އަލްޖީރިޔާ (އަލްޖަޒާއިރު) ގެ ކުރީގެ ރައީސު ޢަބްދުލްޢަޒީޒު ބޫތަފްލީޤާގެ އިސްތިއުފާއަށް ފަހު، އާ ރައީސަކު ހޮވަން އެގައުމުގައި އިންތިޚާބު ބާއްވައިފިއެވެ.
މި އަހަރުގެ އެޕްރީލް މަހުގެ 2 ވަނަ ދުވަހު ބޫތަފްލީޤާ އިސްތިއުފާދެއްވީ، އޭނާގެ އިސްތިއުފާއަށް ގޮވައި ގިނަ ބަޔަކު ނުކުމެ އިހުތިޖާޖުކުރަމުން ދަނިކޮށެވެ. ބޫތަފްލީޤާގެ އިސްތިއުފާއަށް ފަހު ވަގުތި ސަރުކާރާ ހަވާލުވީ އޭނާގެ ގާތް އެކުވެރިނެވެ.
ބޫތަފްލީޤާގެ އިސްތިއުފާއަށް ފަހު މުޒާހަރާތައް ބަދަލުވެގެން ދިޔައީ ގައުމަށް ޑިމޮރެޓިކް އިސްލާހުތައް ގެނެސް، ވަކި ފަރާތަކަށް ނުޖެހޭ ވަގުތީ ސަރުކާރެއް އެކުލަވާލައި، އެ ސަރުކާރުގެ ބެލުމުގެ ދަށުން އާ ގާނޫނު އަސާސީއެއް އެކުލަވާލުމަށް ފަހު ރިޔާސީ އިންތިޚާބު ބޭއްވުމަށެވެ. އެހެންނަމަވެސް، އަސްކަރިއްޔާ ފަހަތުގައި އޮވެގެން ބުރާސްފަތި ދުވަހު އިންތިޚާބު ބޭއްވީ އިހުތީޖާތުކުރާ މީހުންގެ އަޑު އެހުމެއް ނެތި މިހާރު އޮތް ވަގުތި ސަރުކާރުގެ ބެލުމުގެ ދަށުންނެވެ.
އިންތިޚާބު ކުރިއަށް ދިޔައިރުވެސް އިހުތިޖާޖުތައް ނުހުއްޓައި އެމީހުން ގޮވާލާފައި ވަނީ އިންތިޚާބު ބޮއިކޮޓް ކުރުމަށެވެ. އެހެންކަމުން ބުރާސްފަތި ދުވަހުގެ އިންތިޚާބު ވެގެން ގޮސްފައި ވަނި އަލްޖީރިޔާގެ ތާރީޚުގައި އެންމެ މަދުން މީހުން ވޯޓުލީ އިންތިޚާބަށެވެ.
ވޯޓުލުމުގެ ހައްގު ލިބިފައިވާ 24 މިލިއަނަށްވުރެ ގިނަ މީހުންގެ ތެރެއިން ވޯޓުލާފައި ވަނީ 9 މިލިއަން މީހުންނެވެ. އެއީ %39 އެވެ. އަދި މި 9 މިލިއަން ވޯޓުގެ ތެރެއިން 1.2 މިލިއަން ވޯޓަކީ ބާޠިލު ވޯޓެވެ. އެއީ ގަސްތުގައި ބާޠިލުކޮށްފައިވާ ވޯޓުތައް ކަމުގައި ބެލެވެއެވެ.
ބަރާސްފަތި ދުވަހު ވޯޓުގެ ރަސްމީ ނަތީޖާ އިއްޔެ އިއުލާންކުރި އިރު ވޯޓުގެ %58 (ވޯޓުލުމުގެ ހައްގު ލިބިފއިވާ މީހުންގެ 20%) ހޯއްދަވައިގެން އިންތިޚާބު ކާމިޔާބު ކުރެއްވީ ޢަބްދުލްމަޖީދު ތަބޫންއެވެ. އޭނާއަކީ ކުރީގެ ރައީސު ބޫތަފްލީޤާގެ ގާތް އެކުވެރިއެކެވެ. އަދި 2017 ވަނަ އަހަރު އޭނާގެ ބޮޑުވަޒީރުކަން ކުރެއްވި ބޭފުޅެކެވެ.
މި ނަތީޖާ ގަބޫލުނުކޮށް އަލްޖީރިޔާ މީހުން ވަނީ އިއްޔެ މަގުމައްޗަށް ނުކުމެ އިހުތިޖާޖުކޮށްފައެވެ. އިއްޔެއަކީ މެދުނުކެނޑި އިހުތިޖާޖުކުރި 43 ވަނަ ހުކުރު ދުވަހެވެ. އިހުތިޖާޖުކުރި މީހުން ވަނީ "ﷲ އަކްބަރު! މަކަރު ހަދާފައިވާ އިންތީޚާބެއް. ﷲ އަކްބަރު! އަހަރުމެން ވޯޓެއް ނުލަން. ކަލޭމެންގެ ރައީސަށް އަހަރުމެންގެ މައްޗަށް ވެރިކަމެއް ނުކުރެވޭނެ" ގޮވަމުން މުޒާހަރާކޮށްފައެވެ.
އަލަށް ރައީސުކަމާ ހަވާލުވެވަޑަގަތް ތަބޫން ވަނީ ޑިމޮކްރަސީ ހަރަކާތުގެ ވެރިންނާ މަޝްވަރާކުރައްވަން ބޭނުންފުޅުކަމަށާ، އާ ފެށުމަކުން ފަށައި، އާ ގާނޫނު އަސާސީއެއް އެކުލަވާލުމުގެ މަސައްކަތް ފެށުމަށް ތައްޔާރަށް ހުންނެވި ކަމަށް ވިދާޅުވެފައެވެ. އެހެންނަމަވެސް، އިހްތިޖާޖުގެ ހަރަކާތުން އޭނާގެ ގޮވައިލުމަށް އަދި އިޖާބައެއް ނުދެއެވެ.
