ކަލަރސް އެވޯޑުގައި ހިމެނޭ އެޑިޔުކޭޝަން މިނިސްޓަރު ޚާއްސަ އެވޯޑު ފާތިމަތު ދީމާ ޢާލި ހާސިލް ކުރައްވައިފިއެވެ.
މިއީ ކުޅިވަރުގެ ފާހަގަކޮށްލެވޭ ދަރިވަރުންނަށް ޚާއްސަކޮށްފައިވާ އެވޯޑެކެވެ. ދިމާއަކީ ކުޅިވަރުގެ ދާއިރާއިން ޓީޓީގައި ވިސާރި ވިދުންގަ ދަރިވަރެކެވެ. އޭނާއަށް މިއިނާމް ދީފައިވަނީ ހުޅުމާލޭ ހުރަވީސްކޫލުގައި ރޭ ބޭއްވި ޚާއްސަ ޖަލްސާގައެވެ.
ދީމާ ވަނީ މިއަހަރު މޮރިޝަސްގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ރާއްޖެ ތަމްސީލް ކޮށް ތިން ރަން މެޑަލް ހޯދައިފައެވެ. މިދިޔަ މެއި މަހު ތައިލެންޑުގައި ބޭއްވި އޭޝިއަން ޓޭބަލް ޓެނިސް ހޯޕްސް މުބާރާތުން އޭނާ ވަނީ ރާއްޖެއަށް ރިހިމެޑަލް ހޯދައިދީފައެވެ. އިންޑިއާގައި މިއަހަރު ބޭއްވި ސައުތު އޭޝިއާ ހޯޕްސް ޓޭބަލް ޓެނިސް މުބާރާތުގެ އަންހެން ބައިގެ ޗެމްޕިއަންކަން ވެސް އޭނާ ވަނީ ހޯދައިފައެވެ. އޭނާ މިހާރުވަނީ ވޯލްޑް ހޯޕްސް މުބާރާތަށް ވަނީ ކޮލިފައި ވެފަ އެވެ.
އޭނާ ވަނީ ގައުމީ މުބާރާތްވެސް ކާމިޔާބުކޮށް ރައީސުލްޖުމްހޫރިއްޔާގެ ވާދައިގެ ތަށި ކާމިޔާބުކޮށްފައެވެ.
ރޭގެ ޖަލްސާގައި "ކަލަރސް އެވޯޑް ވިނަރ 2018 " އަކަށް ހޮވިފައިވަނީ އައްޑޫ ހައިސްކޫލްގެ ދަރިވަރު ޢާއިޝާތު ހިމްނާ ޙަސަނެވެ.
ކަލަރސް އެވޯޑަކީ، ރާއްޖޭގެ ސްކޫލްތަކުގައި ތަޢުލީމު ޙާޞިލްކުރަމުންދާ ދަރިވަރުން، ދިރާސީ އަހަރުގެ ތެރޭގައި ވާދަކުރާ އެކިއެކި ކުޅިވަރުތަކުން ހޯދާފައިވާ ރަންވަނަތައް ޤައުމީ ފެންވަރެއްގައި ފާހަގަކުރުމަށް މިނިސްޓްރީ އޮފް އެޑިޔުކޭޝަނުން ތަޢާރަފުކޮށްފައިވާ އެވޯޑެކެވެ. މި އެވޯޑު ތަޢާރަފްކޮށްފައިވަނީ 2014 ވަނަ އަހަރުއެވެ.
ކަލަރސް އެވޯޑަށް ކުރިމަތިލުމަށް އިޢުލާނުކުރާ، މީލާދީ އަހަރުގެ ކުރީއަހަރު، ރާއްޖޭގައި ހިންގާ، ގްރޭޑް 1 އިން 12 އަށް ކިޔަވައިދޭ ކޮންމެ އިސްކޫލެއްގައިވިޔަސް ތަޢުލީމި ޙާޞިލުކޮށްފައިވާ ކޮންމެ ދަރިވަރަކަށްވެސް މި އެވޯޑަށް ކުރިމަތިލެވޭނެއެވެ.
މިފަހަރުގެ އެވޯޑަށް 31 ސްކޫލަކުން ޖުމުލަ 500 އެޕްލިކޭޝަން ހުށަހެޅިއެވެ. އޭގެތެރޭގައި އަތޮޅުތެރެއަށް ނިސްބަތްވާ 15 ސްކޫލް ހިމެނުނެވެ. އެވޯޑު ލިބޭ ސްކޫލްތަކުގެ ތެރޭގައި އަތޮޅުތެރޭގެ 14 ސްކޫލަކާއި މާލޭގެ 16 ސްކޫލް ހިމެނުނެވެ.
ކަލާރސް އެވޯޑު 2018 ގައި ޖުމުލަ 14 ކުޅިވަރަކުން އެވޯޑު ދީފައިވެއެވެ. އެއީ އެތުލެޓިކްސް، ބެޑްމިންޓަން، ބާސްކެޓް، ބައިކް، ކެރަމް، ޗެސް، ކުރިކެޓް، ފުޓްބޯޅަ، ހޭންޑްބޯޅަ، ނެޓްބޯޅަ، ސްވިމިންގ، ޓޭބަލްޓެނިސް، ޓެނިސް، އަދި ވޮލީބޯޅައެވެ.
ކަލާރސް އެވޯޑު 2018 ގައި ޖުމުލަ 224 އެވޯޑު ވަނީ ދީފައެވެ. އެއީ 34 ޚާއްސަ އެވޯޑާއި، 85 ރަނަރސްއަޕްއެވެ. 101 ވިނާރސް އެވޯޑުގެ އިތުރުން މިނިސްޓަރގެ ޚާއްޞަ އެވޯޑާއި އައުޓްސްޓޭޑިންގ އެތުލީޓުންނަށް ދެވޭ އެވޯޑެވެ.
އައުޓް ސްޓޭޑިންގ އެތުލީޓުންނަކީ:
އައިޝާތު ހިމްނާ ޙަސަން، އައްޑޫ ހައި ސްކޫލް - އެތުލެޓިކްސް
ނިބާލް އަޙްމަދު، އިމާދުއްދީން ސްކޫލް – ބެޑްމިންޓަން
އައިޝަތު ރަފާ ނާޒިމް، އިސްކަންދަރު ސްކޫލް – ޓޭބަލްޓެނިސް އެވެ.
