އެމްޑީޕީގެ މެމްބަރުން އަމާނާތްތެރި ކަމާއެކު ޙަވާލުކުރި މަސްއޫލިއްޔަތު އަދާ ކުރުމުގައި ފަހަތަށް ނުޖެހޭނެ ކަމަށް އެޕާޓީގެ ނާއިބު ރައީސް ކަމުގެ މަގާމަށް ހޮވިވަޑައިގެންފައިވާ މުޙައްމަދު ޝިފާޒު ވިދާޅުވެއްޖެއެވެ.
ޝީފާޒު ވިދާޅުވީ ނޮވެމްބަރު 22 ވަނަ ދުވަހު ނެގުނު އެމްޑީޕީގެ ލީޑަރޝިޕް އިންތިޚާބުގެ ވޯޓުގައި 24 ފޮށި ފިޔަވައި އެހެން ހުރިހާ ފޮއްޓެއްގެ ނަތީޖާ އޭނާއަށް ލިބިފައިވާ ކަމަށެވެ. އެ ފޮށިތަކުން ކުރީގައި އުޅެނީ އޭނާ ކަމަށަށް ވިދާޅުވިއެވެ. އޭނާ ކުރީގައި އުޅެނީ ވާދަވެރިޔާ މުޙައްމަދު އަސްލަމަށްވުރެ ގާތްގަނޑަކަށް 2700 ވޯޓު ގެ ތަފާތަކުން ކަމަށް ޝިފާޒު ވިދާޅުވިއެވެ.
"ނަތީޖާ ނުލިބޭ 24 ފޮށި އެއްކޮށް އަސްލަމަށް ލިބުނަސް އަޅުގަނޑާ އަރާހަމައެއް ނުކުރެވޭނެ، ނުވަތަ އަޅުގަނޑަށްވުރެ ކުރިއެއް ނުހޯދޭނެ. އެހެންވެ އަޅުގަނޑަށް މި އިންތިޚާބު ކާމިޔާބުވެއްޖެ ކަމަށް ނިންމައި ވޯޓު ދެއްވި ހުރިހާ ބޭފުޅުންނަށް ޝުކުރު ދަންނަވަން،" ޝިފާޒު ވިދާޅުވިއެވެ.
އޭނާ ވިދާޅުވީ އެމްޑީޕީގެ މެމްބަރުން އޭނާއަށް ކުރެއްވި އިތުބާރަކީ އަބަދުވެސް ބަލައިގަންނާނެ ކަމެއް ކަމަށެވެ. އިންތިޚާބަށް ނުކުންނެވިއިރުވެސް އެމްޑީޕީގެ މެމްބަރުންނާމެދު އެއްވެސް ޝައްކެއް ނުކުރައްވާ ކަމަށާއި އިންތިޚާބު "ބޮޑު ތަނުން" ކާމިޔާބު ކުރެވޭނެ ކަމުގެ ޔަޤީންކަން އޮތް ކަމަށް އޭނާ ވިދާޅުވިއެވެ. "އަޅުގަނޑު ދަންނަވާނީ ތިޔަ ޙަވާލު ކުރެއްވި މަސްއޫލިއްޔަތު އަދާކުރުމުގައި ފަހަތަކަށް ނުޖެހޭނަމޭ،" ޝިފާޒު ވިދާޅުވިއެވެ.
