ރާއްޖޭގެ ފުރަތަމަ ޓެކްސީ މޯބައިލް އެޕްލިކޭޝަން "ފަހި ކެބް" ގެ ޚިދުމަތް އައްޑޫ ސިޓީއަށް ތަޢާރަފްކޮށްފިއެވެ.
އެ ޚިދުމަތް އައްޑޫސިޓީއަށް ތަޢާރަފް ކުރުމަށްފަހު މިހާރުވަނީ "ކެބް އެމްވީ" ސެންޓަރުގައި ރަޖިސްޓްރީ ކުރުމުގެ ފުރުސަތު ޓެކްސީތަކަށް ހުޅުވައިފައި ކަމަށް އެތަނުން މަޢުލޫމާތު ދެއްވިއެވެ. "މިހާރުވާނީ ރަޖިސްޓްރޭޝަނަށް ހުޅުވާލައިފައި. އަޅުގަނޑުމެންނާ ގުޅިގެން މި ޚިދުމަތް އައްޑޫސިޓީގައި ދޭން ބޭނުންވާ ޓެކްސީތަކުން އަޅުގަނޑުމެން "ކެބް އެމްވީ" އަށް ގުޅައިގެން ރަޖިސްޓްރީ ކުރަމުން ގެންދަންވީ،" އެތަނުން ބުންޏެވެ.
ކެބްއެމްވީ ދެމުން ގެންދާ "ފަހި ކެބް" ޚިދުމަތް އައްޑޫސީޓީގައި ފެށުމުން އެކަމުގެ ފަސޭހަކަން ޓެކްސީތަކަށާއި ކަސްޓަމަރުންނަށް ވަރަށް ބޮޑަށް ލިބިގެންދާނެ ކަމަށް ވެސް އެތަނުން ބުންޏެވެ. މި ޚިދުމަތް މާލެއަށް ތަޢާރަފްކޮށް އެސަރަޙައްދުގައި ކާމިޔާބު ކަމާއެކު ގެންދަނީ ކުރިއަރަމުންނެވެ.
މިޚިދުމަތް އައްޑޫގެ އިތުރަށް މިހާރުވަނީ ކުޅުދުއްފުށްޓަށް ވެސް ތަޢާރަފް ކޮށްފައެވެ. މި އެޕްލިކޭޝަން މެދުވެރިކޮށް ފަސޭހަކަމާއެކު ޓެކްސީ ހޯދޭނެ ކަމަށް ވެސް އެތަނުންބުންޏެވެ. އަދި ޓެކްސީ އޮތް ހިސާބާއި އާދެވޭނެ ގަޑިވެސް އެޕް ބޭނުން ކޮށްގެން ބެލޭނެއެވެ. މި އެޕްލިކޭޝަން ނުވަތަ އޮންލައި ޓެކްސީ ސެންޓަރުގައި ޕްރައިވެޓު ކާރާއި، ސައިކަލް ވެސް ރަޖިސްޓްރީ ކޮށްގެން ޚިދުމަމަތްދެވޭނެއެވެ. މި އެޕްލިކޭޝަން ގޫގުލް ޕްލޭ ސްޓޯރ އަދި އެޕަލް ސްޓޯރ އިން ޑައުންލޯޑް ކުރެވޭނެ އެވެ. މިއީ ހުއްދަނަގަންޖެހޭ ފަރާތްތަކުގެ ހުއްދައާއެކު ފޯރުކޮށްދެމުން ގެންދާ ފަސޭހަ ޚިދުމަތެކެވެ.
