ދެހާސް ތޭވީސް ވަނަ އަހަރު އިންޑިއަން އޯޝަން އައިލެންޑް ގޭމްސް (އައިއޯއައިޖީ) ބޭއްވުމުގެ ފުރުސަތު ރާއްޖެއަށް ލިބިއްޖެއެވެ. 2023 ވަނަ އަހަރުގެ އައޯއައިޖީ ރާއްޖޭގައި ބޭއްވުމަށް މިއަދު ބޭއްވި އައިއޯއައިޖީ ގެ ކައުންސިލް ބައްދަލުވުމުން ވަނީ ފާސްކޮށްފައެވެ.
މި ފުރުސަތު ރާއްޖެއަށް ލިބިފައިވަނީ މަޑަގަސްކަރައާއި ކޮމޮރޯސްއާ ވާދަކޮށް ބިޑު ކާމިޔާބު ކޮށްގެނެވެ. ރާއްޖެއަށް މިކަން ކާމިޔާބުވެފައިވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އިވެސް ހުންނަވައިގެން އެމަނިކުފާނުގެ ޚާއްސަ މަންދޫބުންގެ ގޮތުން ވަޒީރުން ޤައުމުތަކަށް ފޮނުވައިގެން ކުރެއްވި މަސައްކަތްތަކުންނެވެ. އެމަމަނުކުފާނުގެ މަންދޫބުންގެ ގޮތުގައިޤައުމުތަކަށް ވަޑައިގެންނެވީ ފޮރިން މިނިސްޓަރ ޢަބްދުﷲ ޝާހިދާއި، ޔޫތު މިނިސްޓަރ އަޙުމަދު މަޙުލޫފެވެ.
ރައީސް އިބްރާހީމް މުޙައްމަދު ޞާލިޙު ވިދާޅުވެފައިވަނީ މި ގޭމްސް ރާއްޖެގައި ބާއްވާއިރު ސަރުކާރުން ސީދާ އެ މުބާރާތްތަކަށް އަމާޒުކޮށްގެން، ބޮޑެތި ޚަރަދުތަކެއް ކުރުމުގެ ވިސްނުމެއް ނުގެންގުޅުއްވާ ކަމަށެވެ. އޭގެ ބަދަލުގައި ސަރުކާރުގެ ވިސްނުން ހުރީ ރާއްޖޭގެ ޤައުމީ ތަރައްޤީގެ މަޝްރޫޢުތަކާ ގުޅުވައިގެން، އެ މުބާރާތް ރާއްޖޭގައި ބޭއްވުމުން ކަމަށް ރައީސް ވިދާޅުވެފައިވެއެވެ.
ބައިނަލްއަޤްވާމީ މުބާރާތަކުން ރާއްޖެއަށް އެންމެ ފުރަތަމަ މެޑެއްޔެއް ލިބުނީ، މީގެ 40 އަހަރު ކުރިން އެންމެ ފުރަތަމަ ބޭއްވި އައި.އޯ.އައި.ޖީ ގައެވެ. ރާއްޖެއަކީ މި މުބާރާތުގެ ފައުންޑަރ މެންބަރު ޤައުމެކެވެ.
މިއަހަރުގެ އައިއޯޖީ ބޭއްވީ މޮރިޝަސްގައެވެ. އެ މުބާރާތުގައި ވާދަކުރި ދިވެހިޓީމުތައް ކުޅުނުއިރު ރައީސްގެ ދެކަނަބަލުންވަނީ އެ ކުޅިވަރުތައް ބައްލަވައި ލެއްވުމަށް ވަޑައިގެންފައެވެ. އެތަނަށް ވަޑައިގެން ރައީސްގެ ދެކަނބަލުންވަނީ ޓީމުތަކަށް ތަރުޙީބު ދެއްވައިފައެވެ.
މިފަރުގެ ގޭމްސްގައި ރާއްޖޭގެ ފަރާތުން 14 ކުޅިވަރެއްގައި މިއަހަރު ބައިވެރިވިއެވެ. ރާއްޖެއިން ވަނީ ޓޭބަލް ޓެނިސްގެ ޓީމު އިވެންޓުންނާއި ބެޑްމިންޓަން ސިންގަލްސް އިން ރަންމެޑެލް ހާޞިލްކޮށްފައެވެ. އަދި އެހެން ބައެއް ކުޅިވަރުތަކުންވެސް ރިހި މެޑެއްޔާއި ބްރޯންޒް މެޑެލް ރާއްޖޭގެ ޓީމުތަކުން ހޯދާފައިވެއެވެ.
