އުރީދޫގެ އެމް-ފައިސާ އަށް ޓެލެކޮމް އޭޝީއާގެ ޚާއްސަ އެވޯޑެއް ކަމަށްވާ "މޯސްޓް އިނޮވޭޓިވް މޮބައިލް ޕޭމަންޓް ސާވިސް އެވޯޑު" ލިބިއްޖެއެވެ.
އުރީދޫއަށް އެ އެވޯޑުލިބުނީ މިއަހަރު ބޭއްވި ޓެލެކޮމް އޭޝިއާ އެވޯޑު ހަފްލާގައެވެ.
އެމްފައިސާ އަކީ މޮބައިލް ފޯނު މެދުވެރިކޮށް، ފައިސާ ޖަމާކުރުމާއ، ފައިސާ ނެގުމާއި، އެހެން ބޭފުޅުންނަށް ފައިސާ ޓްރާންސްފާ ކުރުމާއި، ވިޔަފާރިތަކަށް ފައިސާ ދެއްކުންފަދަ މުއާމަލާތްތައް ފަސޭހަ ކަމާއެކު ކުރެވޭ ޚިދުމަތެއް ކަމަށް އުރީދޫން ވިދާޅުވިއެވެ. އެމްފައިސާ މެދުވެރިކޮށް ވަރަށްގިނަ ތަންތަނުގެ ބިލްތަކަށް ވެސް ފައިސާ ދެއްކެވެއެވެ.
މި ހަފްލާގައި އިތުރު ތިން ކެޓަގަރީ އަކުން އުރީދޫ ވަނީ ފައިނަލިސްޓެއްގެ ގޮތުގައި ޝޯޓްލިސްޓް ވެފައެވެ. އޭގެތެރޭގައި ހިމެނެނީ އުރީދޫ މޯލްޑިވްސް، ބެސްޓް އެމާޖިންގ މާކެޓް އޮޕަރޭޓަރ، ނިރު އެކްސެލެރޭޓަރ ޕްރޮގްރާމް، މޯސްޓް އިނޮވޭޓިވް ކޮމިއުނިޓީ ޓެލެކޮމް ޕްރޮޖެކްޓެވެ.
ނިރު އެކްސެލެރޭޓަރ އަކީ ދިވެހި މުޖުތަމަޢަށް މަންފާކުރުވާ ތަފާތު އީޖާދީ އުފެއްދުންތައް ރާއްޖެއާ ރާއްޖެއިން ބޭރުގެ މާކެޓުގައި ކުރިއެރުވުމުގެ ފުރުސަތު އަލަށް ވިޔަފާރީގެ ތެރެއަށް ވަންނަ ޒުވާނުންނަށާއި، ކުރިއަރަމުން އަންނަ މިފަދަ ވިޔަފާރިތަކަށް ހޯދައި ދިނުމުގެ ގޮތުން އުރީދޫން ކުރިއަށްގެންދާ ޕްރޮގްރާމެކެވެ. މިގޮތުން އެކްސެލެރޭޓަރަށް ހޮވާލެވުނު ޓީމް ތަކަށް ވަނީ 12 ހަފްތާގެ އިންޓެންސިވް މެންޓަޝިޕް ޕްރޮގްރާމެއްގެ އިތުރުން، މަސައްކަތް ކުރާނެ ކޯ-ވޯކިން ސްޕޭސް، ވިޔަފާރި ބިނާކުރުމަށް ޑިޖިޓަލް ޓޫލްތައް އަދި ދާއިރާގެ ފަންނުވެރިންގެ ފަރާތުން ޓެކްނިކަލް ސަޕޯޓު ފޯރުކޮށްދެވިފައެވެ.
