އިންޑޮނޭޝިޔާގެ ހުޅަނގުގެ ދެ ޕްރޮވިންސެއް ކަމުގައިވާ ޕަޕުއާ ހުޅަނގު ޕަޕުއާ ހިމެނޭ ޕަޕުއާ ސަރަހްދުގައި އިހުތިޖާޖު ފުޅާވެ މުޒާހަރާތައް އިތުރުވަމުން ދާތީ އެކަން ކޮންޓުރޯލުކުރުމަށް އިތުރު ސިފައިންނާއި ފުލުހުން އެ ސަރަހައްދަށް ފޮނުވައިފިއެވެ.
އިންޑޮނޭޝިޔާ ސަރުކާރާ ދެކޮޅަށް ޕަޕުއާގައި މުޒާހަރާތައް ފެށުނީ، ޖާވާގައި ކިޔަވަން ތިބި ޕަޕުއާ ދަރިކޮޅުގެ ދަރިވަރުންނާ މެދު އިހާނެތިކޮށް މުއާމަލާތްކޮށް، ނަސްލީގޮތުން ތަފާތުކުރުން ގެންގުޅޭ ކަމަށް ބުނެ، އެކަމާ ދެކޮޅު ހެދުމުގެ ގޮތުންނެވެ.
މިމަހު 17 ވަނަ ދުވަހު އިންޑޮނޭޝިޔާގެ މިނިވަން ދުވަސް ފާހަގަކުރަމުން ދިޔައިރު، ޖާވާގެ ސުރަބަޔާގައި ކިޔަވަން ތިބި ޕަޕުއާ ދަރިކޮޅުގެ ދަރިވަރުންތަކެއް ހައްޔަރުކުރީ، އެ ކުދިން ތިބި ދަނާލުގެ ކުރިމަތީގައި އިންޑޮނޭޝިޔާގެ ދިދައަށް ފައިން އަރައި އިހާނެތިކޮށް ހިތިކަމަށް ބުނެއެވެ.
ފުލުން ވަނީ ދަނާލުގެ ތެރެއަށް ކަރުނަ ގޭސް ޖަހައި ޕަޕުއާ ދަރިކޮޅުގެ 43 ދަރިވަރުން ހައްޔަރުކޮށްފައެވެ. އަދި ހައްޔަރުކޮށްގެން ގެންދިޔަ އިރު ފުލުހުން އެ ދަރިވަރުންނާ ދިމާއަށް ރާމާމަކުނަށް ގޮވި އަޑު ބައެއް މީހުންނަށް އިވިފައި ވެއެވެ.
ހުޅަނގު ޕަޕުއާ ޕްރޮވިންސުގެ ވެރިރަށް މަނޮކްވާރީއާއި، ސޮރޮންގް ސިޓީއާއި، ޕަޕުއާ ޕްރޮވިންސުގެ ވެރިރަށް ޖަޔަޕޫރާގައި އެތައް ހާސް ބަޔަކު މަގުމައްޗަށް ނުކުމެ އިމާރާތްތަކުގައި ރޯކޮށް ގެއްލުން ދީފައި ވެއެވެ. މަނޮކްވާރީގައި ސަރުކާރު މައި އޮފީސްތަކާއި، ގާނޫނު ހަދާ މަޖިލީހުގައި ވަނީ ރޯކޮށް އަންދާލާފައެވެ. ސޮރޮންގް ސިޓީގެ އެއާޕޯޓު ތެރެއަށް އެތަނުގެ އިމާރާތްތަކަށް ވެސް ގެއްލުންދީފައި ވެއެވެ. މީގެ އިތުރަށް ޖަޔަޕޫރާގެ ޖަލަކުން 250 ގައިދީއަކު ވަނީ ފިލާފައެވެ.
ޕަޕުއާ ސަރަހައްދަކީ އިންޑޮނޭޝިޔާއަށް އިގުތިސާދީ ގޮތުން ވަރަށް މުހިއްމު، ގުދުރަތީ ވަސީލަތްތަކުގެ ގޮތުން މުއްސަނދި ސަރަހައްދެކެވެ. ދުނިޔޭގައި އެންމެ ގަނައިން ރަން ނެގޭ ގްރެސްބާގް މައިން ހުންނަނީ ޕަޕުއާގައެވެ. 2016 ވަނަ އަހަރު އެމައިނުން 1.06 މިލިއަން އައުންސް (30 މިލިއަން ގްރާމް) ރަން ނަގާފައި ވެއެވެ.
ޕަޕުއާ ޖަޒީރާއަކީ އިންޑޮނޭޝިޔާ މީހުންނާ މުޅިން ތަފާތު އެހެން ނަސްލެއްގެ މީހުން ދިރިއުޅޭ ރަށެކެވެ. އެރަށުގައި ދިރިއުޅެނީ މެލެނޭޝީޔާ ދަރިކޮޅަށް ނިސްބަތްވާ މީހުންނެވެ. ޕަޕުއާ ޖަޒީރާ ސިޔާސީ ގޮތުން ދެބައިކޮށްފައި ވާއިރު، އިރުމަތީ ފަޅީގައި އޮންނަނީ މިނިވަން ގައުމެއް ކަމުގައިވާ ޕަޕުއާ ނިއު ގިނީއެވެ. ޖަޒީރާގެ ހުޅަނގު ފަޅީގައި އޮންނަނީ އިންޑޮނޭޝިޔާގެ ޕަޕުއާ ޕްރޮވިންސާއި، ހުޅަނގު ޕަޕުއާ ޕްރޮވިންސެވެ.
4.2 މިލިއަން މީހުންގެ އާބާދީއެއް އޮންނަ ޕަޕުއާގެ ދެ ޕްރޮވިންސުގައި 1960 ގެ އަހަރުތަކުއް ސުރު އިންޑޮނޭޝިޔާއިން ވަކިވެގަތުމުގެ ހަކަރާތެއް ވެސް ދަނީ ހިނގަމުންނެވެ. އިންޑޮނޭޝިޔާއިން އެ ސަރަހައްދާ މެދު އިހުމާލުވެފައިވާ ކަމަށް ބުނެ ކުރެވޭ ޝަކުވާތައް ވެސް ވަނީ ގިނަވެފައެވެ.
