މިޔަންމާގެ އަސްކަރިއްޔާއިން ރޮހިންޖާ މުސްލިމުންގެ ނަސްލު ނައްތާލަން ހިންގާފައިވާ ޖަރީމާތަކުގެ ޝަރީޢަތް އިންޓަނޭޝަލަން ކޯޓް އޮފް ޖަސްޓިސް (އައިސީޖޭ) ގައި ފަށައިފިއެވެ.
މިޔަންމާގެ ލީޑަރު އާންގް ސަން ސޫޗީގެ ހާޒިރުގައި ދައުވާ ހުށަހަޅުއްވަމުން ގެންބިޔާގެ ޖަސްޓިސް މިނިސްޓަރު އަބޫބަކަރް ޓަމްބަޑޫ ވަނީ މިޔަންމާގައި ބައިމަދު ރޮހިންޖާއިންނާ ދެކޮޅަށް ހިންގާފައި ވަނީ ނަސްލުނައްތާލުމުގެ ޖަރީމާތަކެއް ކަން ގަބޫލުކޮށް ދެން އެކަން ތަކުރާނުވާނެ ގޮތް ހެދުމަށް އައިސީޖޭއަށް އިލްތިމާސްކުރައްވާފައެވެ.
"ގެންބިޔާއިން އެދޭހާވެސް ކަމަކީ އިންސާނީ ހަމަބުއްދި ގަބޫލުނުކުރާ އެ ގަތުލު އާއްމު ހުއްޓުވުމަށް ތިޔަ ބޭފުޅުން މިޔަންމާއަށް އެންގެވުން." ގެންބިޔާގެ ގާނޫނީ ޓީމުގެ ފަރާތުން ވާހަކަފުޅުދައްކަވަމުން ޖަސްޓިސް މިނިސްޓަރު ވިދާޅުވިއެވެ.
" 'ދެން ދުވަހަކުވެސް އެކަން ނުހިނގާނެ ކަމަށް އިންސާނިއްޔަތު އެއްބަސްވިތާ 75 އަހަރު ފަހުން އަނެއްކާވެސް ނަސްލު ނައްތާލުމުގެ އަމަލުތަކެއް އަހަރުމެންގެ ލޯމަތީގައި ހިނގަމުން ދިއުމަކީ ހަގީގަތުވެސް ހިތާމަކުރަން ޖެހޭ ކަމެއް." މިނިސްޓަރު އަބޫބަކަރް ޓަމްބަޑޫ ވިދާޅުވިއެވެ.
މިޔަންމާއިން ހިންގާފައިވާ ޖަރީމާތަކުގެ ތަފްސީލު ގެންބިޔާގެ ޖަސްޓިސް މިނިސްޓަރު ހުށަހަޅުއްވަމުން ގެންދެވިއިރު، ސުލްހައިގެ ނޯބަލް އިނާމު ހާސިލުކުރައްވާފައިވާ މިޔަންމާގެ ލީޑަރު އަޑުއައްސަަވަން އިންނެވިއެވެ. މިއަދުގެ ވަގުތެއްގައި މިޔާންމާގެ ފަރާތުން ވާހަކަދައްކަވައި، ގެންބިޔާއިން ކުރާ ތުހުމަތުތައް އޭނާ ދޮގުުކުރައްވާނެ ކަމަށް ބެލެވެއެވެ.
ސޫޗީ މީގެ ކުރިންވެސް ވިދާޅުވަމުން ގޮސްފައި ވަނީ މިޔަންމާގެ އަސްކަރިއްޔާއިން އޮގަސްޓް 2017 ގައި ހިންގި އޮޕަރޭޝަނަކީ "ރޮހިންޖާ ހަނގުރާމަވެރިންގެ ޓެރަރިސްޓު ހަމަލާތަކަށް ރައްދުދިނުމުގެ ގޮތުން ގާނޫނީ ގޮތުން ކުރިއަށް ގެންގޮސްފައިވާ ސާފުކުރުމުގެ އޮޕަރޭޝަނެެއް" ކަމުގައެވެ.
މިޔަންމާއިން މިހެން ބުނި ނަމަވެސް އިއްޔެ ގެންބިޔާގެ ވަކީލުން ވަނީ މިޔަންމާގެ އަސްކަރިއްޔާއިން ހިންގާފައިވާ ބައެއް ލާއިންސާނީ ޖަރީމާތަކުގެ ތަފްސީލު ހާމަކުރައްވާފައެވެ.
ރޮހިންޖާ އަވަށެއް ކަމުގައިވާ މިން ޖީގައި ހިންގާފައިވާ ޖަރީމާއެއްގެ ތަފްސީލު ހުށަހަޅުއްވަމުން ގާނޫނީ ވަކީލު އެންޑްރޫ ލޯވެންސްޓައިން ވިދާޅުވި ގޮތުގައި، އެއަވަށުގައި 6 އަހަރުން ދަށުގެ 100 އަށްވުރެ ގިނަ ކުޑަކުދިން ހިމެނޭހެން، 750 މީހުން މަރާލާފައިވާ ގޮތުގެ ތަފްސީލު އދ.ގެ ތަހުގީގު ޓީމުގެ ރިޕޯޓުގައި އެބަހުރި ކަމަށެވެ.
އައިސީޖޭ 17 ފަނޑިޔާރުންގެ ޕެނަލަކުން ކުރިއަން ގެންދާ ޝަރީއަތުގައި މި ހަފުތާގައި އޮންނާނީ ދެ ފަރާތުގެ ހުށަހެޅުންތައް އަޑުއެހުމެވެ.
ހުޅަނގު އެފްރިކާގެ މުސްލިމް ކުޑަ ގައުމެއް ކަމުގައިވާ ގެންބިޔާއިން މިޔަންމާގެ މައްސަލަ ހުށަހެޅީ ފާއިތުވި ނޮވެންބަރު މަހުގެ ތެރޭގައެވެ.
