އިންޑިޔާގެ ކަންކޮޅުތަކުގައި އެތައް ހާސް ބަޔަކު ނުކުމެ އެ ގާނޫނަކާ ދެކޮޅަށް މުޒާހަރާކުރަމުންދާ ރަށްވެހިކަމުގެ ގާނޫނާ ގުޅޭ ގޮތުން އިންޑިޔާގެ ހޯމް މިނިސްޓަރު އަމިތު ޝާހު ދައްކަވާފައިވާ ވާހަކަފުޅާ ދެކޮޅަށް އިއްޔެ ބޮޑުވަޒީރު ނަރެންދްރަ މޯދީ ވާޙަކަފުޅުދައްކަވައިފިއެވެ.
އިއްޔެ ނިއުދިއްލީގައި އޮތް އިންތިޚާބީ ކެންޕޭން ޖަލްސާއެއްގައި ވާހަކަފުޅުދައްކަވަމުން މޯދީ ވިދާޅުވީ ރަށްވެހިކަމުގެ ގާނޫނަށް އިސްލާހު ގެނައުމުގެ ގާނޫނު، ސިޓިޒަންޝިޕް އެމެންޑްމަންޓް އެކްޓް (ސީއޭއޭ) އަށް އަމަލުކުރަން ފެށުމާއެކު އިންޑިޔާގެ ރަށްވެހިންގެ ރަޖިސްޓަރީ، ނޭޝަނަލް ރަޖިސްޓާ އޮފް ސިޓިޒެންސް (އެންއާރްސީ) އަލުން އެކުލަވާލަން ނިންމާފައި ނުވާކަމުގައެވެ.
"އިންޑިޔާގެ 130 ކުރޯޑު (1.3 ބިލިއަން* ރައްޔިތުންނަށް ޔަގީންކޮށްދޭން ބޭނުންވަނީ، އަހަރެންގެ ސަރުކާރު 2014 ވަނަ ވިރިކަމަށް އައީއްސުރެ، .... އޭރުއްސުރެ އަހަރުއްސުރެ މިއަދާ ހަމައަށް، އެއްވެސް ތަނެއްގައި އެންއާރްސީ އާ ބެހޭގޮތުން ވާހަކަ ދެކެވިފައި ނުވެއޭ.އެއީ ސުޕްރިމް ކޯޓުގެ އަމުރަކަށް ހަމައެކަނި އަސާމްގައި އަހަރުމެން ކުރި ކަމެއް." މޯދީ ވިދާޅުވިއެވެ.
އެހެންނަމަވެސް، އިންޑިޔާގެ ބާރުގަދަ ހޯމް މިނިސްޓަރު އަދި ބޮޑުވަޒީރު މޯދީގެ އެންމެ އަރިސް ބޭފުޅާ، އަމިތު ޝާހު ފާއިތުވި ދެ އަހަރު ތަކުރާރުކޮށް ވިދާޅުވެފައި ވަނީ މުޅި އިންޑިޔާގައި އެންއާރްސީ އަލުން އެކުލަވާލާނެ ކަމުގައެވެ.
"ތިޔަބޭފުޅުން ގަބޫލުފުޅުކުރައްވާ، އެންއާރްސީ އަންނާނެ." އިންޑިޔާގެ ގާނޫނުހަދާ މަޖިލީހުގެ ތިރީ ގެ، ލޯކްސަބާގައި ވާހަކަފުޅުދައްކަވަމުން އަމިތު ޝާހު ވިދާޅުވެފައި ވެއެވެ. "ފުރަތަމަ ތަންފީޒު ކުރާނީ ރަށްވެހިކަމުގެ ގާނޫނު އިސްލާހުކުރުމުގެ ގާނޫނު، ދެން އާންނާނީ އެންއާރްސީ." އެހެން ތަނެގައި ވާހަކަފުޅު ދައްކަވަމުން ހޯމް މިނިސްޓަރު ވިދާޅުވެފައި ވެއެވެ.
ބޮޑުވަޒީރު މޯދީ އެންއާރްސީގެ ވާހަކަ ދޮގުކުރެއްވި ނަމަވެސް، މިއަހަރު އިންތިޚާބުގައި މޯދީގެ ޕާޓީ، ބާރަތިޔާ ޖަނަތާ ޕާޓީ (ބީޖޭޕީ) އިން ނެރުނު މެނިފެސްޓޯގައި ވެސް އެންއާރްސީގެ ވާހަކަ އޮތެވެ.
"އަހަރުމެން ހަލުވިކަމާ ފުރިހަމަކަމާ އެކު އެންއާރްސީ އެކުލަވާލުމުގެ މަސައްކަތް، އިސްކަންދޭ ތަރުތީބުން، ކުރިއަށް ގެންދާނަން. މުސްތަގުބަލުގައި އަހަރުމެން ފިޔަވަހިތަކަކަށް ބަހާލައިގެން މުޅިގައުމުގައި އެންއާރްސީ އެކުލަވާލާނަން." ބީޖޭޕީގެ މެނިފެސްޓޯގައި ވެއެވެ.
އިންޑިޔާގެ މަޝްހޫރު ބައެއް ނޫސްތަކުން ބުނެފައިވާ ގޮތުގައި، އޭނާ ސަރުކާރާ އެންއާރްސީއާ ގުޅުމެއް ނެތްކަމަށް ހައްދަވަން ބޮޑުވަޒީރު މޯދީ މަސައްކަތްޕުޅު ކުރައްވަނީ، ރަށްވެހި ކަމުގެ ގާނޫނާ މެދު ރައްޔިތުންގެ މެދުގައި އުފެދިފައިވާ ރުޅިވެރިކަން މައިތިރިކުރެއްވޭތޯއެވެ.
އިންޑިޔާގެ ރަށްވެހިކަމަށް އިސްލާހު ގެނައުމުގެ ގާނޫނު އިންޑިޔާގެ ގާނޫނުހަދާ މަޖިލީހުގެ ދެގެއިން ފާސްކުރުމާ ގުޅިގެން އަފްޣާނިސްތާނާއި، ޕާކިސްތާނާއި، ބަންގްލަދޭޝްއިން އެތައް އަހަރެއް ކުރިން އިންޑިޔާއަށް އެތެރެވެ އިންޑިޔާ މީހުންގެ ގޮތުގައި ދިރިއުޅެމުން ގޮސްފައިވާ މީހުންގެ ތެރެއިން މުސްލިމުން ނޫން މީހުންނަށް އިންޑީޔާގެ ރަށްވެހިންނަށް ވެވޭނެއެވެ.
