.
މިމައްސަލައިގެ ތެރެއަށް އޭސީސީ ވެސް ވަނީ ވަދެފައެވެ. އަދި ބައެއް މީހުންގެ މައްޗަށް ތުހުމަތުތަކެއް ވެސް ވަނީ ކޮށްފައެވެ. މިމައްސަލައާ ގުޅިގެން އޭސީސީން ނެރެފައިވާ ބަޔާނެއްގައި ވިދާޅުވެފައިވަނީ އެމްއޭސީއެލްގެ ކުރީގެ ބޯޑާއި މިހާރުގެ ބޯޑުގައި ހިމެނޭ ބައެއް މެމްބަރުންނާއި ޓީއެމްއޭއާއި މަންތާ އޭވިއޭޝަނާ ގުޅުމެއް އޮންނަކަން ނުވަތަ މަސްލަހަތު އޮންނަކަން އެނގިފައިވާ ކަމަށެވެ.
ސީޕްލޭން ޓަރމިނަލް ޓީއެމްއޭއަށް ދޭން ނިންމާފައިވާ އަގަށް ރިއާޔަތް ކުރާއިރު އަހަރެއްގެ މައްޗަށް 848 މިލިއަން ރުފިޔާގެ ގެއްލުން ވާނެ ކަމަށް އޭސީސީން ވިދާޅުވެފައިވެއެވެ. ޓީއެމްއޭއަށް ސީޕްލޭން ދޭން ނިންމައިފައިވަނީ 2017 ވަނަ އަހަރުގެ ޑިސެމްބަރު މަހު 28 ވަނަ ދުވަހު ބޭއްވި އެމްއޭސީއެލްގެ ބޯޑު މީޓިންއަކުންނެވެ. އެއީ ރައީސް ޔާމީންގެ ސަރުކާރުގައި ހިނގި ކަމެކެވެ. އެކަމާބެހޭ ގޮތުން ރައީސް ނަޝީދު ވިދާޅުވެފައިވަނީ އެއީ ހައްލެއް ހޯދަންޖެހޭ މައްސަލައެއް ކަމަށެވެ. އެހެންނޫނީ ރަންވޭ ހުޅުވުން ލަސްވުމުގެ އިތުރުން ޓީއެމްއޭއަށް ބަދަލުދޭން ޖެހުން ވެސް ގާތް ކަމަށް އެމަނިކުފާނު ވިދާޅުވިއެވެ. އެންމެ ރަނގަޅު ގޮތަކީ ސަރުކާރާއި ޓީއެމްއޭއަށް ވެސް ފައިދާވާނެ އެއްބަސްވުމަކަށް ދިޔުން ކަމަށް އެމަނިކުފާނު ވިދާޅުވެފައިވެއެވެ. މައްސަލާގައި ގޯސްހެދި މީހުން ހޯދައި އަވަހަށް ތަހުގީގު ފަށަންޖެހޭ ކަމަށް ވެސް އެމަނިކުފާނު ވިދާޅުވިއެވެ.
މި މައްސަލާގައި ކޮރަޕްޝަންގެ ތުހުމަތުތަކެއް ވެސް އެބަ ކުރެވެއެވެ. އޭސީސީން ވިދާޅުވެފައިވަނީ ވެލާނާ އިންޓަރނޭޝަނަލް އެއަރއާޕޯޓުގައި މިހާރު ސީޕްލޭން އޮޕަރޭޓް ކުރާ ތިން ކުންފުނީ ތެރެއިން ޓީއެމްއޭ އާއި މަންތާ އޭވިއޭޝަން ޕްރައިވެޓް ލިމިޓެޑާ އެމްއޭސީއެލްގެ ބޯޑުގެ ކުރީގެ އަދި މިހާރުގެ ބައެއް ބޭފުޅުންގެ މަސްލަހަތު އޮންނަކަން ފާހަގަވެފައިވާ ކަމަށެވެ.
އަލަށް އަޅަމުންދާ ސީޕްލޭން ޓަރމިނަލް އަކީ އެމްއޭސީއެލް އަށް ނުހިންގޭނެ ތަނެއް ނޫނެވެ. އެތަނުން އެތަން ހިންގައިގެން ދައުލަތަށް ބޮޑެތި ފައިދާއެއް ވަންނާނެ ފުރުސަތު ދިމާ ހާއަށް ހުޅުވިފައިވާ ކަމަށް ބައެއް ފަރާތްތަކުން ދަނީ ބުނަމުންނެވެ. މާލިއްޔަތު ކޮމިޓީގެ މުގައްރިރު ޔައުގޫބު އަބްދުﷲ ވެސް ބުރަވަނީ އެތަން އެމްއޭސީއެލް އިން ހިންގައި ދައުލަތަށް ލިބޭ އާމްދަނީ އިތުރު ކުރުމެވެ.
