މެލޭޝިޔާގައި ދިރިއުޅޭ ދިވެހީންނަށް މެރަނާ (ދުޅަހެޔޮ) ސްކީމާ ބެހޭ މަޢުލޫމާތު ފޯރުކޮށްދީފީއެވެ.
މިމަޢުލޫމާތު ދިނުން އޮތީ މެލޭޝިޔާގައި ހުންނަ ރާއްޖޭގެ ހައިކޮޝަން ކައިރީގައި ހުންނަ ދި އައިކަން ޢިމާރާތުގައެވެ. މަޢުލޫމާތު ދިނުމުގެ މި ބައްދަލުވުމުގައި ގިނަ މީހުން ބައިވެރިވެ މަޢުލޫމާތު ހޯދިއެވެ.
މެރަނާ ސްކީމަކީ ސްރީލަންކާ، އިންޑީއާ އަދި މެލޭޝިއާގައި އުޅެމުންދާ ދިވެހިރައްޔިތުންނަށް ބޭސްފަރުވާ ކުރުމުގައި ލުއިފަސޭހަ ގޮތްތަކެއް ފަހިކޮށްދިނުމަށް ސަރުކާރުން ފަށައިފައިވާ ޕްރޮގްރާމެކެވެ. މަޢުލޫމާތު ދިނުމުގެ މި ބައްދަލުވުން ބޭއްވީ ނޮވެމްބަރު 24 ވަނަ ދުވަހު ހަވީރު 4:30 ގައެވެ. މި ބައްދަލުވުމުގައި ސްކީމާބެހޭ މަޢުލޫމާތު ދިނުމަށްފަހު ބައިވެރިންގެ ކުރި ސުވާލުތަކަށް ޖަވާބު ދިނުމުގެ ސެޝަނެއް ވެސް ކުރިއަށް ވަނީ ގެންގޮސްފައެވެ.
މިޚިދުމަތް މިވަގުތު މެލޭޝިއާގައި ދެވޭނީ "ޚިދުމަތް ލިބިގަތުމަށްފަހު ފައިސާ ހޯއްދެވުމަށް ރިއެމްބާސްމެންޓެއް ހުށަހަޅައިގެންނެވެ. "އެއީ ކޭޝްލެސް ޕްރީ އޮތޮރައިޒޭޝަން އުސޫލުން ފޮނުވުމަށް އެއްވެސް ހޮސްޕިޓަލަކާ މިވަގުތު އެގްރީމެންޓެއް ހެދިފައި ނުވާތީ،" ކަމަށް އާސަންދަ ކުންފުނިން ވިދާޅުވިއެވެ. މިކަންކަން ހައްލު ކުރުމަށް މެލޭޝިއާގެ ކަމާބެހޭ ފަރާތްތަކާ މިހާރު ދަނީ މަޝްވަރާ ކުރަމުންނެވެ.
