މާލެ ހުކުރު މިސްކިތުގެ މުންނާރާއި މިސްކިތުގެ ގޯތިތެރޭގައި ހުރި 4 ފެންވަޅު މަރާމާތު ކުރުމުގެ ފަހުމުނާމާއެއް އެއްގައި މިއަދު ސޮއިކޮށްފިއެވެ.
މާލޭ ހުކުރުމިސްކިތުގެ ގޯތިތެރޭގައި ހުރި 4 ފެންވަޅާއި މުންނާރު އާބާތުރަ ފިލުވައި މަރާމާތުކުރުމަށް ހިންގުމަށް ހަމަޖެހިފައިވާ މަޝްރޫޢުގެ ދަށުން މިފަހުމުނާމާގައި ސޮއިކޮށްފައިވަނީ މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖާއި، ސަގާފީ ތަރިކަ ރައްކާތެރިކުރާ ގައުމީ މަރުކަޒާއި ސްޓޭޓު އިލެކްޓްރިކް ކޮމްޕެނީންނެވެ. މި ފަހުމުނާމާގެ ދަށުން މި މަސައްކަތް ކުރާނީ އެއްބަސްވުމުގައި ސޮއިކޮށްފައިވާ ފަރާތްތައް ގުޅިގެންނެވެ.
މި ފަހުމުނާމާގެ ދަށުން މި ތިން ފަރާތުން ގުޅިގެން ކުރިއަށް އޮތް 4 އަހަރު މާލޭ ހުކުރުމިސްކިތުގެ ގޯތިތެރޭގައި ހުރި 4 ފެންވަޅާއި މުންނާރުގެ އާބާތުރަ ފިލުވައި، މަރާމާތު ކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.
މި މަސައްކަތަށް ޚަރަދުކުރާނީ ސަގާފީ ތަރިކަ ރައްކާތެރިކުރާ ޤައުމީ މަރުކަޒާއި ސްޓެލްކޯ ގުޅިގެންނެވެ. އަދި މަސައްކަތް ކުރަމުންދާއިރު ސްޓެލްކޯގެ ވަސީލަތްތައް ބޭނުންކުރުމަށްވަނީ ހަމަޖެހިފައެވެ. މި އެއްބަސްވުމުގެ ދަށުން މަސައްކަތަށް ބޭނުންވާ އިންސާނީ ވަސީލަތްތަކާއި ބައެއް މެޝިނަރީޒް ސްޓެލްކޯއިން ފޯރުކޮށްދެއްވާނެއެވެ.
މިނިސްޓްރީގެ ފަރާތުން މި ފަހުމުނާމާގައި ސޮއިކުރެއްވީ މިނިސްޓަރ އޮފް ސްޓޭޓް މުޙައްމަދު ޠާރިޤެވެ. ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޙަސަން މުޣުނީއެވެ. ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން ސޮއިކުރެއްވީ މިވަގުތު އެ މަރުކަޒު ހިންގެވުމާއި ހަވާލުވެވަޑައިގެން ހުންނެވި އެ މަރުކަޒުގެ ޑިރެކްޓަރ އާދަމް ނަސީރެވެ.
