ހުވަދުއަތޮޅު އުތުރުބުރީ ގެމަނަފުށީ ދެމީހަކު ރަސޫލުކަމަށް ދާއުވާ ކުރަމުންދާ ކަމަށްބުނެ ސޯޝަލް މީޑިއާގައި ފެތުރުނު ޚަބަރު އެރަށު ކައުންސިލުން ދޮގުކޮށްފިއެވެ.
ގެމަނަފުށީ ކައުންސިލްގެ ރައީސް ޢަބްދުﷲ ޝިޔާން ވިދާޅުވީ އެއީ ސިޔާސީ ވާހަކަތަކެއް ކަމަށެވެ. ސިޔާސީ ޚިޔާލު ތަފާތުވުމުގެ ތެރެއިން ދެއްކޭ ވާހަކައިގެ ސަބަބުން އެއްބަޔަކު ހިތްހަމަނުޖެހިގެން އެފަދަ ވާހަކައެއް ފެތުރީ ކަމަށް އޭނާ ތުހުމަތު ކުރެއްވިއެވެ. "އެއީ ބަޔަކު ތުހުމަތެއްކޮށް ފޭސްބުކުގައި ޙިއްސާކުރި ސިޔާސީ ޕޯސްޓެއް. އެ ޕޯސްޓު މިހާރުވަނީ ނަގާފައި،" ޝިޔާން ވިދާޅުވިއެވެ.
އޭނާ ވިދާޅުވީ ފުލުހުން މިހާރުވަނީ އެމައްސަލަ ބަލަން ފަށައިފައި ކަމަށެވެ.
ދީނީ ގޮތުން ތަފާތު ބަހުސްކުރެވި ތަފާތު ޚިޔާލު ގެންގުޅެމުންދާ ޙައްސާސް ދަނޑުވަޅެއްގައި ސިޔާސީ ގޮތުން ވެސް އަދި ސަމާސާއަކަށް ވެސް އެހެން މީހުންގެ ބޮލުގައި ދޮގު އިލްޒާމް އެޅުވުން ފަދަ ކަންކަން ނުކުރުމަށް އޭނާ އެދިވަޑައިގެންނެވިއެވެ.
