ރައްޔިތުންނަށް ސަރުކާރުން ވެވަޑައިގެންފައިވާ ވަޢުދުތައް ފުއްދޭނީ ސަރުކާރުގެ އިތުރަށް ޝަރޫޢީ ދާއިރާއި މަޖިީހުގެ އެހީތެރިކަން ލިބިގެން ކަމަށް ރައީސް އިބްރާހީމް މުޙައްމަދު ޞާލި ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރައްޔިތުންނަށް ކޮށްދެއްވުމަށް ސަރުކާރުން ވަޢުދުވެވަޑައިގެންފައިވާ ކަންކަން ފެންނަ ސްޓްރެޓަޖިކް އެކްޝަން ޕްލޭން (އެސްއޭޕީ) އިފްތިތާހު ކޮށްދެއްވުމަށްމިމަހުގެ 2 ވަނަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރޭ އިފްތިތާހުކުރެއްވި ޕުލޭން ތަންފީޒުކޮށް ނިމޭއިރު ރައްޔިތުންނަށްޓަކައި ސަރުކާރުންވެވަޑައިގެންފައިވާ ވަޢުދުތައް ފުއްދައި ނިމޭނެ ކަމަށް ވިދާޅުވިއެވެ.
ރައީސް ވިދާޅުވީ ކަންކަން ރޭވި ތަރުތީބު ކުރެވިއްޖެ ކަމަށެވެ. ދެންއޮތީ އެގާއި އޮތްގޮތަށް ކަންކަން ތަންފީޒު ކުރުން ކަމަށްވެސް އެމަނިކުފާނު ވިދާޅުވިއެވެ. އެގޮތުން ކަންކުރާނެ ގޮތުގެ އިތުރަށް ކަންކުރާނެ ތާރީޚުތަކަށް ދާނދޭން އޭގައި ލިޔެވައިވާ ކަމަށް ވެސް ވިދާޅުވިއެވެ.
"މިރޭ އަޅުގަނޑު އަނެއްކާވެސް އިލްތިމާސްކޮށް ދަންނަވާލަން ބޭނުންވަނީ ޝަރުޢީ ދާއިރާގެ ބޭފުޅުންނަށްވެސް ރައްޔިތުންގެ މަޖިލީހުގެ ބޭފުޅުންނަށްވެސް އަޅުގަނޑުމެން މިވީ ވަޢުދު އެންމެން އެކުގައި، ފުއްދުމުގައި ފަސްޖެހިވަޑައިނުގަނެ އަޅުގަނޑުމެންނާ އެކީގައި ކުރިއަށްވަޑައިގަންނަވާށޭ،" ރައީސް ވިދާޅުވިއެވެ.
މިރޭ އިފްތިތާހުކުރެއްވި ޕްލޭންގައި އެންމެންނަށް ކަމުދާ ކަންތައްތަކެއް ނެތަސް އެ ބަލައިގަންނަން ރައީސް އެދިވަޑައިގެންނެވިއެވެ. އެއީ އެހުރިހާކަމަކީ މީހުންނާ ވާހަކަދެކެވި އެކުލަވާލައިފައިވާ ކަންކަމަށްވާތީ އެކަންކަން ތަންފީޒު ކުރުމަށް އެންމެން އެހީވުމަށް ރައީސް ވަނީ އެދިވަޑައިގެންފައެވެ. ރައީސް ވިދާޅުވީ މިސަރުކާރުގެ ފުރަތަމަ 100 ދުވަސްތެރޭގައި ވަރަށްގިނަ ކަންކަން ކުރެވިފައިވާ ކަމަށާއި ބާކީހުރި ކަންކަން މިޕްލޭނާ އެއްގޮތަށް ނިންމަން މަސައްކަތް ކުރުމަށް އެދިވަޑައިގެންނެވިއެވެ.
މިޕްލޭން އެކުލެވިގެންވަނީ ޖުމްލަ 33 ދާއިރާއެއްގެ މައްޗަށެވެ. .
