އޭނާ މަޝްހޫރުވެފައިވަނީ ހަން ބައްދާ ޙަސަނުގެ ނަމުންނެވެ. އޭނާގެ ފޯން ނަމްބަރަކީ އައްޑޫ ސިޓީގެ ގިނަމީހުން ހިތު ދަސް ނަމްބަރެކޭ ބުންޏަސް ދޮގަކަށް ނުވާނެއެވެ.
މަރަދޫ، މީނާޒު، ޙަސަން ނާސިރު ހަންބައްދާ ޙަސަނުގެ ނަމުން މަޝްހޫރުވީ އޭނާ ކުރަމުންއައި މަސައްކަތާ ގުޅުވައިގެންނެވެ. އެންމެންނާ ގުޅޭ މިޒާޖެއް ހުންނަ ޙަސަނު ބޭރުތެރައަށް ނުކުމެ ސައިކަލްތަކުގެ ހަންބައްދައިދިނުމުގެ ޚިދުމަތް ފެށީ 1999 އަހަރުން އެވެ. އެފަހުން މިވީ ދުވަސްތަކުގައި އޭނާ އެ ޚިދުމަތެއް ނުހުއްޓައެވެ. ނިދާފައި އޮންނަ ގަޑިއެއްގައި މީހަކު ގުޅާލިޔަސް އޭނާ ތެދުވެގެން ގޮސް އެ ޚިދުމަތް ފޯރުކޮށްދެނީ ކޮށްދޭ ހިތުންނެވެ.
ހަން ބެއްދުމުގެ މަސައްކަތަކީ ފުލްޓައިމް ކަމެއްގެ ގޮތުގައި 15 އަހަރު އޭނާ ކުރިއެވެ. އެހެނަސް އެކަން ފުލްޓައިމް ކަމެއްގެ ގޮތުގައި އޭނާ ނުކުރެއެވެ. ރަސްމީ ވަޒީފާއަކަށް ގަމަށް ދާތީއެވެ.
އޭނާއަކީ އެހެން މީހުންނަށް އެހީވާން ބޭނުންވާ މީހެކެވެ. ހަމައެކަނި ހަން ބައްދައިދީ ދީގެނެއް ނޫނެވެ. އައްޑޫ ސިޓީގެ ގުޅިފައިވާ އަވަށްތަކުގެ ކޮންމެ ހިސާބަކުން ސައިކަލުގެ ހަން ފަޅައިގެން ދިޔަސް އޭނާއަށް ގުޅާ ލުމުން ދުމެއް ޖަހާފައި އެތަނަކަށް އޭނާ ދާނެއެވެ. އެ މީހެއްގެ އަތުގައި ފައިސާހުރިތޯ ނެތްތޯ ނުބަލާނެއެވެ. ފައިސާއަށް ވުރެ ބޮޑަށް އޭނާ އިސްކަންދެނީ ޚިދުމަތް ދިނުމަށެވެ. "އެގޮތަށް ދަތުރުމަތީގައި ހަންފަޅައިގެންދާއިރު ފައިސާ ނުހުރެދާނެ. އެކަމަކު ޚިދުމަތް ދިނުމަކީ އަޅުގަނޑުގެ މަސައްކަތް. އެގޮތަށް ޚިދުމަތް ދިނުމަށްފަހު ހަ މަސް ފަހުން ވެސް ފައިސާ ލިބިފައިފައި އެބަހުރި. ނުލިބި ވެސް އެބަހުރި. އެކަމަކު އެކަން އެއީ މާބޮޑު މައްސަލައެއް ކަމަށް ނުނަގަން،" އޭނާ ބުންނެވެ.
