އެމްޑީޕީގެ ޑެޕިޔުޓީ ސެކްރެޓަރީޖެނެރަލް ކަމުގެ މަގާމު މިހާރު ފުރުއްވަމުން ގެންދަވާ އަފްޝަން ލަތީފް މާލޭގެ މޭޔަރު ކަމަށް ކުރިމަތިލައްވަން ނިންމަވައިފިއެވެ.
އޭނާ ކުރެއްވި ޓުވީޓެއްގައި ވިދާޅުވެފައިވަނީ ލާމަރުކަޒީ ގާނޫނަށް ގެންނެވި އިސްލާހުތަކުގެ ސަބަބުން ރާއްޖޭގައި ހަގީގީ ލާމަރުކަޒީ ނިޒާމެއް ގާއިމް ކުރުމުގެ އުންމީދު އާވެއްޖެ ކަމަށެވެ. "މި އުންމީދާއެކު އަޅުގަނޑު މާލެ ސިޓީ މޭޔަރުގެ މަގާމަށް ކުރިމަތިލާން ވިސްނާ ވާހަކަ ދަންނަވަން،" އަފްޝަން ވިދާޅުވެފައިވެއެވެ. މާލޭ ސިޓީގެ މޭޔަރަކަށް މިހާރު ވެސް އިންނެވީ އަންހެން ބޭފުޅެކެވެ. ޝިފާ މުޙައްމަދުގެ ދައުރަށްފަހު އަނެއްކާވެސް އަންހެން ބޭފުޅަކަށް ފުރުސަތު ދެއްވުމަކީ ލާމަރުކަޒީ ގާނޫނުން އަންހެނުނަށް ކަށަވަރުވެގެންދިޔަ ގޮނޑިތައް ފުރާލުމަށް މާލޭ ސިޓީގެ ރައްޔިތުންނަށް ލިބިގެންދާނެ ފުރުސަތެކެވެ.
"އަޅުގަނޑުގެ އުންމީދަކީ މާލޭ ސިޓީގައި ދިރިއުޅޭ ހުރިހާ ރައްޔިތުންނަށް ހިތްފަސޭހަ ކަމާއި ހިތްހަމަޖެހުމާއި ރައްކާތެރި ކަމާއެކު ދިރިއުޅެވޭނެ މާހައުލެއް ޔަގީންކޮށްދީ ޖާޒީރާ ރާއްޖޭގެ އެޖެންޑާ ނަވާރައިގެ ސިޔާސަތުގެ ތެރެއިން ދުރު ރާސްތާއަށް އަމާޒުކޮށް ދެމެހެއްޓެނިވި ތަރައްގީ ހާސިލް ކުރުން،" އަފްޝަން ވިދާޅުވެފައިވެއެވެ.
ލާމަރުކަޒީ ގާނޫނު އިސްލާހުކޮށް މިމަހު 15 ވަނަ ދުވަހު ރައީސް ވަނީ ތަސްދީގު ކުރައްވައިފައެވެ. ކައުންސިލަ ތަކުގެ 33 ޕަސެންޓު އަންހެނުންނަށް ލިބޭ ގޮތަށް އެ ގާނޫނުގައި ވަނީ ހިމަނާފައެވެ.
