ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު ޗައިނާއާ ބެހޭގޮތުން ދެއްކެވި ވާހަކަތަކަށް އެގައުމުން ރައްދު ދެއްވައިފިއެވެ.
ރާއްޖޭގައި ހުންނަވާ ޗައިނާގެ ސަފީރު ޒޭންގް ލިޒޮންގ ރައީސް ނަޝީދުގެ ވާހަކަތަކަށް ރައްދު ދެއްވައިފައިވަނީ އޭނާ ކުރެއްވި ޓުވީޓުތަކެއްގައެވެ.
ސަފީރު ކުރައްވާފައިވާ ޓުވީޓެއްގައި ވަކި ބޭފުޅެއްގެ ނަންނަ ހާމަނުކުރައްވައި ވިދާޅުވެފައިވަނީ ރާއްޖޭގެ ސިޔާސީ ބޭފުޅަކު އެއްވެސް ޙަގީގަތެއްނެތް ހައްސާސް ވާހަކަތަކެއް އަނެއްކާވެސް އެގައުމާ ބެހޭގޮތުން ދައްކަވައިފައިވާ ކަމަށެވެ. ރާއްޖޭގެ ބިންތަކެއް ޗައިނާއިން އަތުލައިގަނެފައިވާ ކަމަށް ވިދާޅުވެފައިވާއިރު އެއީ އެއްވެސް އަސާސެއްނެތި ދައްކާފައިވާ ވާހަކައެއް ކަމަށް ސަފީރު ވިދާޅުވިއެވެ. ޗައިނާއިން ރާއްޖޭގައި ކޮށްފައިވާ އިންވެސްޓްމެންޓްތައް އެހެން ގައުމުތަކާ ތަފާތެއްނެތް ކަމަށް ސަފީރު ފާހަގަ ކުރެއްވިއެވެ. ރާއްޖޭގެ ފަތުރުވެރިކަމުގެ ދާއިރާގައި މިހާތަނަށް އިންވެސްޓް ކޮށްފައިވަނީ ޗައިނާގެ ވަރަށްމަދު ކުންފުނިތަކަކުންކަން ފާހަގަ ކުރައްވައި އެތަންތަނުގެ ޚިދުމަތް ވެސް އަދި ނުވެސް ފެށޭކަން ސަފީރު ވަނީ ފާހަގަ ކުރައްވައިފައެވެ.
ދަރަނީގެ ދަންތުރައެއްގައި ޖައްސައިފައިވޭތޯ ސުވާލު އުފައްދަމުން ސަފީރު ވިދާޅުވީ ޗައިނާއަކީ ދަންތުރަ ޖައްސާ ޤައުމެއްނޫން ކަމަށާއި، އެއީ އެހީތެރިކަން ފޯރުކޮށްދޭ ރާއްޖޭގެ ތަރައްގީގެ ބައިވެރިއެއް ކަމަށެވެ. އަދި ޗައިނާއަކީ ރާއްޖެއަށް ގިނަފަތުރުވެރިން އަންނަ ގައުމެއްކަންވެސް ސަފީރު ވަނީ ފާހަގަ ކުރައްވައިފައެވެ.
ރައީސް ނަޝީދު ޗައިނާއާ ބެހޭ ގޮތުން އަނެއްކާވެސް ތަފާތު ވާހަކަތަކެއް ދައްކަވައިފައި މިވަނީ ރައްޔިތުންގެ މަޖިލީހުގެ ވަފުދަކާއެކު އިންޑިއާގެ ގާނޫނުހަދާ މަޖިލީހުގެ ދައުވަތަކަށް ކުރެއްވި ރަސްމީ ދަތުރުފުޅެއްގައި "ލޮކް ސަބާ ޓީވީ" އަށް ދެއްވި ބަސްދީގަތުމެއްގައެވެ.
ރައީސް ނަޝީދު ވިދާޅުވެފައިވަނީ ކުރީގެ ރައީސް ޢަބްދުﷲ ޔާމީންގެ ސަރުކާރުން ޗައިނާއާއެކު ވެފައިވާ އެއްބަސްވުންތަކުގެ ސަބަބުން ދަރަނީގެ ދަންތުރައެއްގައި ރާއްޖެ ޖެހިފައިވާ ކަމަށެވެ. އަދި ކުރީގެ ސަރުކާރުން ޗައިނާއާއެކު ވެފައިވާ މިނިވަން ފިޔަފާރީގެ އެއްބަސްވުންވެސް ކުރިއަށް ނުގެންދާނެ ކަމަށް ރައީސް ނަޝީދު ވަނީ ވިދާޅުވެފައެވެ.
ދެގައުމުގެ ދެމެދުގައި ވެފައިވާ މިނިވަން ފިޔަފާރީގެ އެއްބަސްވުމަކީ އެތައް އަހަރެއްވަންދެން ކުރެވުނު މަޝްވަރާތަކަކަށްފަހު ވެފައިވާ އެއްބަސްވުމެއްކަން ޗައިނާގެ ސަފީރުގެ ޓުވީޓުގައި ވަނީ ފާހަގަ ކުރައްވައިފައެވެ. އެހެން ކަމުން އެއްބަސްވުމާމެދު ދިވެހިސަރުކާރުން ނިންމުމެއް ނިންމާނީ އެންމެ ރަނގަޅުގޮތަށް ކަމާމެދު އިތުރުބާރު ކުރައްވާ ކަމަށް ސަފީރު ވިދާޅުވިއެވެ.
"ދެގައުމުގެ ދެމެދުގައި އުފެދިފައިވާ ގުޅުމަށް ރާއްޖޭގެ ސިޔާސީ ބޭފުޅުން. ޒިންމާދާރުކަމާއެކު ޢަމަލުކުރާނެ ކަމަށް އަހަރެމެން އުންމީދުކުރަން. ދެގައުމުގެ ދެމެދުގައި އުފެދިފައިވާ ގާތްގުޅުޅުމާމެދު އުފާކުރަން. ކުރިއަށްއޮތްތަނުގައި ވެސް ދެ ގައުމުގެ ގުޅުން ދުޅަހެޔޮކަންމަތީ ދެމިގެންދާނެ ކަމަށް އުންމީދުކުރަން،" ރަރީސް ނަޝީދާއި ރައީސް އިބްރާހީމް މުޙައްމަދު ޞާލިހާއި ފޮރިން މިނިސްޓަރ ޝާހިދު ޓެގުކޮށް ކުރައްވައިފައިވާ ޓުވީޓެއްގައި ޗައިނާގެ ސަފީރު ވިދާޅުވެފައިވެއެވެ.
ރައީސް ނަޝީދު ޗައިނާއާ ގުޅޭގޮތުން ދައްކަވާ ވާހަކަފުޅުތަކާ ގުޅިގެން ދޭތެރެދޭތެރެއިން ޗައިނާގެ ސަފީރާއި އެމަނިކުފާނާ ދެމެދު ބަހުގެ ހަމަލާތައް ބަދަލު ކުރެވެއެވެ.