ހަން ބެއްދުމުގެ މަސައްކަތަކީ ވަރަށް ކުރިން ވެސް އޭނާ ކުރަމުން އައި މަސައްކަތެކެވެ. އެހެންނަމަވެސް ބޭރުތެރެއަށް ނުކުމެ އެ ޚިދުމަތްދޭން އޭނާ ފެށީ 1999 ވަނައަހަރުއެވެ. "އެއްރޭ ހިތަދުއަށް ދަނިކޮށް ސައިކަލުގެ ހަން ފެޅުނީ. އެހިސާބުން ޖެހުނީ ހަންފެޅުނު ތަނުގައި ސައިކަލް ބަހައްޓާފައި ކާރެއްގައި މަރަދުއަށް ދާން. ދެން އަނެއް ދުވަހު އަނެއްކާ ވެސް ކާރެއްގައި ސައިކަލް ހުރިތަނަށް ގޮސް ހަންބައްދައިގެން ދާން ޖެހުނީ. އެހިސާބުން ނިންމީ މިއީ މީހުން ބޭނުންވާނެ ރަނގަޅު ޚިދުމަތެކޭ މިކަން ފަށަންވީއޭ. އެހިސާބުން ކުޑަ ސްޓޮކެއް ހޯދައިގެން މަސައްކަތް ފެށިގޮތަށް މެދު ނުކެނޑި ފަނަރަ އަހަރު އެކަން ކުރިން. އޭރު އެކަންކުރީ ފުލްޓައިމް ކަމެއްގެ ގޮތުގައި. މިހާރުވެސް އެ ޚިދުމަތް ދެން، އެކަމަކު ފުލްޓައިމް ކޮށެއް ނޫން" ޙަސަން ނާސިރު ބުންޏެވެ.
މިހާރު އޭނާ ދޭ އެހެން ޚިދުމަތެއް ވެސް އޮވެއެވެ. މަގުމަތިން ސައިކަލުގެ ޕެޓްރޯލް ހުސްވެގެން އުޅޭ މީހުންނަށް ޕެޓްރޯލް އަޅައި ދިނުމެވެ. އެކަމަށް އޭނާގެ ސައިކަލުގެ މަޑި ދަށުގައި އަބަދުވެސް ޕެޓްރޯލް ފުޅިއެއް ބަހައްޓައެވެ. އެއީ ހިލޭ އޭނާ ދޭ ޚިދުމަތެކެވެ. އިމަޖެންސީ ޙާލަތުގައެވެ.
ޙަސަން ވަނީ ހަން ބެއްދުމާބެހޭ ފޮތެއްވެސް ލިޔެފައެވެ. އަމިއްލަ ތަޖުރިބާގެ އަލީގައެވެ. އެ ފޮތް ރަސްމީކޮށް އަދި އޭނާ ނުނެރެއެވެ. އެހެން ނަމަވެސް ކޮންމެވެސް ބައެއްގެ އެހީގައި އެކަން ކުރުމަކީ އޭނާގެ އުންމީދެވެ.
މަގުމަތިން ހަން ފެޅުމުން އެތަނަކަށް ގޮސް ހަން ބައްދައިދިނުމުގެ ޚިދުމަތް ރާއްޖޭގައި އެންމެފުރަތަމަ ދޭން ފެށީ އޭނާ ކަމަށް ވެދާނެއެވެ. މިހާރު ބޮޑެތި ރަށްރަށުގައި އެ ޚިދުމަތްދޭ މީހުން އެބައުޅެއެވެ. އައްޑޫގައި ވެސް ދެތިން މީހަކު އެބައުޅެވެ.
