ޕީޕީއެމްގެ ރަސްމީ އޮފީހުގެގޮތުގައި ކުރިން ބޭނުންކުރި ހ.ތެމާގައި ހުރި ޕީޕީއެމްގެ ބައެއް ތަކެތި ގެއްލުނު ކަމަށް ބުނެ ހުށަހެޅި މައްސަލައަކާ ގުޅިގެން ފުލުހުން ތެމާއަށް ވަދެ ބަލާ ފާސްކޮށްފިއެވެ.
މިހާރު އެގޭގައި ހިންގަމުންދަނީ ޕީޕީއެމްގެ ރައީސް މައުމޫނުގެ އަމިއްލަފުޅު އޮފީހެވެ.
ފުލުހުންނަށް ހުށަހެޅުނު މައްސަލައާގުޅިގެން ޕީޕީއެމްގެ ސެކްރަޓަރީ ޖެނަރަލްގެ ގޮތުގައި ކުރިން ހުންނެވި އަބްދުލް އަލީމް ވަނީ މިރޭ ފުލުހުންގެ އިދާރާއަށް ޙާޒިރުކޮށްފައެވެ. ތެމާ ފާސްކުރަން މިރޭ ފުލުހުންދިޔައީ އަލީމް ގޮވައިގެން ފުލުހުންގެ ވެހިކަލެއްގައެވެ. އަދި އޭނާގެ ޙާޒިރުގައި ތެމާ ބަލައިފާސްކުރުމަށްފަހު އޭނާ ގޮވައިެގން އަނެއްކާވެސް ފުލުހުންވަނީ ގޮސްފައެވެ. ތެމާއިން އެއްވެސް އިތުރު އެއްޗެއް ފުލުހުން ގެންދިޔަކަމުގެ މަޢުލޫމާތެއް ނުލިބެއެވެ.
މިކަން ހިނގައިދިޔައިރު، ރައީސްމައުމޫނު ވެސް ތެމާގައި އުޅުއްވާކަމަށް ޚަބަރުލިބެއެވެ. އެމަނިކުފާނު އިންނެވީ ބައްދަލުވުމެއްގައިކަމަށް މަޢުލުމާތުލިބިފައިވެއެވެ.
ތެމާގައި ކުރިން ޕީޕީއެމްގެ މައި އިދާރީ އޮފީސް ހިންގިއިރު، އެތަނުގައިހުރި ބައެއް ކޮމްޕިއުޓަރުތަކުގެ ހާޑް ޑިސްކާއި، ޕީޕީއެމްގެ މެމްބަރުންނާބެހޭ މުހިންމު ބައެއް މަޢުލޫމާތު ގެއްލިފައިވާކަމަށް ވަނީ ޚަބަރުލިބިފައެވެ.