އައު ސީޕްލޭން ޓާމިނަލް ހިންގުން ޓީއެމްއޭއާ ހަވާލު ކުރުމަށް ނިންމާފައިވަނީ ދައުލަތަށް ބޮޑު ގެއްލުމެއް ކޮށްފައި ވެސް ވަކި ފަރާތަކަށް ނާޖާއިޒު ފައިދާ ލިބޭ ގޮތަށް ކަމަށް ވެސް ބައެއް ފަރާތްތަކުން ވަނީ ތުހުމަތުކޮށްފައެވެ. އޭސީސީއަށް އެ މައްސަލަ ހުށަހެޅީ އެފަދަ ތުހުމަތު ކުރެވޭތީއެވެ.
އޭސީސީން ބަޔާނުގައިވާ ގޮތުން ވަނީ އެމްއޭސީއެލްއިން ވެލާނާ އިންޓަރނޭޝަނަލް އެއަރޕޯޓްގެ އިންޓަރނޭޝަނަލް ޓަރމިނަލުން 2017 އަދި 2018 ގައި ރިޒޯޓްތަކަށް ޖާގަކުއްޔަށް ދޫކުރަން އެއްބަސްވެފައިވާ އެންމެބޮޑު އަގަކީ ތިންސަތޭކަ ސާދަ ޑޮލަރު ފަންސާސްހަތް ސެންޓެވެ. އެންމެ ކުޑަ އަގުގައި އެމްއޭސީއެލްއިން ރިސޯޓްތަކަށް ކުއްޔަށް ދޫކޮށްފައިވަނީ އަކަމީޓަރަކަށް މަހަކު އެއްސަތޭކަ ހަތްދިހަ ހަތަރު ޑޮލަރު ނުވަދިހަ ދެސެންޓުގެ ރޭޓުންނެވެ.
އެހެންނަމަވެސް މިހާރު ކުއްޔަދޭން މަސައްކަތް ކުރަމުން ގެންދަނީ އަކަމީޓަރަކަށް ދިހަ ޑޮލަރު ތިރީސް ފަސް ސެންޓުގެ ރޭޓުންނެވެ. މައްސަލަ އުފެދޭ ހިސާބަކީ މިއީއެވެ. އެއީ ވަރަށް ކުޑައަގެކެވެ.
އޭސީސީގެ ބަޔާނުގައި ވާގޮތުން 314.57 ޑޮރަލުގެ ބަދަލުގައި 10.35 ޑޮލަރަށް ޖާގަ ކުއްޔަށް ދީފިކަމަށްވާނަމަ އަހަރެއްގެ މައްޗަށް ފަންސާސްފަސް މިލިއަން ފަސްދޮޅަސްދެ ހާސް ހަސަތޭކަ ތިން ޑޮލަރު ބާރަ ސެންޓު ގެއްލުންވާނެ ކަމަށެވެ. އެންމެ ކުޑަ އަގު އަކަމީޓަރަކަށް 174.92 ޑޮލަރުގެ ރޭޓާ އަޅައިކިޔައިފިނަމަ އަހަރެއްގެ މައްޗަށް ނަވާވީސް މިލިއަން ހަތްސަތޭކަ އަށްޑިހަ ހަހާސް ފަސްސަތޭކަ އެގާރަ ޑޮލަރު ހަތްދިހަ ދެ ސެންޓު، އެމްއޭސީއެލަށް ވާނެ ކަމަށް އޭސީސީން ވިދާޅުވެފައިވެއެވެ. ދެން ވިސްނަންވީ ކުއްޔަށްދޭން އެއްބަސްވާ މުއްދަތެކެވެ. ކުއްޔަށް ދޭ މުއްދަތު އިތުރުކުރި ވަރަކަށް ލިބޭ ގެއްލުން ބޮޑުވާނެއެވެ.
މައްސަލަ ބެއްލެވުމަށްފަހު އޭސީސީން ވަނީ އެމްއޭސީއެލް އިން އިސްލާހު ކުރަންޖެހޭ ކަންކަން އެތަނަށް އަންގަވައިފައެވެ. ރައީސް ނަޝީދު ވިދާޅުވެފައިވާ ފަދައިން މިމައްސަލަ ނިމެންވާނީ ދެފަރާތަށް ވެސް ގެއްލުން ވުމުގެ ބަދަލުގައި ފައިދާވާ ގޮތަށެވެ. ސަބަބަކީ ޓީއެމްއޭއަކީ ވެސް ރާއްޖޭގެ އިގްތިސާދުގައި މުހިންމު ކުންފުންޏަކަށްވާތީއެވެ.
