މުލީއާގެ އަށް 100 އަހަރު ފުރުން ފާހަގަ ކުރުމަށް ރޭ ބޭއްވެވި ޖަލްސާގައި އެގެއަށް 20 އަހަރަށްވުރެ ދިގުމުއްދަތަށް ޚިދުމަތްކޮށްދެއްވި ބޭފުޅުންނަށް ހަނދާނީ ފިލާ ދެއްވައިފިއެވެ.
ޖުމްލަ 29 ބޭފުޅަކަށް މި ފިލާ ލިބިވަޑައިގެންނެވިއެވެ. އެހެންނަމަވެސް އެންމެ ޚާއްސަކޮށްލެވޭ ދެބޭފުޅުންނަކީ 49 އަހަރު ޚިދުމަތް ކޮށްދެއްވި އިބްރާހީމް ޒަކީއާއި 42 އަހަރު ޚިދުމަތް ކުރެއްވި އިބްރާހީމް ޙަލީމެވެ.
އެހެންނަމަވެސް ރޭގެ ރަސްމިއްޔާތުގައި އެ ދެބޭފުޅުންނަށް ފިލާ ޙަވާލުކޮށްދެވޭ ގޮތެއް ނުވިއެވެ. އެއީ ދެ ބޭފުޅުން ވެސް ޢުމްރާގެ މަތިވެރި އަޅުކަމަށް މައްކާއަށް ވަޑައިގެންފައިވާތީއެވެ. އެދެބޭފުޅުންނަށް ފިލާ ޙަވާލު ނުކުރެވުނަސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވަނީ އެދެބޭފުޅުންގެ ދިގުމުއްދަތުގެ ޚިދުމަތް ފާހަގަކުރައްވައި ޝުކުރު އަދާކުރައްވައިފައެވެ. އެދެބޭފުޅުންނަކީ ދެވަނަ ޖުމްހޫރިއްޔާގެ 6 ރައީސުންނާއެކު ވަރަށް އިޚްލާސްތެރިކަމާއެކު މަސައްކަތް ކުރެއްވި ދެ ބޭފުޅުން ކަމުގައި އެމަނިކުފާނުވެސް ވިދާޅުވިއެވެ.
އެ 6 ރައީސުންނަކީ ރައީސް އިބްރާހީމް ނާސިރު، ރައީސް މައުމޫން ޢަބްދުލްޤައްޔޫމް، ރައީސް މުޙައްމަދު ނަޝީދު، ރައީސް މުޙައްމަދު ވަޙީދު، ރައީސް ޢަބްދުﷲ ޔާމީން އަދި ރައީސް އިބްރާހީމް މުޙައްމަދު ޞާލިޙެވެ.
ރޭގެ ރަސްމިއްޔާތުގައި ރައީސުލްޖުމްހޫރިއްޔާގެ ނާއިބު ފައިޞަލް ނަސީމާއި، ކުރީގެ ރައީސުން ކަމަށްވާ ރައީސް މައުމޫން ޢަބްދުލްޤައްޔޫމާއި، ރައީސް މުޙައްމަދު ނަޝީދު ބައިވެރިވެ ވަޑައިގެންނެވިއެވެ.