ސައިކަލް ޓެކްސީގެ ޚިދުމަތް ރާއްޖެއަށް މިހާރު ތަޢާރަފްވުމުގެ މާކުރިން އޭނާ ވަނީ އައްޑޫގައި އެކަން ފަށައިފައެވެ. އޭރު ހިތަދުއަށް ދަތުރެއް ކޮށްދިނީ 20 ރުފިޔާއަށެވެ. ރަށުތެރޭގައި ނަމަ 10 ރުފިޔާއަށެވެ. އެހެންނަމަވެސް ފަހަކަށް އައިސް ސައިކަލްތައް އިތުރުވެ ޑިމާންޑު ކުޑަވުމުން އޭނާ ވަނީ އެކަން ހުއްޓާލައިފައެވެ. އެހެންނަމަވެސް އަލުން އެކަން ފެށުނުގެ ވިސްނުން އަދި ވެސް އޭނާ އެބަގެންގުޅެއެވެ. ސައިކަލް ކުއްޔަށް ދޫކުރުމަކީ ވެސް އޭނާގެ ވިސްނުމުގައި ހުރި ކަމެކެވެ. އެ ޚިދުމަތް އޭނާ ޓާގެޓް ކުރަނީ ރަށަށް އަންނަ ބީރައްޓެހިންނަށެވެ.
އަންނަ އަހަރު އޭނާގެ ވަރަށް ޚާއްސަ ޚިދުމަތެއް ފެނިގެންދާނެއެވެ. އެއީ ޙަޔާތުގެ ބައިވެރިއަކު ނުލިބިފައި ނުވަތަ ނެތް މީހުންނަށް ބައިވެރިއަކު ހޯދައި ދިނުމެވެ. އެކަމަށް އޭނާ މިހާރު ދަނީ ފިސާރިއަށް ތައްޔާރު ވަމުންނެވެ. އެކަމަށް ބޭނުންވާ ދަފްތަރު އެކުލަވާލުމަކީ ފުރަތަމަ މަރުޙަލާއެވެ. މިއީ އޭނާ ސަމާސާއަކަށް ކުރަން އުޅޭ ކަމެއް ނޫންނެވެ. މިއީ ކުރިން ވެސް އޭނާ ފެށި ކަމެކެވެ. އެހެން ނަމަވެސް ތަފާތު ސަބަބުތަކާހެދި އެފަހަރު އެހާ ކާމިޔާބެއް ނުވިއެވެ.
ކޮންމެ މީހެއްގެ ވެސް އުންމީދުތަކެއް ހުންނާނެއެވެ. ބޭނުންތަކެއް ހުންނާނެއެވެ. ހުވަފެންތަކެއް ވެސް ދެކޭނެއެވެ. ޙަސަނު ވެސް ދެކޭ ވަރުގަދަ ހުވަފެނެއް އެބައޮތެވެ. އެއީ ގައުކެނޑި ބުރިޖުގެ އޯވަހެޑު ބުރިޖަކަށް ބަދަލުވެ އެތާގެ ދަށުން އޮޑިދޯނިފަހަރަށް ދަތުރުކުރެވޭނެ ގޮތްވުމެވެ. އޭރުން ކަނޑަށް ނުކުންނަން ދުއްވަންޖެހޭ ރާސްތާ ކުރުވެ ތެލުގެ ޚަރަދު ކުޑަވާނެ ކަމަށް އޭނާ ބުންޏެވެ. ޚާއްސަކޮށް ފަރުމަހުގެ މަސްވެރިންނަށް އެކަމުގެ ފައިދާ އިންތިހާއަށް ބޮޑު ކަމަށް އޭނާ ބުންޏެވެ.
މިއީ ޙަސަނާ ބެހޭ ގޮތުން ދައްކަންހުރި ވާހަކަތަކުގެ ތެރެއިން މަދުމިންވަރެކެވެ. އޭނާގެ ޚިދުމަތް ކުޑަހެއްޔެވެ؟ އޭނާ ދޭން ބޭނުންވާ ޚިދުމަތްތައް މަދުހެއްޔެވެ؟ މިއީ ޚިދުމަތްތެރި ޚިދުމަތުގެ ޙަސަނެއް ނޫންހެއްޔެވެ؟
Vaahaka varah furihama. Aharen saikalu hanfalhaigen gosgen thibuni Hasanah gulaigen miannanee ehga 4 gadi iruvandhen gamuga hurin. Gulhaa kommefaharaku bunaane mi annaneeyey 05 minetun noonee 10 minetun