ޤާނޫނީ ވަކީލުންގެ ތެރެއިން ޖޭއެސްސީއަށް ވަކީލަކު އިންތިޚާބު ކުރުމަށް ބާ ކައުންސިލުން ބާއްވާ އިންތިޚާބުގެ ވޯޓުލުން ފަށައިފިއެވެ.
މި އިންތިޚާބުގެ ވޯޓުލުން ފަށައިފައވަނީ ހެނދުނު 9:20 ގައެވެ. އިންތިޚާބުގައި މާލޭގައި ވަނީ ވޯޓުލާނެ ދެ ފޮށި ބަހައްޓައިފައެވެ. އެ ދެފޮށި ބަހައްޓާފައިވަނީ އިންތިޚާބާ ބެހޭ މަރުކަޒު ބައު ޖަމާލުއްދީން ސްކޫލުގެ ޓްރެއިނިން ހޯލުގައެވެ. އަނެއް ފޮށި ބަހައްޓާފައިވަނީ އައްޑޫ ސިޓީ ހިތަދޫ ޝަރަފުއްދީން ސްކޫލުގައެވެ.
މާލެ ސިޓީގެ އެއް ނަމްބަރ ވޯޓު ފޮށީގެ ވޯޓުލުން ފެށިފައިވަނީ 9:20 ގައެވެ. ދެ ނަމަބަރ ވޯޓު ފޮށްޓާއި އައްޑޫގައި ބަހައްޓާފައިވާ ފޮށްޓަށް ވޯޓުލާން މީހަކު އައިސްފައިނުވާތީ އެ ދެފޮށީގެ ވޯޓުލާން އަދި ނުފެށެއެވެ.
ބާ ކައުންސިލްގެ އެދުމުގެ މަތީން މި އިންތިޚާބު ބާއްވައިދެނީ އިލެކްޝަންސް ކޮމިޝަން (އީސީ) އިންނެވެ. މިއިން ތިޚާބުގައި ވާދަކުރުމަށް 6 ވަކީލަކު ފޯމާއެކު ލިޔެކިޔުންތައް ހުށަހެޅިއެވެ. އެހެންނަމަވެސް ކެންޑިޑޭޓުންގެ ލިޔެކިޔުންތައް އިތުރަށް ދިރާސާ ކުރުމަށްފަހު ބާ ކައުންސިލުން ވަނީ ޢަބްދުލް ޙައްނާން އަޙުމަދުގެ ކެންޑިޑެސީ ބާތިލް ކުރައްވައިފިއެވެ. އޭނާގެ ކެންޑިޑެސީ ބާތިލް ކުރެއްވީ އިތުރު ދައުރަކަށް ޖޭއެސްސީގެ މެމްބަރަކަށް ހުރުމަށް ޤާނޫނު ހުރަސް އަޅާތީއެވެ. އޭނާގެ ނަން ބާތިލް ކުރުމުން އިންތިޚާބުގައި މިހާރު ވާދަކުރައްވަނީ 5 ކެންޑިޑޭޓުންނެވެ.
މި އިންތިޚާބުގެވޯޓުލުން ކުރިއަށް ދާނީ ހެނދުނު 9:00 އިން ހަވީރު 5:00 އަށެވެ.
މީގެ ކުރިން ޤާނޫނީ ވަކީލުންގެ ތެރެއިން ޖޭއެސްސީގައި އިންނެވީ އަލްއުސްތާޒާ ލަތީފާ ޤާސިމެވެ. އެހެންނަމަވެސް ދިވެހިރާއްޖޭގެ ޤާނޫނީ ފަންނުގެ ޤާނޫނު ފާސްވި ހިސާބުން އޭނާގެ މަޤާމުވަނީ ގެއްލިފައެވެ.
