މާލޭ ސިޓީގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރުއެއް ހިންގަން ނިންމައި އެމަސައްކަތް މިއަދު ކުންފުންޏަކާ ހަވާލުކޮށްފިއެވެ.
މާލޭ ސިޓީކައުންސިލުން އެމަސައްކަތް ހަވާލު ކުރައްވާފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އެވެ. މި މަޝްރޫއު ކުރިއަށް ގެންދިއުމުގެ އެއްބަސްވުމުގައި އެ ކުންފުންޏާއި މާލޭ ސިޓީ ކައުންސިލާ ދެމެދުވަނީ އެއްބަސްވުމުގައި ސޮއި ވެސް ކޮށްފައެވެ. މި މަޝްރޫއަށް ގާތްގަނޑަކަށް ހަތަރު ސަތޭކަ ސާޅީސް ދެ މިލިއަން ރުފިޔާ ޚަރަދުވާނެ ކަމަށް ސިޓީކައުންސިލުން ވިދާޅުވިއެވެ.
މާލޭ ސިޓީގެ މަގުތަކުގައި ފެންބޮޑުވާ މައްސަލައާއި ޕާކިންގެ މައްސަލައަށް ބޮޑު ހައްލެއް މި މަޝްރޫއުގެ ދަށުން ލިބިގެންދާނެ ކަމަށްވެސް މާލޭ ސިޓީ ކައުންސިލުން ވިދާޅުވިއެވެ. އަދި މިމަޝްރޫއުގެ ދަށުން 416 މަގެއްވެސް ތަރައްގީވެގެންދާނެއެވެ. މި މަޝްރޫއު ކުރިއަށް ގެންދާނީ ފިޔަވަހިތަކަށް ބަހާލައިގެންނެވެ. ފުރަތަމަ ފިޔަވައްސަށް ވެސް 50.9 މިލިއަން ރުފިޔާ ޚަރަދު ވާނެ ކަމަށް މޭޔަރު ޝިފާ ވިދާޅުވިއެވެ.
މި މަޝްރޫއުގެ އެއްބަސްވުމުގައި މާލޭ ސިޓީގެ ފަރާތުން ސޮއި ކުރެއްވީ މޭޔަރ ޝިފާ މުހައްމަދެވެ. އާރުޑީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރ މޫސާ އަލީ މަނިކެވެ. މި މަޝްރޫގެ މުއްދަތަކީ ދެއަހަރާއި ހަ މަސްދުވަހެވެ.
މިއެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި މާލޭ ސިޓީގެ އިންތިޚާބީ ދާއިރާތަކުގެ މަޖިސް މެމްބަރުން ބައިވެރިވެ ވަޑައިގެންނެވިއެވެ.