އުރީދޫ ނެކްސްޓް، މޯސްޓް އިނޮވޭޓިވް ސޯޝަލް މީޑިއާ ސްޓްރެޓެޖީ
އާޓިފިޝަލް އިންޓެލިޖެންސް އާއި މެޝިން ލަރނިންގް ބޭނުންކުރާ ރިއަލް ޓައިމް އޭޕީއައި ޕްލެޓްފޯމެއްގެ އެހީގައި ހިނގާ އުރީދޫ ނެކްސްޓް މެދުވެރިކޮށް، ރާއްޖޭގެ ކޮންމެ މޮބައިލް ކަސްޓަމަރަކަށްވެސް، ފޭސްބުކް މެސެންޖަރ އަދި ވައިބަރ ފަދަ މީސްމީޑިއާގައި އުރީދޫ މޯލްޑިވްސް އާއި ބެހޭ ތަފާތު މައުލޫމާތު ސާފުކޮށް، ޚިދުމަތް ހޯދޭނެއެވެ.
"އުރީދޫ އިން ކުރާ ކޮންމެ ކަމެއްގައިވެސް އަޅުގަނޑުމެން ބަލަނީ، އެކަމެއް އީޖާދުކޮށް، އުފެއްދުންތެރިކަން ގެނައުމަށް. މިގޮތުން، އަޅުގަނޑުމެންގެ މަސައްކަތްތަކުގެ އަގުވަޒަންކޮށް، މިފަދަ ބައިނަލްއަޤްވާމީ އެވޯރޑެއް ލިބުމަކީ، އުރީދޫގެ ޓީމަށް ލިބިފައިވާ ވަރަށް ބޮޑު ފަޚުރެއް. ޓެލެކޮމް އޭޝިއާގެ މިއަހަރުގެ ޝިޢާރު ކަމަށްވާ، "ޑިޖިޓަލް އިކޮނޮމީގެ ކަނެކްޓިވިޓީ ސްޓޭންޑަޑުތައް އައު އުސްމިންތަކާއި ހަމައަށް ގެންދިއުން" މިއީ އުރީދޫ އިންވެސް ޚާއްޞަ އިސްކަމެއްދޭ ކަމެއް" ސީއީއޯ ނަޖީބު ޚާން ވިދާޅުވިއެވެ. އޭނާ ވިދާޅުވީ މި ލިބުނު އެވޯރޑުން ހިއްވަރުލިބި، އުރީދޫ އިން ކުރިއަށް އޮތް ތަނުގައިވެސް މަސައްކަތް ކުރަމުންދާނީ، ޑިޖިޓަލް ދިވެހިރާއްޖެއަކަށް އެއްބާރުލުންދީ، ކަސްޓަމަރުންގެ ޙަޔާތަށް އިތުރު ފާގަތިކަން ގެނެސްދޭ ޚިދުމަތްތަކާއި ޓެކްނޮލޮޖީތަކެއް ފޯރުކޮށްދިނުމަށް ކަމަށް ވެސް އޭނާ ވިދާޅުވެފައިވެއެވެ.
22 އަހަރު ކުރިން ފަށާފައިވާ ޓެލެކޮމް އޭޝިއާ އެވޯރޑަކީ، ޓެލެކޮމް ދާއިރާ އަށް ޚާއްޞަކޮށްގެން މި ސަރަހައްދުގައި ކުރިއަށްގެންދާ އެންމެ ދުވަސްވީ އަދި އެންމެ ފަޚުރުވެރި އެއް އެވޯރޑެވެ. ޑިޖިޓަލް މުސްތަޤްބަލަކަށް މަސައްކަތްކުރަމުންދާ ހިނދު، ޓެލެކޮމް އޭޝިއާއިން ފާހަގަ ކުރަނީ އިންޑަސްޓްރީގެ އެންމެ އީޖާދީ އަދި ވާދަވެރި ކުންފުނިތަކެވެ. މިގޮތުން، މިއަހަރު ވަނީ ސަތޭކަ އެތަކެއް ފިކްސްޑް، މޮބައިލް އަދި ކޮންވާޖަންސް ޓެލެކޮމް އޮޕަރޭޓަރުންގެ ތެރެއިން، 28 ކެޓަގަރީއެއްގައި، އެންމެ ފާހަގަކޮށްލެވޭ ކުންފުނިތަކެއް ހޮވާފައެވެ. މި އެވޯރޑަށް ކުންފުނިތައް ނޮމިނޭޓް ކޮށްފައިވަނީ ޓެލެކޮމް އޭޝިއާގެ ކިއުންތެރިން، ޖަޖުން، އަދި އެޑިޓަރުންނެވެ.
