އިންޑިޔާގެ ވެރިރަށް ނިއުދިއްލީގައި ހުންނަ ޖަވާހަރްލާލް ނެހްރޫ ޔުނިވަސިޓީ (ޖޭއެންޔޫ) ގެ ދަރިވަރުންނާއި ޓީޗަރުންނަށް ހަމަލާދީ 23 މީހުން ޒަޚަމްކޮށްލައިފިއެވެ. މިކަން ކޮށްފައިވަނީ ކަނާތު ފިޔައިގެ ކިޔަވާކުދިންގެ ޖަމާއަތަކުން ކަމަށް ވެއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި ދަރިވަރުންނާއި ޓީޗަރުންނަށް ހަމަލާދިން ޖަމާއަތަކީ ބޮޑުވަޒީރު ނަރެންދްރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އާއި ގުޅުން އޮންނަ ޖަމާއަތެކެވެ.
މީސް މީޑިޔާގައި އާއްމުވެފައިވާ ބައެއް ވީޑިއޯތަކުން ފެންނަ ގޮތުގައި ދަރިވަރުންނަށް ހަމަލާދެނީ މޫނު ނިވާކޮށްގެން، ލަޓިބުރިއާއި، ބޮޑު މަރުތެޔޮ ހިފައިގެން ތިބި ބައެކެވެ. ރޭ އިރާކޮޅު ގާތްގަނޑަކަށް 6:30 ހާއިރު ޔުނިވަސިޓީ ކެމްޕަސް ތެރެއަށް ވަން އެ މީހުން 3 ގަޑިއިރު ވަންދެން ދަނާލުތަކަށް ވަދެ ދަރިވަރުންނާއި ޓީޗަރުންނަށް ހަމަލާދީފައިވާ ކަަމަށް ވެއެވެ.
މަންޒަރު ދުށް ބައެއް މީހުން ކިޔައިދީފައިވާ ގޮތުގައި، މި ހަމަލާދީފައި ވަނީ، ދަރިވަރުން އަތުން ނަގާ ދަނާލު ފީ ބޮޑުކުރުމާ ގުޅިގެން އެ މައްސަލައާ މެދު ވާހަކަ ދެއްކުމަަށް ޖޭއެންޔޫ ޓީޗާސް އެސޯސިއޭޝަންގެ ބައްދަލުވުމެއް ބޭއްވުމާ ގުޅިގެންނެވެ. މީގެ ތިން މަހެއްހާ ދުވަސް ކުރިން ދަނާލު ފީތައް ބޮޑުކުރި ފަހުން ޖޭއެންޔޫގައި ދޭތެރެ ދޭތެރެއިން އެކަމާ ދެކޮޅަށް އިހުތިޖާޖުކޮށްފައި ވެއެެވެ.
ޔުނިވަސިޓީގެ އެދުމުގެ މަތިން ފުލުހުން ވަނީ ޖޭއެންޔޫގެ ކެމްޕަސް ތެރެއަށް ވަދެ، ހަަމަނުޖެހުން ކޮންޓުރޯލު ކޮށްފައެވެ.
"(ކެމްޕަހަށް) ވަންނަން އެދުނީ ޔުނިވަސިޓީގެ އިދާރާއިން، މިހާރު އެކަން ވަނީ ކޮންޓްރޯލުކުރެވިފައި." ނިއުދިއްލީ ފުލުހުންގެ އިސް އޮފިސަރަކު ވިދާޅުވިއެވެ.
ގިނަ ފަރާތްތަކަކުން ތުހުމަތުކުރާ ގޮތުގައި މިހަމަލާގެ ފަހަތުގައި ވަނީ ބީޖޭޕީއަށް ތާއީދުކުރާ ކިޔަވާކުދިންގެ ޖަމްއިއްޔާއެއް ކަމަށްވާ އަކިލް ބާރަތިޔާ ވިދްޔާރްތީ ޕަރީޝަދް (އޭބީވީޕީ) އެވެ. އެ ޖަމްއިއްޔާއިން މިިކަން ދޮގުކޮށްފައިވާ އިރު، ބީޖޭޕީން ވެސް ވަނި އެ ޖަމްއިއްޔާއާއި ބީޖޭޕީ އާއި ގުޅުން އޮންނަކަން ދޮގުކޮށްފައެވެ.
ޖަވާހަރްލާލް ނެހްރޫ ޔުނިވަސިޓީއަކީ 1969 ވަނަ އަހަރު އިންޑިޔާ ސަރުކާރުން އުފެއްދި ޔުނިވަސިޓީއެކެވެ. އެ ޔުނިވަސިޓީގައި 8400 ދަރިވަރުން ތައުލީމު ހާސިލުކުރަމުން ދެއެވެ.
