އެންވަޔަރަންމަންޓް އިމްޕެކްޓް އެސެސްމަންޓް (އީއައިއޭ) މިހާރު ހަދަމުންދާ ގޮތަށް ބަދަލު ގެންނަންޖެހޭ ކަމަށް އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން ވިދާޅުވެއްޖެއެވެ.
އެތަނުގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ އީއައިއޭ ހަދަން ކުރީބައިގައި ތައްޔާރުވެ އެކަމަށް އެކަށީގެންވާ ވަގުތު ދޭންޖެހޭ ކަމަށެވެ. އެހެންނޫން ކަމަށްވާނަމަ އެންމެ އެކަށީގެންވާ ދިރަސާއެއް ހެދުމަކީ ނާދިރު ކަމެއް ކަމަށް ވެދާނެ ކަމަށް އޭނާ ވިދާޅުވިއެވެ.
ރާއްޖޭގެ ތިމާވެއްޓަކީ ނާޒުކު ވެއްޓެއް ކަމަށާއި ތިމާވެއްޓަށް ލިބޭ ކޮންމެ ގެއްލުމަކީ މުޅިގައުމަށް ލިބިގެންދާ ދެރައެއް ކަމަށް ވެސް ވިދާޅުވިއެވެ. އެހެން ކަމުން ތިމާވެށީގެ ގޮތުން ލިބިދާނެ ގެއްލުންތަކެއް ބެލުމަށް ކުރާ މަސައްކަތް ވީހާވެސް ރަނގަޅަށް ކުރަންޖެހޭ ކަމަށް އޭނާ ވިދާޅުވިއެވެ.
"ކުރިޔާލައި ތައްޔާރީތައްވެ އެކަށީގެންވާ ވަގުތު އީއައިއޭ ޕްރޮސެސް އަށް ދޭންޖެހޭ،" ނައީމް ވިދާޅުވިއެވެ.
ރަށްރަށުގައި ތަރައްގީގެ ތަފާތު ޕްރޮޖެކްޓް ހިންގުމުގެ ކުރިން އީއައިއޭ އަކީ ހަދަން ޖެހޭ އެއްޗެކެވެ. އެންމެ ރަނގަޅުގޮތަކީ އެ އެއިން ދައްކާ ގޮތަކަށް އެކަމެއް ކުރުމެވެ. އެހެންނަމަވެސް އެރަށެއްގެ ރައްޔިތުން ބޭނުންވެއްޖެ ކަމަށްވާނަމަ އެރިޕޯޓާ ޚިލާފަށް ވެސް ބައެއް މަޝްރޫޢުތައް ކުރިން ހިނގާފައިވާކަން ވަނީ ފާގަކުރެވިފައެވެ. އެހެންނަމަވެސް އެއާ ޚީލާފަށް ހިންގާ މަޝްރޫޢުތަކުން ލިބޭ ފައިދާއަށްވުރެ ބޮޑަށް ލިބިފައިވަނީ ގެއްލުމެވެ. މިހާރުވެސް ރާއްޖޭގެ އެތަންމިތާގައި ތަރައްގީގެ ތަފާތު މަޝްރޫޢުތައް ހިންގެވުމަށް އީއައިއޭ ހަދަންވަނީ ޙަވާލުކޮށްފައެވެ. އެކަން ވީހާވެސް ރަނގަޅަށް ކުރުމަކީ ރާއްޖޭގެ ނާޒުކު ތިމާވެށީގެ ސަލާމަތަށްޓަކައި ވަރަށް މުހިންމު ކަމެއް ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ މިހާރު އަމަލުކުރަމުންދާ ގަވާއިދަށް ވެސް ވަރަށް އަވަހަށް އިސްލާހު ގެންނަން ޖެހޭ ކަމަށެވެ.
