ދިރާސީ އައު އަހަރު މާދަމާ ފެށި ސްކޫލްތައް ހުޅުވުމުން، ސްކޫލްތައް ހިމެނޭ ސަރަހައްދުގައި ފުލުހުންގެ ދައުރު ފުޅާވެގެންދާނެ ކަމަށް ފުލުހުންގެ މީޑިއާއިން ވިދާޅުވެއްޖެއެވެ.
ފުލުހުން ވިދާޅުވީ ސްކޫލްތައް ހުޅުވުމުން މޭލާގެ ޓްރެފިކަށް އަންނާނެ ބަދަލުތަކާ އެއްގޮތަށް ފުލުހުންގެ މަސައްލަތްތައް ވެސް ބަދަލުވެގެން އަންނާނެ ކަމަށެވެ. "ސްކޫލްތައް ހުޅުވުމުން މާލޭގެ ޓްރެފިކަށް އަންނާނެ ބަދަލުތަކާ އެއްގޮތަށް ފުލުހުންގެ މަސައްކަތް ތަކަށްވެސް ބަދަލު އަންނާނެ. ޚާއްސަކޮށް ސްކޫލްތައް ހިމެނޭ ސަރަހައްދު ތަކުގައި ފުލުހުންގެ ދައުރު ފުޅާ ކުރެވޭނެ،" ފުލުހުން ވިދާޅުވިއެވެ.
ފުލުހުން ވިދާޅުވެފައިވަނީ މަގުމައްޗަކީ އެންމެނަށް ސަލާމަތްތެރި އަދި ރައްކާތެރި އަމާން ތަނެއްގެ ގޮތުގައި ބޭއްވުމަށް 24 ގަޑިއިރު މަސައްކަތް ކުރައްވަމުން ގެންދަވާ ކަމަށެވެ.
"މާލޭގެ މަގުތަކުގައި ޕާކު ކުރުމަށްހުރި ދަތިތަކާއި ޤަވާއިދާ ޚިލާފަށް ޕާކު ކުރުމުން، މަގުމަތި ބޭނުންކުރައްވާ ފަރާތްތަކަށް ދިމާވާ ދަތިތަކަށް ހައްލު ހޯދުމަށް، ކަމާ ގުޅުންހުރި ހުރިހާ ފަރާތްތަކާ މަޝްވަރާކޮށް އެކަމުގެ ހައްލު ހޯދުމަށްދަނީ މަސައްކަތްކުރަމުން،" ފުލުހުން ވިދާޅުވިއެވެ.
