މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތުގެ ފައިސާ ލިބުނުކަމަށް ތުޙުމަތު ކުރެވޭ މެމްބަރުންގެ މަޢުލޫމާތު ޙިއްޞާކޮށްދެއްވުމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު ތަޙްޤީޤީ އިދާރާތަކުގައި އެދިވަޑައިގެންފިއެވެ.
މިކަން ހާމަކުރެއްވީ މިއަދު ރައްޔިތުންގެ މަޖިލީހުގެ އިރާދާގައި ބޭއްވި ނޫސްވެރިންގެ ބައްދަލުވުމުގައި މަޖިލީހުގެ އަމީންއާންމު ފާތުމަތު ނިޢުޝާއެވެ. އަމީންއާންމު ވިދާޅުވީ 19 މަޖިލީހަކީ ނަޒާހަތްތެރި މަޖިލީހެއްކަން ކަށަވަރުކުރުމަށްޓަކައި މަޖިލީހުގެ ރައީސާއި، މެންބަރުންގެ އިތުރުން މަޖިލީހުގެ އިދާރާއިން މަސައްކަތްކުރަމުންދަނިކޮށް، މަޖިލީހުގެ މެންބަރުންގެ ހިޔާނާތުގެ މައްސަލައެއް ފެންމަތިވުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.
ބޮޑު ޚިޔާނާތުގެ ފައިސާ ލިބުނުކަމަށް ތުޙުމަތުކުރެވޭ 267 ފާރަތުގެ ތެރޭގައި 19 ވަނަ ރައްޔިތުންގެ މަޖިލީހުގެ 16 މެމްބަރެއް ހިމެނޭކަމަށް ފުލުހުން ވަނީ ހާމަކުރައްވައިފައެވެ. 18 ވަނަ ރައްޔިތުންގެ މަޖިލީހުގެ 44 މެމްބަރަކަށްވެސް މިފައިސާ ލިބުފައިވާ ކަމަށް ވަނީ ތުޙުމަތު ކުރައްވައިފައެވެ. ޚިޔާނާތުގެ ފައިސާ ލިބިފައިވާކަމަށް ތުޙުމަތު ކުރެވޭ އިތުރު ފަރާތްތަކުގެ ތެރޭގައި މިނިވަން މުޢައްސާސާތަކުގެ 5 މެމްބަރުންނާއި ކުރީސަރުކާރުގެ އިސްމަޤާމުގެ ތަކުގައި ތިއްބެވި 23 ފަރާތަކާއި މިހާރުގެ ސަރުކާރުގެ 7 ފަރާތެއް ވެސް ހިމެނެއެވެ. ކުރިއާއި މިހާރުގެ 6 ފަނޑިޔާރަކާއި ސަލާމަތީ ބާރުތަކުގެ 7 އޮފިސަރެއް ހިމެނޭ ކަމަށް ވެސް ފުލުހުންނާއި، އޭސީސީގެ އިތުރުން ޚިޔާނާތުގެ މައްސަލަތައް ބެލުމަށް ރައީސުލްޖުމްހޫރިއްޔާ އުފައްދައިފައިވާ އެސެޓް ރިކަވަރީ ކޮމިޝަނުން ގުޅިގެން ނޫސްވެރިންގެ ބައްދަލުވުމުގައި ވަނީ ހާމަކުރައްވައިފައެވެ. އޭގެތެރޭގައި ޕޮލިސްކޮމިޝަރަކާއި ޑެޕިއުޓީ ޕޮލިސް ކޮމިޝަނަރަކު ގިނަ ޢަދަދެއްގެ ފައިސާ ނަގައިފައިވާ ކަމަށް އެސިސްޓެންޓް ކޮމިޝަނަރ މުޙައްމަދު ރިޔާޒު ވިދާޅުވިއެވެ. ޚިޔާނާތުގެ ފައިދާ ލިބުނު އެކިއެކި މުޢައްސާސާތަކަށް ނިސްބަތްވާ މީހުންގެ ޢަދަދު ހާމަކުރެއްވި ނަމަވެސް އެއްވެސް ފަރާތެއްގެ ނަމެއް ހާމަކުރައްވައިފައެއް ނުވެއެވެ.
އެސިސްޓެންޓް ޕޮލިސް ކޮމިޝަނާ މުހައްމަދު ރިޔާޒް ވިދާޅުވީ އެމްއެމްޕީއާރުސީ މެދުވެރިކޮށް ހިންގި ހިޔާނާތުގެ ފައިސާތައް ދައުރުކުރަން ފަށާފައިވަނީ 2014 ވަނަ އަހަރު ބޭއްވުނު ރައްޔިތުންގެ މަޖިލީހުގެ އިންތިހާބުގެ ކުރިން ކަމަށެވެ.
