އދ. ގެ ސަލާމަތީ މަޖިލީހަށް ކުރިއަށް އޮތް ދެ އަހަރަށް އައްޔަންކުރާ ދާއިމީ ނޫން ފަސް މެންބަރުން އދ. ގެ އާއްމު މަޖިލީހުން އިއްޔެ ހޮވައިފިއެވެ. ސަލާމަތީ މަޖިލީހުގައި ދާއިމީ ނޫން 10 މެންބަރުން ތިބޭއިރު، އދ. ގެ 193 އާއްމު މެންބަރުންގެ ތެރެއިން ކޮންމެ އަހަރަކު ފަސް މެންބަރުން ހޮވައެވެ. ފާއިތުވި އަހަރު ހޮވި ފަސް މެންބަރުންގެ ދައުރު 2020 ގެ ނިޔަލަށް ހަމަވާއިރު، މި އަހަރު ހޮވި ފަސް މެންބަރުންގެ ދައުރު ހަމަވާނީ 2021 ގެ ނިޔަލަށެވެ.
އިއްޔެ ހޮވުނު ފަސް މެންބަރުންނަކީ އެސްޓޯނިޔާ، ސޭންޓް ވިންސެންޓް އެންޑް ދަ ގްރެނައިޑްސް، ނައިޖަރު، ޓިއުނީޝިޔާ އަދި ވިއެޓްނާމެވެ. މި ފަސް ގައުމު މެންބަރުކަމުގެ ދައުރު ފަށާނީ 1 ޖަނަވަރީ 2020 ގައެވެ. މި އަހަރުގެ ނިޔަލަށް ދައުރު ނިމި ވަކިވާ ފަސް މެންބަރުންނަކީ އީކުއޭޓޯރިއަލް ގިނީ، ކޯޓް ޑިވޯ (އައިވަރީ ކޯސްޓް)، ކުވޭތު، ޕެރޫ އަދި ޕޮލެންޑެވެ.
15 މެންބަރުން ހިމެނޭ ސަލާމަތީ މަޖިލީހަށް ފާއިތުވި 2018 ވަނަ އަހަރު ހޮވި 2020 ގެ ނިޔަލަށް ދައުރު ހަމަވާ މެންބަރުންނަކީ ބެލްޖިއަމް، ޑޮމިނިކަން ރިޕަބްލިކް، ޖަރުމަނު، އިންޑޮނޭޝިޔާ އަދި ދެކުނު އެފްރިކާއެވެ. ފާއިތުވި އަހަރު ސަލާމަތީ މަޖިލީހަށް ދާއިމީ ނޫން ފަސް މެންބަރުން ހޮވުމަށް އދ. ގެ އާއްމު މަޖިލީހުގައި ނެގި ވޯޓުގައި އޭޝިޔާ ސަރަހައްދުން އިންޑޮނޭޝިޔާ ހޮވުނީ އެގައުމާ ވާދަކުރި ދިވެހިރާއްޖެ ބޮޑު ތަފާތަކުން ބަލިކޮށްފައެވެ. އެއީ 144 ވޯޓު 46 ވޯޓުންނެވެ.
ސަލާމަތީ މަޖިލީހުގައި ތިބޭ ދާއިމީ ފަސް މެންބަރުންނަކީ އެމެރިކާ، ރަޝިޔާ، އިނގިރޭސިވިލާތް، ފްރާންސް އަދި ޗައިނާއެވެ.
ދާއިމީ ނޫން މެންބަރުންނަށް ވީޓޯކުރުމުގެ ހައްގު ލިބިފައި ނެތަސް، ސަލާމަތީ މަޖިލީހުގެ މެންބަރުކަމަށް ހޮވުމަކީ އދ. ގެ މެންބަރު ގައުމުތަކުން ޝަރަފެއްގެ ގޮތުގައި ގަބޫލުކުރާ ކަމެކެވެ. އދ. އެންމެ ބާރުގަދަ ގުނުވަނަކީ ސަލާމަތީ މަޖިލިސް ކަމުގައި ވާތީއެވެ.
